සබරගමුව විශ්වවිද්‍යාලයේ තාක්ෂණික ඉංජිනේරු පීඨයේ දෙවැනි වසරේ ඉගෙනුම ලැබූ 23 හැවිරිදි චරිත් දිල්ෂාන් නමැති සිසුවාගේ සියදිවි හානිකරගැනීමේ සිද්ධිය සම්බන්ධයෙන් සැකකාර සිසුන් 16 දෙනෙකු සමනල වැව පොලිස් ස්ථානයට අද (මැයි 02) පෙරවරුවේ කැඳවා ප්‍රශ්න කර ඇත.
පොලිස් වාර්තා අනුව, මෙම සැකකාර සිසුන් 16 දෙනා නියමිත පරිදි පොලිසිය හමුවේ පෙනී සිට ඇති අතර,
මෙම සිද්ධිය සම්බන්ධයෙන් විශේෂ විමර්ශනයක් ආරම්භ කර තිබේ.
චරිත් දිල්ෂාන් පසුගියදා විශ්වවිද්‍යාලය තුළදී කොට කලිසමක් හැඳ සිටීම නිසා ජ්‍යේෂ්ඨ සරසවි සිසුන් කිහිප දෙනෙකු එකතු වී ඔහුට දැඩි අමානුෂික වද හිංසා පමුණුවා ඇති බවට විවිධ පාර්ශ්වයන්ගෙන් පොලිසියට පැමිණිලි ලැබී තිබේ. මෙම වද හිංසා හේතුවෙන් දැඩි මානසික පීඩනයකට ලක්ව සිටි චරිත් ඉහළගම ප්‍රදේශයේ පිහිටි සිය නිවසට පැමිණ අදාළ සිදුවීම සම්බන්ධයෙන් දෙමාපියන්ට පවසා ඇත.
සිසුවාගේ දෙමාපියන් සහ ඥාතීන්ගේ චෝදනාවලට අනුව, චරිත් දැඩි මානසික පීඩනයකින් පසුවී ඇති අතර, ඇතැම් අවස්ථාවලදී පවුලේ සාමාජිකයන්ට හෝ මුහුණ නොදී සිට ඇත. අවසානයේදී, ඔහු නිවසේ පිහිටි කුකුල් කූඩුවක සියදිවි හානිකරගෙන ඇති බව පොලිසිය නිවේදනය කර තිබේ.
පොලිසිය තවදුරටත් වාර්තා කරන්නේ මියයෑමට පෙර චරිත් විසින් තමන් මුහුණ දුන් මානසික පීඩනය ගැන ලියූ ලිපියක් ද සොයාගෙන ඇති බවයි.
මෙම සිද්ධිය සම්බන්ධයෙන් මියගිය චරිත්ගේ පියා විසින් පොලිසියට පැමිණිල්ලක් ඉදිරිපත් කර ඇති අතර, චරිත්ගේ ශිෂ්‍ය කණ්ඩායමේ සිසුන් පිරිසක් ද පොලිසියට පැමිණිලි කර ඇත.
සමනල වැව පොලිසිය දැන් සැකකාර සිසුන් 16 දෙනා සම්බන්ධයෙන් සහ සියදිවි නසා ගැනීම සම්බන්ධයෙන් විශේෂ විමර්ශනයක් ආරම්භ කර ඇති අතර, සිද්ධියට සම්බන්ධ සියලු පාර්ශ්වයන්ගෙන් ප්‍රශ්න කිරීම් සිදු කරමින් පවතී.
මෙම සිද්ධිය විශ්වවිද්‍යාල පද්ධතිය තුළ ශිෂ්‍ය වද හිංසා, නවක වදය හා ඒවායෙහි බරපතල ප්‍රතිවිපාක පිළිබඳව නැවත අවධානය යොමු කිරීමට හේතු වී ඇත. වද හිංසා හේතුවෙන් සිසුන් සියදිවි හානිකරගැනීමේ සිද්ධීන් පිළිබඳව පෙර වාර්තා වී ඇති අතර, මෙවැනි සිදුවීම් වැළැක්වීමට ආයතනික මට්ටමින් වඩාත් ක්‍රියාමාර්ග ගත යුතු බවට මතයක් මතුව තිබේ.
Saru FM Media
