ජනප්‍රිය පහ වසර උපකාරක පන්ති ගුරුවරියක වන හයේෂිකා ප්‍රනාන්දු නමැත්ති‍යගේ සිද්ධියට අත් අඩංගුවට ගෙන මැයි 17 වැනි දා මාලිගාකන්ද මහේස්ත්‍රාත් අධිකරණයෙන් ඇප මත නිදහස් කෙරුණු 19 හැවිරිදි තරුණයා අද (21) මීගමුව මහේස්ත්‍රාත් අධිකරණය හමුවේ පෙනී සිටීමෙන් අනතුරුව එම නඩුව නැවති ජූලි මස 16 වන දින දක්වා කල් තැබීමට අධිකරණය නියෝග කළා.
දසත අධිකරණ වාර්තාකාරිණිය පැවසුවේ, පැමිණිල්ලේ පාර්ශ්වයෙන් අධිකරණයෙන් ඉල්ලා සිටියේ, සැකකාර තරුණයාගේ දෙමාපියන් ඇතුළු පිරිස විසින් අධිකරණ තීන්දුවක් හෑල්ලුවට ලක් කරමින් මාධ්‍ය සාකච්ඡා පැවැත්වූ බවත්, යළිත් එලෙස නොකිරීමට වාරණයක් නිකුත් කරන ලෙස ඉල්ලා සිටි බවයි.
නමුත් මීගමුව අතිරේක මහේස්ත්‍රාත් දර්ශිමා ප්‍රේමරත්න මහත්මිය එම ඉල්ලීම ප්‍රතික්ෂේප කර ඇති අතර, විනිසුරුවරිය පවසා ඇත්තේ, සැකකාර තරුණයා විසින් නීතිමය කටයුතු නීත්‍යනුකූල ව සිදු කර ඇති බැවින් එලෙස වාරණයක් පැනවීමේ අවශ්‍යතාවක් නොමැති බවටයි.
කෙසේවෙතත් අදාළ විමර්ශන කටයුතු පොලිසියෙන් විධිමත් ව සිදු කරන ලෙසට අධිකරණය විසින් නියෝග කරනු ලැබුවා.
මේ අතර පහ වසර ශිෂ්‍යත්ව උපකාරක පන්ති පවත්වන හයේෂිකා ප්‍රනාන්දු නමැති ගුරුවරිය එම නඩුවේ සැකකාර තරුණයාට අමානුෂික ලෙස පහර දුන්නේ යැයි එම තරුණයා විසින් කරන ලද පැමිණිල්ල සම්බන්ධයෙන් පොලිස් මාධ්‍ය කොට්ඨාසය දැනුවත් කිරීමට පෙර මාධ්‍යයට අනාවරණය කළේ යැයි කියන සිද්ධිය සම්බන්ධයෙන් කටාන පොලිස් ස්ථානාධිපති ප්‍රධාන පොලිස් පරීක්ෂක වසන්ත සුදසිංහ මහතාට එරෙහිව විනය පරීක්ෂණයක් පවත්වා වාර්තාවක් ඉදිරිපත් කරන්නැයි වැඩබලන පොලිස්පතිවරයා මීගමුව කොට්ඨාස භාර ජ්‍යෙෂ්ඨ පොලිස් අධිකාරිවරයාට නියෝග කොට ඇතැයි වාර්තා වනවා.
පොලිස් මාධ්‍ය කොට්ඨාසය විසින් කරන ලද පැමිණිල්ලක් අනුව වැඩබලන පොලිස්පතිවරයා එම නියෝගය කර ඇතැයි සඳහන්.
Saru FM Media
