බාල ගල් අඟුරුවලින් රජයට පාඩුවක් නෑ, පාඩුව සමාගමටයි – බිමල් රත්නායක

විදුලිබල අමාත්‍යාංශය විසින් ගල්අඟුරු ආනයනය කළ සමාගමෙන් රුපියල් කෝටි 915කට ආසන්න මුදල් ප්‍රමාණයක් රඳවාගෙන තිබෙන බව ප්‍රවාහන, මහාමාර්ග සහ නාගරික සංවර්ධන අමාත්‍ය බිමල් රත්නායක මහතා පවසයි.

ඒ හේතුවෙන් තත්ත්වයෙන් බාල ගල්අඟුරු සැපයීම හේතුවෙන් පාඩුවක් සිදුව ඇත්තේ, රජයට නොව අදාළ ගල්අඟුරු සැපයුම් සමාගමට බව අමාත්‍ය හෙතෙම පැවසීය.

බලශක්ති අමාත්‍ය කුමාර ජයකොඩි මහතා සිය අමාත්‍ය ධුරයෙන් ඉල්ලා අස්වීම සම්බන්ධයෙන් රජයේ ප්‍රවෘත්ති දෙපාර්තමේන්තුවේදී අද (17) පැවති විශේෂ මාධ්‍ය සාකච්ඡාවේදී විජිත හේරත් අමාත්‍යවරයා මේ බව පැවසීය.

මේ සම්බන්ධයෙන් වැඩිදුරටත් පැහැදිලි කිරීමක් කරමින් අමාත්‍යවරයා පැවසුවේ, නැව් 3කට අදාළව රුපියල් කෝටි 500කට අධික මුදලක් එම සමාගමට ගෙවීමට නියමිතව තිබුණද පරීක්ෂණ වාර්තා අසමත් වූ බැවින් එම ගෙවීම් සිදුනොකරන බවය.

එමෙන්ම අදාළ සමාගම සමග ඇතිකර ගත් කාර්යසාධන බැඳුම්කරය අනුව රුපියල් කෝටි 450ක මුදලක් පවතින බවත්, ඒ අනුව රුපියල් කෝටි 960ක් මෙරට සතුව පවතින බවද අමාත්‍යවරයා වැඩිදුරටත් පැහැදිලි කළේය.

මෙහිදී තවදුරටත් අදහස් දැක්වූ බිමල් රත්නායක අමාත්‍යවරයා,

“ආනයනය කළ ගල්අඟුරුවල උපදින බලශක්තියේ අඩුවක් තිබෙනවා. ඒකෙන් පාඩුවක් වෙනවා. නමුත් මහජන උපයෝගීතා කොමිසම ඉතා පැහැදිලිව කිව්වා, විදුලිබිල ගණනය කිරීමේදී කිසිසේත්ම ඒ පාඩුව කිසිසේත්ම විදුලිබිලට එකතු කරන්නේ නැහැ කියලා.

විදුලිබල අමාත්‍යාංශය විසින් ගල්අඟුරු ආනයනය කළ සමාගමෙන් ආසන්න වශයෙන් රුපියල් 915කට ආසන්න මුදල් ප්‍රමාණයක් රඳවගෙන තිබෙනවා. ගණනය කරලා තිබෙනවානේ බාල ගල්අඟුරු නිසා රුපියල් මිලියන 8,000 (කෝටි 800)ක් පාඩු වෙන්න පුළුවන් කියලා. හැබැයි අපි කෝටි 915ක් රඳවාගෙන තිබෙනවා. ඒ නිසා මේකේ කිසිම පාඩුවක් ජනතාවට වෙන්නේ නෑ.

විදුලිබිල ගණනය කරන්න බලය තිබෙන්නේ මහජන උපයෝගිතා කොමිසමට. ඔවුන් වාර්තා කරලා තිබෙනවා ඒක විදුලිබිලට කොහෙත්ම එකතු කරන්නේ නැහැ කියලා.

ඉතින් මේකෙන් පාඩුවක් වෙලා තිබෙනවා, හැබැයි පාඩුව වෙන්නේ සමාගමට. ඔවුන් දඩ ගෙවලා තියෙන්නේ. මේ පාඩුව ජනතාවටවත්, ආණ්ඩුවටවත් යන්නේ නෑ” යැයි පැවසීය.

තවදුරටත් අදහස් දැක්වූ බිමල් රත්නායක අමාත්‍යවරයා,

“සැපයුම්කරුවා ගල්අඟුරු පටවන වරාය ආසන්නයේ තිබෙන පරික්ෂණාගාරයෙන් අසමත් වුණොත් කිසිම දෙයක් ගෙවන්නේ නෑ. එතනින් පාස් වෙලා ආවොත් අපි 80%කට ආසන්න ප්‍රමාණයක් ගෙවිය යුතුයි. නමුත් සමහර ඒවා තියෙනවා අපි 80%ත් ගෙවලත් නෑ.

ඊට අමතරව සාමාන්‍යයෙන් ඉදිකිරීම් ක්ෂේත්‍රයේ පවා තියෙනවා Performance Bond එක කියලා එකක්. මේකට ඩොලර් මිලියන 15ක් තියෙනවා. රුපියල් වලින් කෝටි 450ක්. එකත් අපි ලඟ තියෙනවා. අපි ගෙවලා තියෙන්නේ 80%ට අඩුවෙන්. එතනත් කෝටි 500ක වගේ ප්‍රමාණයක් තියෙනවා ගෙවන්න තියෙන ගාන” යනුවෙන් පැවසීය.

එහිදී අදහස් දැක්වු බලශක්ති නියෝජ්‍ය අමාත්‍ය මුහම්මදු ඉල්යාස් මුහම්මදු අර්කම් මහතා පැවසුවේ, කිසිදු විටකදී මෙරටට ගෙනා ගල්අඟරු නැවත පටවා යැවීමට හැකියාවක් නොමැති බවත්, දඩ අයකරනු ලබන්නේ එම පාවිච්චි කිරීමත් සමග ඇති වන පාඩුවට බවත් සඳහන් කළේය.

“නැව් 3ක පාඩුව සහ Performance Bond (කාර්යසාධන බැඳුම්කරය) එකතු කරලා තමයි කෝටි 960ක් තියෙන්නේ. මෙම පරීක්ෂණවලින් ඒක තහවුරු වුණොත්. දැනට තහවුරු වුණු පරීක්ෂණ වාර්තා අනුව තමයි මේ මුදල ගණනය කරලා තියෙන්නේ”.

ප්‍රශ්නය – පාවිච්චි කරපු දේකට කොහොමද දඩ අය කරන්නේ?

“අපේ කාලේ විතරක් නෙමෙයි ගිය ආණ්ඩු කාලෙත් දඩ කරලා තියෙනවා. ඒ, අයකරලා තියෙන්නේ පාවිච්චි කරපු ගල්අඟුරුවලට. ඒ නිර්ණායකවලට එන්න බැරි වුණොත්, ආසන්න වශයෙන් පිරිවිතර 10ක් පමණ තියෙනවා.

ඒ තත්ත්වයන් අවේ නැති වුණෙත් දඩ අය කරනවා. ගල්අඟරු අපිට නැවත පටවලා යවන්න විදියක් නෑ” යනුවෙන් වැඩිදුරටත් පැවසීය.