ශ්‍රී ලංකා විදේශ සේවා නියුක්ති කාර්යාංශය විසින් නිකුත් කරන ලද නිවේදනයකට අනුව, ඊශ්‍රායල් රැකියා වැඩසටහන යටතේ ප්‍රථම වතාවට හෝටල් ක්ෂේත්‍රයේ රැකියා සඳහා ශ්‍රී ලාංකික තරුණ තරුණියන් 855 දෙනෙකු ලොතරැයි ක්‍රමය මගින් තෝරාගෙන ඇත.
කාර්යාංශය විසින් මුලින්ම ඊශ්‍රායලයේ FIBA (ෆිබා) ආයතනය වෙත ශ්‍රී ලාංකික තරුණ තරුණියන් 905 දෙනෙකුගේ නාම ලේඛනයක් යොමු කර ඇති අතර, එයින් 855 දෙනෙකු ලොතරැයි ක්‍රමය හරහා තෝරාගැනීමට එම ආයතනය සමත්ව ඇත.
මෙම තෝරාගැනීම සිදු කර ඇත්තේ ඊශ්‍රායලයේ හෝටල් ගෘහ පාලන රැකියා සඳහාය.
විදේශ සේවා නියුක්ති කාර්යාංශයේ ඉහළ නිලධාරියෙකු ‘මව්බිම’ පුවත්පතට සඳහන් කර ඇත්තේ, “ඊශ්‍රායලයට විවිධ රටවලින් රැකියා සඳහා ශ්‍රමිකයින් බඳවා ගැනීමේදී, ඊශ්‍රායල් රජය යටතේ ක්‍රියාත්මක වන FIBA (ෆිබා) නමැති ආයතනයක් මෙම කටයුතු සිදු කරන බවයි. මෙම ආයතනය ඊශ්‍රායල් රජයේම ආයතනයක් වන අතර, ශ්‍රමිකයන් තෝරා ගැනීමේ වගකීම පවරා ඇත්තේ ඔවුන්ටය.
ශ්‍රී ලංකාව විසින් අපේක්ෂකයින්ගේ නාම ලේඛනයක් FIBA ආයතනය වෙත යැවූ පසු,
එම ආයතනය විසින් ස්වයංක්‍රීය ලොතරැයි ක්‍රමයක් හරහා තෝරාගැනීම් සිදු කරනු ලබයි. මෙම වතාවේ තෝරාගත් පිරිසද මෙම ක්‍රමවේදය යටතේ තෝරාගෙන ඇත. ඉතිරි පිරිස ද පසුව එම ක්‍රමයටම තෝරා ගැනීමට නියමිතය. පුහුණුව ලැබූ බොහෝ අපේක්ෂකයින් මෙම ක්‍රමය යටතේ තෝරාගනු ලැබෙන අතර, මෙම ක්‍රියාවලියට කිසිවෙකුට බලපෑම් කිරීමට නොහැකි වේ. මන්ද එය සම්පූර්ණයෙන්ම ස්වයංක්‍රීය පද්ධතියක් මගින් සිදු කෙරෙන බැවිනි.”
හෝටල් ගෘහ පාලනය සම්බන්ධ රැකියා සඳහා පිටත්වන පළමු කණ්ඩායමට තරුණ තරුණියන් 103 දෙනෙකු ඇතුළත් වී ඇති අතර, ඔවුන් ජුලි මස 7 වන දින ඊශ්‍රායලය බලා පිටත්ව ගොස් ඇති බව විදේශ සේවා නියුක්ති කාර්යාංශය පවසයි. ලොතරැයි ක්‍රමය යටතේ තෝරාගත් 855 දෙනා අතරින් පළමු කණ්ඩායම ලෙස මෙම පිරිස පිටත්ව ගොස් ඇත. මෙම පිරිස අතර කාන්තාවන් 10 දෙනෙකු ද සිටින බව කාර්යාංශය තවදුරටත් පෙන්වා දී ඇත.
දෙවැනි ලොතරැයි ඇදීම සඳහා තවත් 200 දෙනෙකුගෙන් සමන්විත කණ්ඩායමක් ද යොමු කර ඇති බවත්, මෙම පිරිස ඉදිරියේදී තෝරාගැනීමට නියමිත බවත් විදේශ සේවා නියුක්ති කාර්යාංශය පවසයි.
මීට අමතරව, ඊශ්‍රායල් හෝටල් ගෘහ පාලනයට අදාළ පුහුණුව ලබන තවත් 28 දෙනෙකු ඉතා ඉක්මනින් ඊශ්‍රායලය බලා පිටත්ව යෑමට නියමිතව සිටින බවද එම කාර්යාංශය වැඩිදුරටත් සඳහන් කරයි.
මෙම වැඩසටහන ශ්‍රී ලාංකික තරුණ තරුණියන්ට විදේශ රැකියා අවස්ථා ලබා දීමේ රජයේ වැඩපිළිවෙළේ කොටසක් ලෙස ක්‍රියාත්මක කෙරෙන අතර, මෙම රැකියා අවස්ථා හරහා ශ්‍රමිකයින්ට සාධාරණ වැටුප් හා සුරක්ෂිත සේවා තත්ත්වයන් සහතික කිරීම සඳහා ද්විපාර්ශ්වික ගිවිසුම් යටතේ මෙම වැඩසටහන ක්‍රියාත්මක කෙරේ.
Saru FM Media
