‘ඒහිපස්සිකෝ’ සාම පාගමන තුන්වැනි දිනය මාවනැල්ල බෙලිගම්මන රජමහා විහාරයෙන් අද (24) පස්වරුවේ අවසන් විය.
ඓතිහාසික මහනුවර ශ්රී දළදා මාලිගයෙන් ආරම්භ වු පාගමන අද කිලෝමීටර් 25ක් දුර ගමන් කළේය.
‘ඒහිපස්සිකෝ’ සාම පාගමනේ වඩින වියට්නාම ජාතික පූජ්ය පඤ්ඤාකර හිමි ප්රමුඛ භික්ෂුන් වහන්සේ 13නම අද (24) පෙරවරුවේ ඓතිහාසික ශ්රී දළදා මාලිගය වැඳපුදා ගෙන ආශිර්වාද ලබාගත්තේය.
එහිදී භික්ෂූන් වහන්සේ පිළිගනු ලැබුවේ ශ්රී දළදා මාලිගාවේ දියවඩන නිලමේ ප්රදීප් නිලංග දෑල මහතා විසිනි.
ඉන් අනතුරුව ශ්රී දළදා මාලිගය ඉදිපිටදී මහා සංඝරත්නය සෙත් පිරිත් සජ්ඣායනා කරමින් පාගමනේ වඩින භික්ෂූන් වහන්සේ ප්රමුඛ විදෙස් බෞද්ධ සැදැහැවතුන්ට ආශිර්වාද කළේය.
අද දිනයේදීත් සාම පාගමනේ වඩින වියට්නාම ජාතික පූජ්ය පඤ්ඤාකර හිමි ප්රමුඛ භික්ෂුන් වහන්සේ 13නම මෙන්ම ලෝකයේම අවධානය දිනාගත් අලෝකා සුනඛයා දැකබලා ගැනීම සඳහා විශාල පිරිසක් මාර්ග දෙපසට පැමිණ සිටිනු දක්නට ලැබුණි.
අදත් භික්ෂූන් වහන්සේ පැමිණෙන අතරමඟ බෞද්ධ සැදැහැවතුන් පාවඩ එළමින්, කෙසෙල් කොළ අතුරමින් , ජලය ඉසිමින් මාර්ගයේ ඉඩ සලසා දී තිබුණි.
අද දිනයේදි පාගමන ගමන් කළ කිලෝමීටර් 25 පුරාම බෞද්ධ සැදැහැවතුන් විශාල පිරිසක් මාර්ගය දෙපස රැස්ව සිටින ආකාරය දක්නට ලැබුණි.
මෙහිදී සාම පාගමනේ මතක සටහනක් ලෙස වියට්නාම ජාතික පූජ්ය පඤ්ඤාකර හිමි විසින් පහළ කඩුගන්නාවේදි පැලයක් ද රෝපණය කළේය.
Saru News
