මහනුවර ශ්‍රී දළදා මාළිගාව වන්දනා කිරීම සඳහා පැමිණි බැතිමතුන් විසින් ආරක්ෂක අංශ වෙත භාර කරන ලද විශාල ප්‍රමාණයක ගමන් මලු තවමත් හිමිකරුවන් විසින් ආපසු ලබාගෙන නොමැති බව සිවිල් ආරක්ෂක දෙපාර්තමේන්තුව නිවේදනය කර ඇත. එම දෙපාර්තමේන්තුව විසින් වැඩිදුරටත් දන්වා සිටින්නේ මෙම ඉතිරි වූ ගමන් මලු ඉදිරි දින දෙක තුළ ආපසු ලබා ගැනීම සඳහා අවශ්‍ය සියලු පහසුකම් සලසා ඇති බවයි.
සිවිල් ආරක්ෂක දෙපාර්තමේන්තුවේ නිලධාරීන්ගේ සඳහන් කිරීම් අනුව, එම ගමන් මලු හැරුණු විට විශාල ප්‍රමාණයක පාවහන්ද හිමිකරුවන් විසින් ආපසු ලබාගෙන නොමැතිව ගොඩ ගැසී ඇත.
මෙම තත්ත්වය සම්බන්ධයෙන් අදාළ බලධාරීන් විසින් ගමන් මලු හා පාවහන් ආපසු ලබා ගැනීම සඳහා විශේෂ වැඩපිළිවෙලක් ක්‍රියාත්මක කර ඇත.
ආරක්ෂක අංශ විසින් නිකුත් කරන ලද නිවේදනය අනුව, තම ගමන් මලු හෝ පාවහන් ආපසු ලබා ගැනීමට අපේක්ෂා කරන බැතිමතුන්ට මහනුවර වැවේ ජෝයි බෝට්ටු සේවය අසල පිහිටි ගමන් මලු රඳවා තැබූ ස්ථානයට පැමිණීමට උපදෙස් ලබා දී ඇත. වැඩිදුර විමසීම් සඳහා දුරකථන අංක 0715803000, 0775311797 සහ 0710965890 ඔස්සේ සම්බන්ධ විය හැකි බවද දන්වා ඇත.
බලධාරීන් විසින් සියලු බැතිමතුන්ගෙන් ඉල්ලා සිටින්නේ ඉහත සඳහන් ස්ථානයට පැමිණ සිය දේපළ හඳුනාගෙන ආපසු ලබා ගන්නා ලෙසයි. නියමිත කාලය තුළ ආපසු ලබා නොගන්නා ගමන් මලු හා පාවහන් පිළිබඳව ඉදිරි ක්‍රියාමාර්ග ගැනීම සම්බන්ධයෙන් තවමත් තීරණයක් ගෙන නොමැති බවද වාර්තා වෙයි.
Saru FM Media
