පසුගිය දා හැටන් තැපැල් කාර්යාලය සහ සන්නිවේදන පියසේ ඉහළ මහලේ පිහිටි ඡන්ද ගණන් කිරීමේ මධ්‍යස්ථානයට බලහත්කාරයෙන් ඇතුළු වූ පිරිසක් හේතුවෙන් දැඩි පොලිස් ආරක්ෂාව යටතේ ඡන්ද ගණන් කිරීමේ කටයුතු සිදු කිරීමට සිදු වූ බව වාර්තා වේ.
හැටන් දික්ඔය නගර සභාවට සහිකයන් පත් කර ගැනීම සඳහා හැටන් අංක 04 ගාමිණිපුර කොට්ඨාශයේ පැවති ඡන්ද විමසීමේදී ඡන්ද දායකයින් 1,407 දෙනෙකු ඡන්දය ප්‍රකාශ කර ඇති නමුත්, ඡන්ද ගණන් කිරීමේදී ඡන්ද පත්‍රිකා 1,404ක් පමණක් තිබී ඇත. මෙම ඡන්ද පත්‍රිකා තුනක පාඩුව හේතුවෙන් තමන්ට අසාධාරණයක් සිදු වී ඇති බව පවසමින් ලංකා කම්කරු කොංග්‍රසයේ අපේක්ෂකයෙකු සහ සමගි ජන බලවේගයේ අපේක්ෂකයන් කිහිප දෙනෙකු ඡන්ද මධ්‍යස්ථානයට ඇතුළු වී ඇත.
මෙම පිරිස ඡන්ද ගණන් කිරීම නතර කරන ලෙසත්, නැවත එම කොට්ඨාශය තුළ ඡන්දය පවත්වන ලෙසත් ඡන්ද මධ්‍යස්ථානයේ භාර නිලධාරීන්ට තර්ජනය කර ඇත.
මෙම තත්ත්වය හමුවේ හැටන් පොලිසියේ නිලධාරීන් මැදිහත් වී ඡන්ද ගණන් කිරීමේ මධ්‍යස්ථානයට බලහත්කාරයෙන් ඇතුළු වූ පිරිස ඉවත් කර ඇත.
අනතුරුව, දැඩි පොලිස් ආරක්ෂාවක් යටතේ ඡන්ද ගණන් කිරීමේ කටයුතු නැවත ආරම්භ කර ඇති අතර, ඡන්ද ගණන් කිරීම අවසන් වීමෙන් පසු ඡන්ද මධ්‍යස්ථානයේ භාර නිලධාරියා සහ කාර්ය මණ්ඩලය, හැටන් පොලිසියේ සහ පොලිස් විශේෂ කාර්ය බලකායේ දැඩි ආරක්ෂාව යටතේ නුවරඑළිය දිස්ත්‍රික් ලේකම් කාර්යාලය වෙත රැගෙන යාමට පියවර ගෙන ඇත.
මේ සිදුවීම පසුබිමේ ඡන්ද දායකයින් 1,407 දෙනෙකු ඡන්දය ප්‍රකාශ කර ඇති නමුත් ඡන්ද පත්‍රිකා 1,404ක් පමණක් ලැබී ඇති බැවින් ඡන්ද පත්‍රිකා තුනක් අතුරුදහන් වීම සම්බන්ධයෙන් පරීක්ෂණ ආරම්භ කර ඇති බව ද වාර්තා වේ.
Saru FM Media
