නිමිත්ත –
“නිළි රැජිණ මාලිනී ෆොන්සේකා සමුගනී”
“විජය කුමාරතුංගගේ පොල්හේන්ගොඩ පිළිරුව බිමට පතිත වෙයි”
– එකම දවසේ ඇසුණු ප්‍රවෘත්ති දෙකක්.
සෙනෙහස වෙන කොහිද, ඒ ඔබේ හදවතා
මඳහස වරනැඟුණු මනරම් ම දෙතොලතා
අනිමිස ලෝචනය මත ලිහුණු ඇඳිවතා
නිදහස ඔව් එතැන, ඒ ඔබේ තුරුලතා
ගැටවර වියට පැනගන්නට වැට කඩුලු
පුදදුණි හැඟුම් දියමන්ති ද මිණි පබළු
විජයතු වෙන්න මදි වූවත් යස ඉසුරු
ව්කසිත කළේ වෙන කවුරුද ඇටමිදුළු
සෙනෙහස නමින් දැහැනට වැද පළඟ බැඳ
බැද්දේගමදි කොටු වූවත් වළැහෙකුට
ලොකු අතු දිගේ බඩගා මී කඩන්නට
යන ඌ දිහා බැලු ඉවසුම් කොහෙන් ලද?
ආකාසෙන් කුසුම් ගිලිහුණු අවාරේ
හෝ හෝ හඬින් ඇද හැලුණයි තුෂාරේ
කුණ්ඩලකේෂි සැතපෙන මිහි දුමාරේ
සත්තුකවරුන් මළගෙදරත් වකාරේ
සොඳුරු මතක තිබුණෙන් දෙණ තුළ වැතිර
අඳුරු ලෙනකි පාළුයි එක්ටැම් මැදුර
කොඳුර කොඳුර ඉද්දී අපි කවි අතර
බඹරු ඇවිත් හිටියා ඔබෙ මළ ගෙදර
~ මංජුල වෙඩිවර්ධන
2025 මැයි 25
Saru FM Media
