ඊශ්රායලය සහ ලෙබනනය අතර දැනට ක්රියාත්මක සටන් විරාමය තවත් සති තුනකින් දීර්ඝ කිරීමට දෙපාර්ශවයම එකඟ වූ බව අමෙරිකානු ජනාධිපති ඩොනල්ඩ් ට්රම්ප් ප්රකාශ කර තිබේ.
විදෙස් මාධ්ය වාර්තා අනුව, ධවල මන්දිරය තුළ පැවති සාකච්ඡාවලින් අනතුරුව මෙම එකඟතාවයට පැමිණ ඇති බව සඳහන් වේ.
ඊයේ (23) එක්සත් ජනපදය තුළ, ඊශ්රායල සහ ලෙබනන තානාපතිවරුන් අතර පැවති මෙම හමුව ඉතා සාර්ථක වූ බවද අමෙරිකානු ජනාධිපතිවරයා පෙන්වා දුන්නේය.
පසුගිය සිකුරාදා ආරම්භ වූ දින 10ක මූලික සටන් විරාමය ලබන සඳුදා අවසන් වීමට නියමිතව තිබූ අතර, මෙම නව එකඟතාවයත් සමඟ එය තවදුරටත් ඉදිරියට යාමට හැකිව තිබේ.
මේ අතර ඉදිරි වසර තුළ ඊශ්රායලය සහ ලෙබනනය අතර ස්ථීර සාම ගිවිසුමකට එළඹීමේ වැඩි අවස්ථාවක් පවතින බව අමෙරිකානු ජනාධිපති ඩොනල්ඩ් ට්රම්ප් ප්රකාශ කර තිබේ.
අමෙරිකාවේ ධවල මන්දිරය තුළ පැවති හදිසි ප්රවෘත්ති සාකච්ඡාවකදී ජනාධිපතිවරයා සඳහන් කළේ, මෙම සාම ක්රියාවලිය තමන් මැදිහත් වන අනෙකුත් ජාත්යන්තර අර්බුදවලට වඩා “සාපේක්ෂව පහසු” එකක් විය හැකි බවය.
එමෙන්ම ඉරානය විසින් හිස්බුල්ලා වෙත ලබාදෙන මූල්ය ආධාර පිළිබඳව ද ඔහු අවධානය යොමු කළේය.
ඉදිරි කාලයේ ඉරානය සමඟ ඇති කර ගන්නා ඕනෑම එකඟතාවයකදී එවැනි අරමුදල් නතර කිරීම අත්යවශ්ය බව ට්රම්ප් අවධාරණය කළේය.
දැනට ක්රියාත්මක සති තුනක සටන් විරාම කාලය තුළ, ඊශ්රායල අගමැති බෙන්ජමින් නෙතන්යාහු සහ ලෙබනන ජනාධිපති ජෝසප් අවුන් ධවල මන්දිරයේදී හමුවීමට ඉඩ ඇති බවද ඔහු පැවසීය.
Saru News
