ඇමරිකාවේ කැලිෆෝනියාහි සැන් ඩියෙගෝ නගරයේ නේවාසික ප්‍රදේශයකට කුඩා ගුවන් යානයක් කඩා වැටීමෙන් අවම වශයෙන් දෙදෙනෙකු මිය ගොස් ඇත.
2025 මැයි 22 වන දින අලුයම සැන් ඩියෙගෝ නගරයේ මොන්ට්ගොමරි-ගිබ්ස් විධායක ගුවන්තොටුපළ අසල නේවාසික ප්‍රදේශයකට සෙස්නා 550 කුඩා ගුවන් යානය කඩා වැටී ඇත. මර්ෆි කැනියන්/ටියෙරසන්ටා ප්‍රදේශයේ මිලිටරි නිවාස සංකීර්ණයක මෙම ගුවන් අනතුර පෙරවරු 3.45 ට පමණ සිදු වී ඇත.
ගුවන් යානය පළමුව විදුලි කම්බි වලට වැදීමෙන් පසුව පාරට කඩා වැටී එක් නිවසක් සම්පූර්ණයෙන් විනාශ කර තවත් නිවාස 10 ක් පමණ හානි කර ඇත. මෙම අනතුරින් කාර් කිහිපයක් සහ නිවාස කිහිපයක ගින්නක් ඇති වී විශාල ගිනි ගැනීමක් සිදු වීමෙන් නිවැසියන් 100 ක් පමණ ආරක්‍ෂිත ස්ථාන වලට ඉවත් කිරීමට සිදු වී ඇත.
ගුවන් යානයේ සිටි අවම වශයෙන් පුද්ගලයන් දෙදෙනෙකුගේ මරණය තහවුරු වී ඇති අතර වාර්තා වලට අනුව ගුවන් යානයේ මගීන් හය දෙනෙකු දක්වා සිට ඇති බවත් ඔවුන් සියල්ලන්ම මියගොස් ඇති බවට අනුමාන කෙරේ.
පොළව සිටි පුද්ගලයන් අට දෙනෙකු තුවාල ලබා ඇති අතර ඔවුන්ගෙන් බහුතරයක් සුළු තුවාල ලබා ඇති අතර එක් පුද්ගලයෙකු රෝහල් ගත කර ඇත.
මියගිය මගීන් දෙදෙනාගේ අනන්‍යතාවය වාර්තා වී ඇති අතර ඔවුන් වන්නේ “ද ඩෙවිල් වෙයාර්ස් ප්‍රාඩා” සංගීත කණ්ඩායමේ හිටපු බෙර වාදක ඩැනියෙල් විලියම්ස් සහ ගුවන් යානයේ ලියාපදිංචි හිමිකරු වන සංගීත නියෝජිත ඩේව් ෂැපිරෝ ය.
ගුවන් යානය නිව් ජර්සි සිට සැන් ඩියෙගෝ වෙත ගමන් කරමින් සිටි අතර කැන්සාස් හි ඉන්ධන පිරවීම සඳහා නැවතී ඇත. ෆෙඩරල් ගුවන් සේවා පරිපාලනය සහ ජාතික ප්‍රවාහන ආරක්‍ෂණ මණ්ඩලය එක්ව මෙම අනතුර සම්බන්ධයෙන් විමර්ශනයක් ආරම්භ කර ඇත. අනතුර සිදු වන අවස්ථාවේ මීදුම සහිත කාලගුණික තත්වයන් පවතින බව වාර්තා වී ඇත.
ජෙට් ඉන්ධන සහ සුන්බුන් වැනි අන්තරායන් නිසා ගුවන් අනතුර සිදු වූ ප්‍රදේශයෙන් ඈත්ව සිටින ලෙස බලධාරීන් මහජනතාවට අනතුරු ඇඟවී ඇති අතර මෙම සිදුවීම හේතුවෙන් ප්‍රදේශයේ පාසල් තාවකාලිකව වසා දමා ඇත.
Saru FM Media
