නිළි රැජින මාලනී ෆොන්සේකා දිවිසැරිය නිමකරයි

හෙළ සිනමාවේ නිළි රැජින ලෙස විශේෂ ස්ථානයක් හිමිකර ගත් රංගන ශිල්පිණී මාලනී ෆොන්සේකා මහත්මිය අද (24) අලුයම අභාවප්‍රාප්ත වූවාය. පියයුරු පිළිකා රෝගයකින් කලක් තිස්සේ අසනීප වී සිටි ඇය කොළඹ පිහිටි පෞද්ගලික රෝහලක ප්‍රතිකාර ලබමින් සිටියදී මිය ගොස් ඇත. මිය යන විට ඇය වයස අවුරුදු 78ක් වූවාය.

වන්නියාරච්චිගේ මාලිනී සෙනෙහෙලතා ෆොන්සේකා නමින් 1947 අප්‍රේල් 30 වන දින කැලණිය ප්‍රදේශයේදී උපත ලබන ලදී. ගිල්බට් ෆොන්සේකා සහ සීලවතී ෆොන්සේකා යන දෙමාපියන්ගේ දරුවන් එකොළහ දෙනාගෙන් තුන්වැන්නා ලෙස උපත ලැබූ ඇය 1952 දී නුගේගොඩ ශාන්ත ජෝන් විද්‍යාලයේ අධ්‍යාපනය ආරම්භ කර පසුව ගුරුකුල මහා විද්‍යාලයට ඇතුළත් වූවාය.
මාලනී ෆොන්සේකා මහත්මිය 1963 වසරේදී වේදිකා නාට්‍ය හරහා රංගන ක්ෂේත්‍රයට පිවිසියාය. 1968 වසරේදී “පුංචි බාබා” චිත්‍රපටයෙන් සිනමා ක්ෂේත්‍රයටද අවතීර්ණ වූ ඇය කෙටි කාලයක් තුළදීම ශ්‍රී ලාංකේය සිනමාවේ ප්‍රධාන චරිතයක් බවට පත් වූවාය. “නිධානය”, “බඹරු ඇවිත්”, “වෑකන්දේ වලව්ව”, “ආරාධනා”, “අම්මාවරුනේ” වැනි ප්‍රකට චිත්‍රපට ඇගේ රංගන කුසලතාව ප්‍රදර්ශනය කළ විශිෂ්ට නිර්මාණ වශයෙන් සැලකේ.


1973 වසරේදී ජනප්‍රියම රංගන ශිල්පිනියට හිමි සම්මානය ලැබූ ඇය හොඳම නළිය ඇතුළුව ජනාධිපති සම්මානය, සරසවි සම්මානය, ඕ.සී.අයි.සී සම්මානය, සුමති සම්මානය වැනි සම්මාන රැසකින් පිදුම් ලැබ ඇත. ශ්‍රී ලාංකේය සිනමාවේ “නිළි රැජින” ලෙස පුළුල් පිළිගැනීමකට පාත්‍ර වූ ඇය දශක ගණනාවක් පුරා හෙළ සිනමාවේ ප්‍රධාන චරිතයක් ලෙස කටයුතු කළාය.
මාලනී ෆොන්සේකා මහත්මියගේ පවුලේ සාමාජිකයන් බොහෝ දෙනෙක් සිනමා ක්ෂේත්‍රයේ නියැලී සිටිති. ඇගේ සහෝදරියන් වන ශ්‍රියානි, රසාදරී සහ දමයන්ති යන තිදෙනා මෙන්ම සහෝදරයන් වන දයානන්ද සහ ආනන්ද ද සිනමා කර්මාන්තයේ නියැලී සිටියහ. ඇගේ මස්සිනාවරුන් අතර ප්‍රවීණ නළු කරුණාරත්න හංගවත්ත සහ අධ්‍යක්ෂක ප්‍රසන්න විතානගේ සිටින අතර ඇගේ දෙවන පරපුරේ දරුවන් අතර සමනලී ෆොන්සේකා සහ සෙනාලි ෆොන්සේකා වැනි නිළියන් ද වෙති.
2010 අප්‍රේල් මාසයේදී එක්සත් ජනතා නිදහස් සන්ධානයේ ජාතික ලයිස්තු පාර්ලිමේන්තු මන්ත්‍රීවරියක ලෙස දේශපාලන ක්ෂේත්‍රයටද පිවිසි ඇය 2015 වසර දක්වා ශ්‍රී ලංකා පාර්ලිමේන්තුව නියෝජනය කළාය. කලා ක්ෂේත්‍රයේ නියැලුණු පුද්ගලයෙකු ලෙස දේශපාලනයේද සක්‍රීය වූ ඇය ජාතික වැදගත්කම ඇති විවිධ කරුණු සම්බන්ධයෙන් අදහස් ප්‍රකාශ කළාය.


2012 දී ඇගේ ජ්‍යෙෂ්ඨ සහෝදරයා වන දයානන්ද මිය ගිය අතර ඇගේ අනෙකුත් සහෝදරයන් වන ආනන්ද සහ උපාලි 2020 දී අභාවප්‍රාප්ත වූහ. මෙය ඇයට විශාල කම්පනයක් ඇති කළ බව සම්මුඛ සාකච්ඡා වලදී ඇය කියා ඇත.
පියයුරු පිළිකා රෝගයකින් කලක් තිස්සේ අසනීප වී සිටි ඇය විවිධ ප්‍රතිකාර ක්‍රම අනුගමනය කළද අවසානයේ රෝගයට යටත් වූවාය. ශ්‍රී ලාංකේය සිනමාවේ වර්ධනයට විශාල දායකත්වයක් සපයා ඇති ඇගේ අසනීප තත්වය පිළිබඳව සිනමා ප්‍රේමීන් මෙන්ම මුළු ජනතාව පුරාම කනස්සල්ලෙන් සිටි අතර ඇගේ ඉක්මන් සුවය සඳහා ජනතාව ප්‍රාර්ථනා කරමින් සිටියහ.
අවසන් කාලයේ ඇය වෙනුවෙන් උපහාර පිදීමේ වැඩසටහනක්ද සාර්ථක ලෙස සංවිධානය කර තිබුණි.
අද වන විට මාලනී ෆොන්සේකා මහත්මිය නැවත නොපැමිණෙන ගමනක් ගොස් ඇති අතර ඇගේ අභාවය ශ්‍රී ලාංකේය සිනමා ක්ෂේත්‍රයට ආදේශ කළ නොහැකි අලාභයක් වේ.