අලුවා,අප කොයි කා අතරත් අතිශයින්ම ජනප්‍රිය රසවත් රස කැවිලි වර්ගයක්.නමුත් එකම නම තිබුණත් අලුවා සැදීමට ක්‍රම රැසක් තිබෙනවා.ඉන් ක්‍රම කිහිපයක් අප මේ ලිපියෙන් ඔබට ගෙන එනවා.ඉතින් ඉක්මනින්ම හදලා රස බලමු නේද ?
පැණි අලුවා
මේ දේවල් සූදානම් කරගන්න.
- හාල් පිටි ග්‍රෑම් 750 ක්
- කිතුල් පැණි බෝතල් බාගයක්
- සීනි ග්‍රෑම් 100 ක්
- කජු ග්‍රැම් 75
- ලුණු කුඩු තේ හැඳි බාගයක්
- කුඩුකරගත් කරඳමුන්ගු කරල් 3 ක්
සාදන ක්‍රමය
- හාල් පිටි හොඳින් බැද ගන්න.(නොකඩවා හැඳි ගාමින් බැද ගත යුතුයි.)
- පිටි නියම පදමට බැදුනු පසු පිටිවලින් විශේශ සුවඳක් එනවා .ස්වල්පයක් ලිපට දැමූ විට ඉක්මනින් ගිනිගන්නවා.බැදුනු පසු ලිපෙන් බා කැට ඇත්නම් පොඩිකර පිටි හලාගන්න.
- ග්‍රෑම් 150 ක් පමණ වෙන් කර තබන්න.
- බඳුනකට පැණි සහ සීනි එකතුකර වතුර කෝප්ප හතරෙන් එකක් දමා බුබුලු එනතුරු උතුරුවන්න.
- මෙම පැණි බඳුනෙන් ටිකක් ගෙන ඇල් වතුර පීරිසියකට දැමූ පසු පැණි ටික විසිරී නොමැති ආකාරයට තිබේ නම් පත් පැණි ආකාරයට පැණි උනු වී තිබෙනවා.
- ඒ වෙලාවෙදී බඳුන ලිපෙන් ඉවත් කරන්න.
- පැණි වලින් ටිකක් වෙනත් බඳුනකට දමා තබා ගන්න.
- ඉන්පසු එම බඳුනට කජු,කරදමුන්ගු,ලුණු එකතුකර හොදින් කලවම් කර පිටිවලින් ටිකෙන් ටික එකතු කර හොඳින් කලවම් කරන්න.
- පිටි ඉසගත් ලෑල්ලක තුනීකර ඉක්මනින් කපාගන්න.
සීනි අලුවා
මේ දේවල් සූදානම් කරගන්න.
- හාල් පිටි ග්‍රෑම් 500 ක්
- සීනි ග්‍රෑම් 400ක්
- කජු ග්‍රෑම් 50ක්
- කුඩුකරගත් කරඳමුන්ගු කරල් 2 ක්
- ලුණු කුඩු තේ හැඳි බාගයක්
- ටින් කිරි මේස හැඳි 1 ක්
සාදන ක්‍රමය
- ඉහත ආකාරයට පිටි සකසා ගන්න.
- කොටසක් පෙර පරිදිම වෙන් කරන්න.
- කජු කුඩා කොටස් ලෙස කපාගන්න.
- බඳුනක් ලිප තබා සීනි දමා වතුර කෝප්ප එකහමාරක් පමණ දමන්න.
- වතුර සීනි මට්ටමේ තිබිය යුතුයි.
- සීනි හොඳින් උනුකරගන්න.
- බුබුලු එනවිටම ටින්කිරි එකතු කරන්න.
- ලිපෙන් බා කජු එකතු කරන්න.
- කරඳමුන්ගු සහ ලුනු එකතු කරන්න.
- තරමක් නිවෙන්නට හැර පිටි ටිකෙන් ටික එකතු කරන්න.
- යාන්තමට දියාරුවට ආ පසු පිටි ඉසගත් ලෑල්ලක් මත අතුරා ඉක්මනින් කපාගන්න.
මීගමු අලුවා
මේ දේවල් සූදානම් කරගන්න.
- හාල් පිටි ග්‍රෑම් 750
- පොල් පැණි බෝතල් 1
- කජු මද ග්‍රෑම් 25
- ලුනු කුඩු ටිකක්
සාදන ක්‍රමය
- හාල් පිටි ලා දුඹුරු වනතෙක් බදින්න.
- පොල් පැණි බඳුනකට දමා හොඳින් උණු කරන්න.
- පත් පැණි වන තෙක් උණු කරන්න.
- පත් පැණි බැලීම සඳහා වතුර ටිකකට පැණි
- බින්දුවක් දෙකක් වක් කරන්න. එවිට පැණි විසිරෙන්නේ නැතිව තිබේ නම් පත් පැණි ආකාරයට උණු වී ඇත.
- මෙම අවස්ථාවේ ලිප නිවා බැදගත් හාල් පිටි වලින් ග්‍රෑම් 500 ක ප්‍රමාණයක් දමන්න.එයට ලියා ගත් කජු මද එකතු කරන්න.
- හොඳින් හැඳි ගාමින් මිශ්‍ර කර කෑලි කැපිය හැකි පදමට එන විට පිටි ටිකක් ඉස ගත් ලෑල්ලක මිශ්‍රණය දමා තුනීකර අලුවා හැඩයට කපන්න.
තල අලුවා
මේ දේවල් සූදානම් කරගන්න.
- හාල් පිටි ග්‍රෑම් 500 ක්
- සීනි ග්‍රෑම් 400ක්
- තල ග්‍රෑම් 100ක්
- කුඩුකරගත් කරඳමුන්ගු කරල් 2 ක්
- ලුණු කුඩු තේ හැඳි බාගයක්
සාදන ක්‍රමය
- ඉහත ආකාරයට පිටි සකසා ගන්න.
- කොටසක් පෙර පරිදිම වෙන් කරන්න.
- තල ටික තරමක් බැද ගන්න.
- බඳුනක් ලිප තබා සීනි දමා වතුර කෝප්ප එකහමාරක් පමණ දමන්න.
- වතුර සීනි මට්ටමේ තිබිය යුතුයි.
- සීනි හොඳින් උනුකරගන්න.
- ලිපෙන් බා තල එකතු කරන්න.
- කරඳමුන්ගු සහ ලුනු එකතු කරන්න.
- තරමක් නිවෙන්නට හැර පිටි ටිකෙන් ටික එකතු කරන්න.
- යාන්තමට දියාරුවට ආ පසු පිටි ඉසගත් ලෑල්ලක් මත අතුරා ඉක්මනින් කපාගන්න.
දැන් ඔන්න අලුවා සූදානම්.උණු උණුවේ තේ සාදා අලුවා දීසියකට දමා තේ මේසයට යවන්න .
සිනහා ඉතිරෙන ලස්සන සැන්දෑවක අසිරිය විඳ ගන්නට ඔබට හැකි වේවි.
Saru FM Media
