අපරාධ පරීක්ෂණ දෙපාර්තමේන්තුව (CID) හිටපු රාජ්‍ය අමාත්‍ය සිවනේසතුරෙයි චන්ද්‍රකාන්තන් නොහොත් ‘පිල්ලෙයාන්’ වැඩිදුර ප්‍රශ්න කිරීම සඳහා දින 90ක රඳවා ගැනීමේ නියෝගයක් ලබාගෙන ඇති බව පොලිසිය සඳහන් කරයි.
හිටපු රාජ්‍ය අමාත්‍යවරයා අත් අඩංගුවට ගෙන ඇත්තේ අපරාධ පරීක්ෂණ දෙපාර්තමේන්තුව මගින් සිදු කරනු ලබන විමර්ශනයකට අදාළව අප්‍රේල් 8 වැනි දින ය.
ත්‍රස්තවාදය වැළැක්වීමේ පනත යටතේ හිටපු රාජ්‍ය අමාත්‍ය සිවනේසතුරෙයි චන්ද්‍රකාන්තන් නොහොත් පිල්ලෙයාන් දින 90ක් රඳවාගෙන ප්‍රශ්න කිරීමට අපරාධ පරීක්ෂණ දෙපාර්තමේන්තුවට අවසර දී තිබේ.
පිල්ලෙයාන් අත් අඩංගුවට ගනු ලැබුවේ අප්‍රේල් 8 වැනි දින රාත්‍රියේ මඩකලපුවේ පිහිටි ඔහුගේ කාර්යාලයේදී ය. මෙම අත් අඩංගුවට ගැනීම සිදු කර ඇත්තේ නැගෙනහිර විශ්වවිද්‍යාලයේ හිටපු උපකුලපතිවරයකු වූ මහාචාර්ය සිවසුබ්‍රමනියම් රවීන්ද්‍රනාත් මහතා පැහැරගෙන ගොස් අතුරුදන් කිරීම සම්බන්ධයෙන් සිදු කෙරෙන විමර්ශනයකට අදාළව ය.
විමර්ශන වාර්තා අනුව, එම මහාචාර්යවරයා පැහැරගෙන ගොස් තිබුණේ 2006 දෙසැම්බර් 15 වන දින කොළඹ 07 විද්‍යා මන්දිරයේ පැවති උත්සවයකට සහභාගී වී සිටියදී ය. ඔහු පිල්ලෙයාන්ගේ දේශපාලන විරුද්ධවාදියෙකු ලෙස සැලකුණ අතර ඔහු අතුරුදන්වීම සිදුවූ වකවානුවේ මරණ තර්ජන ලැබී තිබුණි.
කෙසේ වෙතත් පිල්ලෙයාන් එවක රාජපක්ෂ රජය සමග සම්බන්ධවී කොටි සංවිධානයට විරුද්ධව ඔත්තු සපයමින් රජයේ හිත දිනාගෙන සිටි අතර ඔහුට එරෙහි බොහෝ නීතිමය ක්‍රියාමාර්ග ක්‍රියාත්මක නොවුණි.
මෙම සිදුවීමට අදාළව පිල්ලෙයාන් අත් අඩංගුවට ගැනීම සිදු කර ඇත්තේ වසර 18කට පසුව ය, එය විශේෂ සිදුවීමක් ලෙස සැලකිය හැකිය.
මහාචාර්ය රවීන්ද්‍රනාත් 2006 දෙසැම්බර් 15 වන දින කොළඹ ඉහළ ආරක්ෂක කලාපයක පැවති සම්මන්ත්‍රණයකට සහභාගී වීමෙන් පසු අතුරුදහන් විය.
ඔහුව පැහැරගැනීමකට ලක් කළ බවට සාක්ෂි ලැබී තිබිණි. වාර්තා වලට අනුව, ඔහු පිල්ලයන් එවකට නායකත්වය දුන් දෙමළ මහජන විමුක්ති පුලිකල් (TMVP) වැනි අර්ධ මිලිටරි සංවිධානවලට සම්බන්ධ සන්නද්ධ කණ්ඩායම්වලින් තර්ජන මත සිටි අයෙකි. යුද්ධය අවසන් නොවූ මෙම කාලයේ කොටි සංවිධානයට විරුද්ධව මෙම කණ්ඩායම් ආරක්ෂක හමුදාවල නිහඬ සහයෝගය ඇතිව ක්‍රියාත්මක වූ බවට චෝදනා තිබුණි.
මෙම අතුරුදහන් වීමට පෙර, TMVP සමඟ සමීපව සම්බන්ධ කරුණා කණ්ඩායමේ සාමාජිකයින් බවට සැක කරන පිරිසක් විසින් නැගෙනහිර විශ්වවිද්‍යාලයේ කලා පීඨයේ පීඨාධිපති ආචාර්ය කේ. බාලසුකුමාර් පැහැරගෙන යාමෙන් පසු, මහාචාර්ය රවීන්ද්‍රනාත්ට ද තර්ජන එල්ල වී තිබිණි.
මහාචාර්ය රවීන්ද්‍රනාත්ගේ අතුරුදහන් වීමට පිල්ලයන්ගේ සෘජු සම්බන්ධතාවය තහවුරු කර නොතිබුණද, එම කාලපරිච්ඡේදයේදී TMVP හි ඔහුගේ නායකත්ව භූමිකාව හේතුවෙන් මෙම සිද්ධියට ඔහුගේ විය හැකි සම්බන්ධතාවය පිළිබඳව ප්‍රශ්න මතු වේ. තවත් අර්ධ මිලිටරි නායකයෙකු වන විනයගමූර්ති මුරලිදරන් (කරුණා අම්මාන්) ද මෙම නඩුව සම්බන්ධයෙන් CID විසින් මින් ඉහත ප්‍රශ්න කර ඇත.
නමුත් රාජපක්ෂ හිතවාදීන් වූ මේ අයට එරෙහිව නීතිය ඉන් එහා ක්‍රියාත්මක නොවිණි.
මඩකලපුවේදී අත් අඩංගුවට ගෙන කොළඹ අපරාධ පරීක්ෂණ දෙපාර්තමේන්තු මූලස්ථානයට රැගෙන ආ පිල්ලෙයාන්ව මුලින් පැය 72ක කාලයක් රඳවාගෙන ප්‍රශ්න කිරීම් සිදු කර තිබේ.
දැන් ලැබී ඇති දින 90ක රඳවා ගැනීමේ නියෝගය මගින් අපරාධ පරීක්ෂණ දෙපාර්තමේන්තුවට වැඩිදුර විමර්ශන සිදු කිරීමට හැකියාව ලැබෙනු ඇත. මෙම කාලය තුළ සිදු කෙරෙන ප්‍රශ්න කිරීම් හරහා මහාචාර්ය රවීන්ද්‍රනාත් මහතාගේ පැහැරගෙන යාම සම්බන්ධ වැදගත් තොරතුරු අනාවරණය වීමට ඉඩ ඇති බව විමර්ශන නිලධාරීන් අපේක්ෂා කරන බව වාර්තා වේ.
මෙම සිද්ධිය සම්බන්ධයෙන් වැඩිදුර විමර්ශන සිදු කෙරෙමින් පවතින අතර, අපරාධ පරීක්ෂණ දෙපාර්තමේන්තුව මෙම විමර්ශනය පිළිබඳ වැඩිදුර විස්තර ලබා දීමට නියමිතය.
Saru FM Media
