දුව එන්න එන්නම මහත් වෙනවා වගේ .. කෑම ටිකක් අඩු කරන්න ඕනේ
ඔය හැදෙන වයසට ඔහොම තමයි .. තාම අවුරුදු 13යි. කෑම පාලනය කරන්න පුළුවන්ද? දරුවට ආස කෑමක් බීමක් කන්න බොන්න දෙන්න
දියණියගේ මහත වැඩිවීම ගැන අම්මා කලබල වුවත් තාත්තා දැරුවේ එවැනි අදහසක්. ආච්චි අම්මා පැවසුවේ ගෑනු දරුවෙක් පිරිලා ඉද්දි හරි හැඩයි කියාය.
ඒ අදහස් කෙසේ වෙතත් නව යොවුන් වියේ මුල් අවධියේ සිටි මේ දියණිය ඇයගේ ගෙල, අත් යට, දෙපා අතර සම කලු වීම සහ ඝනකම් වීම ගැන සිටියේ කණස්සල්ලයකිනි. අම්මාගේ ඇයට ලැබුණු උපදෙස වූයේ හොඳින් කුණු අතුල්ලා පිරිසිදු කළ යුතු බවයි. දිනෙන් දින ගත වෙද්දී මුහුණේ කුරුලෑ ඇතිවීම, නිකට ප්‍රදේශයේ රෝම වැඩීම නිසා ඇය මානසිකව ඉතා අසරණ තත්ත්වයකට පත් වූයේ පාසැලේ මිතුරියන්ගේ උසුළු විසුළුවලට ලක් වීමට සිදු වූ නිසාමය. අවසානයේ ඇය තමාට චර්ම රෝග පිළිබඳ වෛද්‍යවරයෙක් හමු විය යුතු බව මවට පැවසීය.
වෛද්‍යවරිය ඇයගේ උස සහ බර මැන බලා ශරීර ස්කන්ධ දර්ශකය ගණනය කර ඇය අධි බර තත්ත්වයේ සිටින බවත් ඇගේ ඔසප් චක්‍රයේ අක්‍රමවත් බව, කුරුලෑ, ගෙල කළු වීම සහ උඩු තොලේ රෝම යන සියල්ලම බර මට්ටම සමග බැඳී ඇති වව පැවසුවා. පියා දියවැඩියා රෝගය සහිත අයෙක් නිසා ඇයගේද රුධිර පරීක්ෂණ කිපයක් සිදු කළා. ඒවායින් තහවුරු වූයේ ඇ පූර්ව දියවැඩියා තත්ත්වයේ සිටින බවයි. ඊට අමතරව අක්මාවේ තෙල් තැන්පත් වීමක් ඇති බවට ද සැකයක් වෛද්‍යවරයාට පැණ නැගුණ නිසා ඒ සඳහා ඇයට ස්කෑන් පරීක්ෂණයකට යොමු කෙරුණා. ඇය පෝෂණවේදියෙකු වෙත යොමු කෙරුණේ දැනට ලබාදුන් ප්‍රතිකාර වලට අමතරව බර පාලනය කරගැනීමටත්, වඩා ක්‍රියාශීලී ජීවන රටාවකට යොමු වීමට අවශ්‍ය උපදෙස් ලබාගැනීම සඳහායි.
අධි බරට එකම හේතුව ආරය හෝ වැඩියෙන් කෑම නොවන අතර සමහරවිට හෝමෝන ක්‍රියාකාරිත්වයේ ගැටළුවක් එයට හේතුවිය හැකියි.
අධි බර සමගින් ඔබ පසුපස එන කරදර
අද වන විට ආහාර පුරුදු වල වෙනස්කම්, ආර්ථික තත්ත්වය සහ ක්‍රියාශීලී බවින් අඩු ජීවන රටාව යන හේතු මත අධි බර හෙවත් ස්ථුල භාවය වැඩිහිටියන් මෙන්ම දරුවන් අතරත් එකසේ දැකිය හැකියි. ස්ථුල බවත් සමග දියවැඩියාව, අධි රුධිර පීඩනය, කොලෙස්ටරෝල් මට්ටම ඉහළ යාම, හෘද රෝග, ආඝාතය වැනි තත්ත්වයන් අත්වැල් බැඳගෙන අප වෙත එයි.
ඔබේ දරුවාට හෝ ඔබට මෙවැනි ගැටලු ඇත්නම් කළ යුත්තේ මොනවාද?
චර්ම රෝග විශේෂඥ වෛද්‍ය ඉන්දිරා කහවිට
Saru FM Media
