ජනාධිපති කාර්යාලය සතු වාහන ටෙන්ඩර් ක්‍රමයට විකිණීම සම්බන්ධයෙන් ද්වේශ සහගතව අසත්‍ය ප්‍රචාරයන් කරමින් මහජනතාව නොමග යැවූ පාර්ශවවලට එරෙහිව අපරාධ පරීක්ෂණ දෙපාර්තමේන්තුව වෙත පැමිණිලි කළ බව ජනාධිපති මාධ්‍ය අංශය පවසනවා.
යම් සංවිධානාත්මක පිරිසක් එලෙස අසත්‍ය ප්‍රචාර ජනමාධ්‍ය ඔස්සේ ප්‍රචාරය කරන බවට නිරීක්‍ෂණය වී ඇති බවයි ජනාධිපති මාධ්‍ය අංශය පැවසුවේ.
නියමිත පටිපාටියට ටෙන්ඩර් අයදුම්පත් ලබාගත් අයදුම්කරුවන් 108 දෙනෙකු ටෙන්ඩර් පත් කැඳවීම අවසන් වූ පසුගිය 15 වනදා තමන්ගේ මිල ගණන් ඉදිරිපත් කර තිබුණා.
එදින ටෙන්ඩර් පත් විවෘත කර ටෙන්ඩර් ක්‍රමයට වාහන අලෙවි කිරීම සිදු කරන ලද්දේද නියමිත පටිපාටියට අනුව බවයි ජනාධිපති මාධ්‍ය අංශය පැවසුවේ.
එහිදී රජයේ තක්සේරු වටිනාකම ඉක්මවා ඉහළම මිල ගණන් ඉදිරිපත් කරන ලද ටෙන්ඩර් අයදුම්කරුවන්ට වාහන අලෙවි කිරීමට කටයුතු කර තිබෙනවා.
ඇතැම් වාහන සඳහා රජයේ තක්සේරුව ඉක්මවා මිල ගණන් ඉදිරිපත් නොවූ බැවින්, අලෙවි කරන ලද්දේ ඉදිරිපත් කරන ලද වාහන 26න් 17ක් පමණක් බවයි ජනාධිපති මාධ්‍ය අංශය පැවසුවේ.
එලෙස රජයේ තක්සේරු වටිනාකම ඉදිරිපත් නොවු වාහන අතරට වාහන 09ක් ඇතුළත්.
Saru FM Media
