මේ දවස්වල හැම අම්මා,තාත්තා කෙනෙක්ම කතා කරන්නේ අනේ..හරිම කම්මැලියි. ගෙදර ඉදලා එපා වෙනවා කියන පොදු අදහසයි.
තවත් සමහර අය මේ විදිහට කියනවා..කනවා..නිදියනවා..ටී.වී බලනවා…ආයෙත් කනවා නිදියනවා..ඒ වගේම මේ අයම තමයි පහුගිය කාලයේ අනේ ඉතිං කන්තෝරුවයි..ගෙදරයි..කිසිම වැඩක් කරගන්න වෙලාවක් නැහැ.කොටින්ම කියනවා නම් හුස්ම ගන්නවත් වෙලාවක් නැහැ කියල මැසවිල්ල කිව්වේ..එහෙම කියපු අයම දැන් කියන්නේ විවේකය වැඩියි..කම්මැලියි..කියන අදෝනාවයි.
ඒත් දැන් කාලයේ විවිධ රාජකාරි සමග යෙදී ආර්ථිකය ගලපා ගත් නිසා මේ විදිහට කිව්වත් අතීතයේ අපේ ජනජීවිතය බැදී තිබුනේ මේ රටාව මතයි.තාත්තා වත්ත,පිටිය සහ කුඹුරු ගොවිතැන් සමග ගැටුනම අම්මා දරු මල්ලන් බලා ගෙන තාත්තාගේ වැඩටත් සම්මාදම් වෙලා ජීවිතය ගෙව්වා.ඒ අය හොදට හුස්ම ගත්තා.ඒ වගේම විවේකයට වෛර කලෙත් නැහැ.
දැන් ඔන්න ඉස්සර හුස්ම ගන්නවත් වෙලාවක් නොතිබුන,දරුවන් සමග එකට ආහාරයවත් බුදින්න අවසර නොතිබුන දෙමව්පියන්ට හොඳම විවේකයක් ඇවිත්.අත්‍යවශ්‍ය රාජකාරිවල යෙදෙන පිරිස හැර බොහෝ උදවිය තමන්ගේ නිවෙස්වල.ස්වයං ආරක්ෂාව වෙනුවෙන් පිටස්තර තැන්වල ගමන් බිමන් සහ චාරිකාවනුත් නැවතී ඉතාම සරල විදිහට දරුවන් සමග කාලය ගෙවන්න දැන් ඔබට කිසිම බාධාවක් නැහැ.එහෙමනම් මේ කාලය ගෙවන්නේ කොහොමද…?
අවුරුදු මානසිකත්වයෙන් නම් අපට මේ තිබෙන වසංගත රෝග තත්වය නිසා ටිකක් දුරස් වෙන්න වේවි.ඒ වුනත් කඩිමුඩියේ සිංහල අලුත් අවුරුද්ද නිසා ගෙවල් දොරවල් අස් පස් කරන සහ පිරිසිදු කරන අයට දැන් ඒ වෙනුවෙන් විවේකය ලැබිලා තිබෙනවා.වෙනදා අම්මා විතරක් තනියම කරන ලද මේ කටයුතු වෙනුවෙන් දරුවන්ගේත් සහයෝගය ලබා ගන්න පුලුවනි.තාත්තාගේ වුනත් උදව් කබා ගන්න මේ වගේ කාලයක් නම් නැවත ලැබෙන්නේ නැහැ.
අපේ අම්මලාට අල්මාරිය අස් කර ගැනීමටත් ඇත්තටම වෙලාවක් ඕන.දරුවන්ගේ අදින්න බැරි ඇදුම් ඉවත් කරන්න.ඒවා හදා ගෙන නැවත පාවිච්චි කරන්න පුලුවන් නම් ඒවා අදාල මිම්මට අනුව සකස් කිරීමට මේ විවේකය හොඳින්ම යොදා ගන්න පුලුවනි.
පාසල් යන්නයි..පංති යන්නයි නිසා කුස්සිය පැත්තට එන්නවත් වෙලාවක් නැති දියණිය දැන් මුළුතැන්ගෙට ගෙන්වා ගන්න හොඳම කාලය ඇවිත්.දුවට විතරක් නොවෙයි,පුතාටත් කුස්සිය නරක නැහැ.ඒ නිසා අම්මා උයන විට අත්උදව් ගන්න මේ කාලයේ දරුවන් සම්බන්ධ කර ගන්න පුලුවනි.ඒ වගේම අමුද්‍රව්‍ය පිරිමහගෙන පාවිච්චි කරන්න අවශ මේ කාලයේදී විවිධ ආහාර අත්හදා බැලුවේ නැතැත් කමක් නැහැ.නමුත් වේලට හදන ආහාර රටාවත් දැන් වෙනස් කරන්න පුලුවනි.ඇයි ඉස්සර කිව්වේ වෙලාවක් නැහැ කියලනේ.දැන් වෙලාව තිබෙනවා.ආප්ප..තෝසේ..පිට්ටු සහ ඉදිආප්ප වගේ එදා වෙලාව නැහැ යන ලේබලයෙන් ඈත් කරපු වෙනස් දේවල් දැන් හදන්න පුලුවනි.මේ ආහාර නිසා එළවලු ,මස්,මාළු ගැන තිබෙන අඩුපාඩුත් මැකෙනවා.තවත් පැත්තකින් ඒකත් ලොකු දෙයක් නොවෙයිද..?
බොහෝ දෙනෙක් එලවලු වගේම මල් පැල වගාවේ පටන්ගත්ත උනන්දුව නොදැනීම බාල වෙනවා.ඒකට හේතුව විවේකය නැති වීම බව ඇත්ත.ඉදහිට ලැබෙන විවේකයේදී මේවා හැදුවත් එයින් පසුව සාත්තු කරන්න වෙලාවක් නැහැ.දැන් අතපසුවුන මේ වැඩකටයුතු පටන් ගන්න.ඒ වගේම වත්ත පිටියේ එලවලුවක් තිබුනොත් ලැබෙන වාසිය මේ දවස්වල නම් හොදටෝම තේරෙන්නත් ඇති නේද..?ඉතින් අනේ කම්මැලියි නොකියා ඉවත දමන පොහොර උරයක හෝ වෙනත් මල්පෝච්චි හෝ ගැලපෙන දෙයක එළවලුවක් වගා කරන්න ඔන්න අවසර තිබෙනවා.
දරුවා උපන් වෙලාවේ ලැබුන රෙදි සේරම අල්මාරියේ.දැන් පැටියා ඉස්කෝලෙත් යනවා.මහන්න වෙලාවක් තිබුනේ නැතුව රෙදි දැන් මදිත් වෙලා.එහෙමනම් දැන් පටන් ගන්න.ඒ විතරක් නොවෙයි.කොට්ට උරයක් දෙකක් මලක් මහලා ලස්සන කරලා හැඩ බලන්නත් බැරි කමක් නැහැ.
ඔබේ පැටියාගේ ඉගෙණුම් කටයුතුවල බොහොම අඩුපාඩු ඔබ දැන සිටියත් ඒ වෙනුවෙන් උදව් වෙන්න මෙච්චර කාලයක්ම වෙලාවක් තිබුනේ නැහැ.එය බොහොම සාධාරණයි.ඒ වුනත් දැන් හොදම වෙලාව ඇවිත්.අකුරු ගලපලා කියවන්න අපහසු පැටියාට පින්තූර ඇසුරු කර ගෙන යමක් කියවන්න උදව් වෙන්න.ඉස්පිලි ,පාපිලි මග හරින පැටියාට බොහොම සෙමින් ඒ වෙනුවෙන් කාලය අරගෙන කියා දෙන්න දැන් වෙලාව තියෙනවා.දවසට පුංචි වෙලාවක් අරගෙන හැමදාම මේ උදව් ලබා දුන්නාම නැවත පාසල පටන් ගනිද්දී පොඩ්ඩාගේ ඉගෙණුම් අඩු පාඩු නොදැනීම මග හැරේවි.
Saru FM Media
