දසවන පාර්ලිමේන්තුව සඳහා ශ්‍රී ලංකා – මාලදිවයින් පාර්ලිමේන්තු මිත්‍රත්ව සංගමයේ සභාපති ධුරයට යෞවන කටයුතු හා ක්‍රීඩා අමාත්‍ය සුනිල් කුමාර ගමගේ තේරී පත්ව තිබෙනවා.
මෙම සංගමය දසවන පාර්ලිමේන්තුව සඳහා පිහිටුවීමේ රැස්වීම 2025 මැයි 09 වන දින පාර්ලිමේන්තු පරිශ්‍රයේදී කතානායක වෛද්‍ය ජගත් වික්‍රමරත්නගේ ප්‍රධානත්වයෙන් පැවැත්වුණා.
ශ්‍රී ලංකාවේ මාලදිවයින් මහ කොමසාරිස් මසූඩ් ඉමාඩ් ගෞරවනීය ආරාධිත අමුත්තා ලෙස මෙම අවස්ථාවට සහභාගී වුණා.
ගරු නියෝජ්‍ය කතානායක රිස්වි සාලි, අමාත්‍යවරුන්, නියෝජ්‍ය අමාත්‍යවරුන්, පාර්ලිමේන්තු මන්ත්‍රීවරුන් සහ පාර්ලිමේන්තු මහලේකම් කුෂානි රොහණදීර ද මෙම අවස්ථාවට සහභාගීව සිටියා.
එම රැස්වීමේ දී ශ්‍රී ලංකා – මාලදිවයින් පාර්ලිමේන්තු මිත්‍රත්ව සංගමයේ ලේකම් ධුරයට පාර්ලිමේන්තු මන්ත්‍රී රවීන්ද්‍ර බණ්ඩාර තේරී පත් වුණා.
ශ්‍රී ලංකාව සහ මාලදිවයින අතර ඓතිහාසික, සංස්කෘතික සහ ආර්ථික ඇතුළු අංශවලින් දිගුකාලීනව පවතින ශක්තිමත් ද්විපාර්ශ්වික සම්බන්ධතාවය දෙපාර්ශවයම පෙන්වා දුන්නා.
පොදු වැදගත්කමක් සහිත කරුණු සම්බන්ධයෙන් ජාත්‍යන්තර වේදිකාවලදී දෙරට අතර අන්‍යෝන්‍ය සහයෝගය මෙහිදී නැවත තහවුරු කිරීම සිදුවුණා.
සෞඛ්‍ය සේවා, කෘෂිකර්මාන්තය සහ පුනර්ජනනීය බලශක්තිය වැනි නැගී එන ක්ෂේත්‍රවල සහයෝගීතාව තවදුරටත් වැඩිදියුණු කිරීම සඳහා දෙපාර්ශවයේම කැපවීම මෙහිදී තහවුරු කෙරුණා.
නැවත ස්ථාපිත කළ පාර්ලිමේන්තු මිත්‍රත්ව සංගමය, පාර්ලිමේන්තු රාජ්‍ය තාන්ත්‍රිකත්වයෙන් ඔබ්බට ගොස් වඩාත් පුළුල් ලෙස ජනතාව අතර සබඳතා දක්වා විහිදෙන, ශක්තිමත් සබඳතා ගොඩනැගීම සඳහා වැදගත් වේදිකාවක් වනු ඇති බව මෙහිදී අවධාරණය කෙරුණා.
Saru FM Media
