ශ්‍රී ලංකා පොදුජන පෙරමුණේ හිටපු පාර්ලිමේන්තු මන්ත්‍රී මිලාන් ජයතිලක මහතා අල්ලස් හෝ දූෂණ චෝදනා විමර්ශන කොමිසම (CIABOC) විසින් සිදු කරන විමර්ශනයකට අදාළව අත්අඩංගුවට ගෙන ඇති බව වාර්තා වේ.
මිලාන් ජයතිලක නඩු කිහිපයකම චූදිතයකු වන අතර, ඔහුගේ දේශපාලන ජීවිතය මෑත කාලීනව බොහෝ
අභියෝගයන්ට මුහුණ දී තිබේ. 2022 මැයි 17 වන දින, ගාලුමුවදොර සාමකාමී උද්ඝෝෂණයට එල්ල කරන ලද ප්‍රහාරයට සම්බන්ධ බවට චෝදනා ලැබ අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගනු ලැබූවා. එම සිදුවීමට අදාළව, ඔහු කොටුව මහේස්ත්‍රාත් අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාරගත කරනු ලැබුවා.
මීට අමතරව, 2023 වසරේදී අල්ලස් හෝ දූෂණ චෝදනා විමර්ශන කොමිසම මගින් කොළඹ මහාධිකරණයේ ඔහුට එරෙහිව තවත් නඩුවක් ගොනු කරන ලදී. එම නඩුව 2012 වසරේදී දොම්පේ ප්‍රාදේශීය සභාවේ සභාපති ලෙස කටයුතු කරමින් සිටියදී ගල් කොරියක බලපත්‍රයක් නිකුත් කිරීම සඳහා රුපියල් ලක්ෂ 7ක අල්ලසක් ලබා ගත් බවට එල්ල වූ චෝදනාවකට අදාළ වූ අතර, එම නඩුවේ සහ චෝදිතයෙකු ලෙස දොම්පේ ප්‍රාදේශීය සභාවේ හිටපු සභිකයෙකු වූ අජිත් සිසිර කුමාර යන අය ද නම් කොට තිබුණි.
වත්මන් අත්අඩංගුවට ගැනීම පිළිබඳව අල්ලස් හෝ දූෂණ චෝදනා විමර්ශන කොමිසමේ නිලධාරීන් මාධ්‍ය වෙත සවිස්තරාත්මක ප්‍රකාශයක් තවමත් සිදු කර නොමැති නමුත්, මෙම විමර්ශනය ඔහුට එරෙහිව පවතින පෙර චෝදනා සමඟ සම්බන්ධ විය හැකි බවට විශ්ලේෂකයින් අදහස් දක්වති.
Saru FM Media
