‘මව්රට’ ’හාට්’ එකත් එක්ක එකතු වෙලා ඉන්න ඔබට අද අපි හඳුන්වා දෙන්න යන්නේ සුවිශේෂ චරිතයක්. ඔහු නමින් සචින්ත රන්දීප පෙරේරා. ඒ නම ඔබට අහලා පුරුදු නැති වුණාට ‘නාඩගම්කාරයෝ’ ටෙලියේ පොඩි හාමුදුරුවන් කිව්ව සැණින් ඔහුව ඔබේ මතකයට නැගේවි. සචින්ද මේ වෙද්දී පොඩි ටෙලිනාට්‍ය කීපයකම හාමුදුරුවන්ගේ චරිතය රඟපාලා තියෙනවා. ඔහු පොඩි හාමුදුරුවන්ගේ චරිතයටම කොටුවෙලාද? එහෙම නැත්නම් ඉදිරියේදී ඔහුගේ චරිත නිරූපණය වෙනත් මානයකට යොමුවේවිද? මේ, අපි සචින්තත් එක්ක ඒ ගැන කරපු කතාබහ. Sri Lanka Latest News
සචින්ත, ඔබේ ‘තිලෝශාක්‍ය හිමි’ ගීතයට ලැබෙන ප්‍රතිචාර කොහොමද?
මේ දවස්වල ‘තිලෝශාක්‍ය හිමි’ ගීතය විවිධ මාධ්‍ය හරහා ප්‍රචාරය වෙනවා. ඒ අතර පසුගිය වෙසක් සතිය නිසා තොරණ, දන්සල්වලත් ඒ ගීතය වැඩි වශයෙන් ප්‍රචාරය වුණා.
‘නාඩගම්කාරයෝ’ ටෙලිනාට්‍යයෙන් පසුව එක දිගටම ඔබ පොඩි හාමුදුරුවන්ගේ චරිතයට කොටු වුණා නේද?
‘නාඩගම්කාරයෝ’ ටෙලිනාට්‍යයේ පොඩි හාමුදුරුවෝ විදියට තමයි මාව හැම දෙනාම හඳුනාගත්තේ. මම හිතුවේ නැහැ මේ තරම් ප්‍රේක්ෂක ප්‍රතිචාරයක් මට ලැබෙයි කියලා. පස්සේ ඉතින් මට රඟපාන්න අවස්ථාව ලැබුණේ පොඩි හාමුදුරුවන්ගේ චරිතය තමයි. තවමත් ආරාධනා එන්නේ පොඩි හාමුදුරුවන්ගේ චරිතය වෙනුවෙන්මයි.
මේ දවස්වල ඉස්කෝලේ දකින පොඩි හාමුදුරුවෝ චරිතය තුළ අපි වෙනසක් දකිනවා?
ඔව් ඒක ඇත්ත. හාමුදුරුවන්ගේ චරිතවලට මාව කොටුවුණත් ඒ හැම චරිතයක්ම එකිනෙකට වෙනස්. ඉස්කෝලේ ටෙලිනාට්‍යයේ සුනීත පොඩි හාමුදුරුවෝ ටිකක් සැරයි. ටිකක් දේශපාලනයට නැඹුරු චරිතයක්. මම මේ හැම චරිතයක්ම රඟපාන්නේ ගොඩක් ආශාවෙන්.
සචින්තගේ සැබෑ ස්වරූපය වෙනසක් කළොත් මොකද?
අවුරුදු පහක් තිස්සේ මම තට්ටේ ගානවා. දැන් ඉතින් වෙනසක් කරන්න බැහැ. භාරගත්තු වැඩ නිසා. මමත් උත්සාහ කරනවා වෙනස් විදියේ චරිතයක් රඟපාන්න. මම පොඩි හාමුදුරුවන්ගේ චරිතය රඟපාන්නේ නැහැ කියලා තීරණයක් ගත්තොත් සමහර විට මට නිර්මාණවලින් ආරාධනා නොලැබෙන්නත් පුළුවන්. මමත් ගොඩක් ආශාවෙන් ඉන්නවා අන්ධ, ගොළු චරිතයක් නිරූපණය කරන්න. එවැනි චරිතයකට ආරාධනාවක් ලැබුණොත් මගේ ගමනේ ලොකු වෙනසක් දැකගන්න පුළුවන් වේවි.
යම් හැදෑරීමක් සමගද සචින්ත රංගනයට පිවිසුණේ?
පොඩි කාලේ ඉඳලම මම උත්සාහ කළා මේ ක්ෂේත්‍රයට සම්බන්ධ වෙන්න. පස්සේ මම සද්ධා සර්ගේ රංගන පාසලට සම්බන්ධ වෙලා රංගනය හැදෑරුවා. ඒ වැඩකටයුතු අවසන් කරලා අවුරුදු තුනක් විතර ගෙදරට වෙලා හිටියා අවස්ථාවක් ලැබෙනතුරු. ඔහොම ඉන්න අතරතුර තමයි මට ‘නාඩගම්කාරයෝ’ ටෙලිනාට්‍යයට සම්බන්ධ වෙන්න අවස්ථාව උදාවුණේ.
චීවරය දරාගත්තම ඔබට විවිධ අකරතැබ්බවලටත් මුහුණ පාන්න සිදුවෙන්න ඇති නේද?
ඔව්, ඕනෙ තරම් එවැනි සිදුවීම් වෙලා තියෙනවා. මොකද මගේ ෂූටින් ගොඩක් සිදුවෙන්නේ පන්සල්වල නිසා. පන්සලට එන දායකයෝ මට දණගහලා වඳිනවා මම ඒ පන්සලේ හාමුදුරුනමක් කියලා හිතලා. මේ ළඟදිත් ‘ඉස්කෝලේ’ ටෙලිනාට්‍යයේ රූගත කිරීමක් අතරතුර එවැනි දෙයක් සිදුවුණා. ඒ වෙලාවට ඉතින් මටත් කරකියා ගන්න දෙයක් නැතුව අසරණ වෙනවා.
වසන්ත විතාරණගේ
Saru FM Media
