ඕස්ට්‍රේලියාවේ මෙල්බර්න් ගුවන්තොටුපළේ ශ්‍රී ලංකන් ගුවන් සේවය සඳහා බිම් මෙහෙවර සේවා සැපයීමේ කොන්ත්‍රාත්තුව ඕස්ට්‍රේලියානු ඩොලර් මිලියන 13කට අධික මුදලකට ඩ්නාටා එයාපෝට් සර්විසස් ප්‍රයිවට් ලිමිටඩ් සමාගමට පිරිනැමීමට අමාත්‍ය මණ්ඩලය අනුමැතිය ලබා දී තිබේ.
මෙල්බර්න් ගුවන්තොටුපළේ බිම් මෙහෙවර සේවා සැපයීම සඳහා දැනට පවතින කොන්ත්‍රාත්තුව 2025 ජූනි 30 වන දිනෙන් අවසන් වීමට නියමිතය. මේ හේතුවෙන් ඉදිරි වසර තුනක කාලයක් සඳහා නව කොන්ත්‍රාත්තුවක් පිරිනැමීමට සීමිත ජාත්‍යන්තර තරගකාරී ලංසු කැඳවීමක් සිදු කර තිබිණි.
ලංසු කැඳවීමෙන් අනතුරුව ඉදිරිපත් වූ ලංසු හතරක් සමාලෝචනය කිරීමෙන් පසු, ඉහළ මට්ටමේ ස්ථාවර ප්‍රසම්පාදන කමිටුව විසින් ඩ්නාටා එයාපෝට් සර්විසස් ප්‍රයිවට් ලිමිටඩ් සමාගමට එම කොන්ත්‍රාත්තුව ලබා දීමට නිර්දේශ කර ඇත.
මෙම කොන්ත්‍රාත්තුව යටතේ ගුවන් මගීන්ට අදාළ සේවා, භූමි සේවා සැපයීම් සහ භාණ්ඩ ගබඩා හසුරවාලීමේ කටයුතු ඇතුළත් වන අතර, සමස්ත ඇස්තමේන්තුගත පිරිවැය ඕස්ට්‍රේලියානු ඩොලර් 13,124,402 ක් ලෙස දක්වා තිබේ.
මුදල්, ක්‍රම සම්පාදන සහ ආර්ථික සංවර්ධන අමාත්‍ය වශයෙන් ජනාධිපති විසින් ඉදිරිපත් කළ යෝජනාව අනුව අමාත්‍ය මණ්ඩලය විසින් මෙම කොන්ත්‍රාත්තුව පිරිනැමීමට අවසර ලබා දී ඇත.
ශ්‍රී ලංකන් ගුවන් සේවයේ ඕස්ට්‍රේලියානු ගමනාන්ත අතර මෙල්බර්න් ගුවන්තොටුපළ ප්‍රධාන තැනක් ගන්නා අතර, මෙම කොන්ත්‍රාත්තුව හරහා එහි මෙහෙයුම් කටයුතු තවදුරටත් කාර්යක්ෂමව පවත්වාගෙන යාමට අපේක්ෂා කෙරේ.
Saru FM Media
