ශ්‍රී ජයවර්ධනපුර විශ්වවිද්‍යාලයේ තාක්‍ෂණ පීඨයේ දෙවැනි වසර සිසුවකුට පහරදීමේ සිද්ධියක් සම්බන්ධයෙන් එම පීඨයේ දෙවැනි හා තුන්වැනි වසරවල සිසුන් හයදෙනකුට තාවකාලික පන්ති තහනමක් පනවා විශ්වවිද්‍යාල පරිශ්‍රයෙන් ඉවත් කර ඇති බව විශ්වවිද්‍යාලයේ උපකුලපති ජ්‍යෙෂ්ඨ මහාචාර්ය පද්මලාල් එම්. මානගේ මහතා ප්‍රකාශ කර සිටියි.
තාක්‍ෂණ පීඨයේ දෙවැනි හා තුන්වැනි වසරවල සිසුන් 25 දෙනෙකුගෙන් පමණ සමන්විත කණ්ඩායමක් අදාළ සිසුවාගේ පිටිපන ප්‍රදේශයේ පිහිටි පෞද්ගලික නවාතැනට (බෝඩිමට) පසුගිය අප්‍රේල් 29 වැනිදා ගොස් හ
ෙල්මට් ආදී උපකරණ මගින් පහර දුන් බවට පැමිණිල්ලක් ලැබී ඇති බව උපකුලපතිවරයා සඳහන් කළේය. එම පහරදීමට ලක්වූ සිසුවා, ප්‍රහාරය එල්ල කළ ජ්‍යෙෂ්ඨ සිසුන් හයදෙනෙකු හඳුනාගෙන ඇති බවද ඔහු වැඩිදුරටත් පැවසීය.
ඒ අනුව, විශ්වවිද්‍යාලයේ විනය කමිටුව කැඳවා, අදාළ සිසුන් හයදෙනා පසුගිය මැයි 1 වැනිදා එම කමිටුව හමුවට කැඳවන ලද බවත්, සිද්ධිය පිළිබඳව නීත්‍යානුකූල ක්‍රමවේදයට අනුව පරීක්ෂණයක් පවත්වා අවසන් තීරණයක් ගන්නා තෙක් ඔවුන්ට තාවකාලික පන්ති තහනමක් පනවා ඇති බවත් මහාචාර්ය මානගේ මහතා පැහැදිලි කළේය.
පහරදීමට ලක්වූ සිසුවා, නවකවදයට විරෝධය පළ කරන කණ්ඩායමේ සාමාජිකයෙකු බවත්, ඔහු මෙම සිද්ධිය සම්බන්ධයෙන් හෝමාගම පොලිසියට පැමිණිල්ලක් ඉදිරිපත් කර ඇති බවත් උපකුලපතිවරයා සඳහන් කළේය. පොලිසිය මේ වන විටත් අදාළ සිද්ධිය සම්බන්ධයෙන් විධිමත් පරීක්ෂණයක් ආරම්භ කර ඇති බවද ඔහු තහවුරු කළේය.
තවද, පන්ති තහනමට ලක් කර ඇති සිසුන් හයදෙනා සම්බන්ධයෙන් සිවිල් නීතිය අනුව කටයුතු කරන ලෙස විශ්වවිද්‍යාල පරිපාලනය පොලිසියෙන් ඉල්ලීමක් කර ඇති බවත්,
එම සිසුන් අත්අඩංගුවට ගැනීම සඳහා පොලිසිය අවශ්‍ය පියවර ගනිමින් සිටින බවත් මහාචාර්ය මානගේ මහතා අවසානයේ පැවසීය.
මෙම සිද්ධිය විශ්වවිද්‍යාල ප්‍රජාව තුළ දැඩි කතාබහකට ලක්ව ඇති අතර, නවකවදය තුරන් කිරීම සඳහා මෙවැනි ක්‍රියාමාර්ග වැදගත් බව අධ්‍යාපන ක්ෂේත්‍රයේ විශේෂඥයෝ පෙන්වා දෙති. තවද, විශ්වවිද්‍යාල පරිසරය තුළ සිසුන්ගේ ආරක්ෂාව තහවුරු කිරීම සඳහා මෙවැනි සිදුවීම් සම්බන්ධයෙන් දැඩි පියවර ගැනීම අත්‍යවශ්‍ය බවත් ඔවුන් අවධාරණය කරති.
Saru FM Media
