ජාතික ජන බලවේගයේ මැයි දින රැළියට සහභාගි වී නැවත ආපසු යන අතරමඟ දී දක්ෂිණ අධිවේගී මාර්ගය අයිනේ බස් රථ නවතා තබාගෙන ආහාර අනුභවයක යෙදී සිටි රියදුරන්ට සහ එම ක්‍රියාවට සහයෝගය දැක්වූ කණ්ඩායම් වලට මෙන්ම එම සිදුවීම නිහඬව බලා සිටි පොලිස් නිලධාරීන්ට එරෙහිව ද නීතිය ක්‍රියාත්මක කළ යුතු බව ජනාධිපති අනුර කුමාර දිසානායක මහතා අවධාරණය කර සිටියේය.
මෙම සිදුවීමට සම්බන්ධ වූ මාලිමාවේ පක්ෂ ක්‍රියාකාරීන්ට එරෙහිව පක්ෂය තුළින් ම දැඩි ක්‍රියාමාර්ග ගන්නා බව ද ජනාධිපතිවරයා පැහැදිලි කළේය.
රූපවාහිනී නාලිකාවක පැවති දේශපාලන සංවාදයකදී මාධ්‍යවේදියකු විසින් ඉදිරිපත් කරන ලද ප්‍රශ්නයකට පිළිතුරු සපයමින් ජනාධිපතිවරයා මෙම අදහස් පළ කළේය.
මැයි දින රැළියට සහභාගි වූ ජාතික ජන බලවේගයේ පිරිසක් දක්ෂිණ අධිවේගී මාර්ගයේ තැනක බැස, අධිවේගී මාර්ගයේ මාර්ග නීති රීති අමු අමුවේ උල්ලංඝනය කරමින් කටයුතු කරන අයුරු මාධ්‍යවලින් වාර්තා වූ බව සඳහන් කළ මාධ්‍යවේදියා, එහි වඩාත්ම බරපතළ කරුණ ලෙස පොලිසිය එම සිදුවීම බලා සිටීම හඳුන්වා දුන්නේය.
“ආණ්ඩුවේ රැළියට පැමිණි පිරිසක් නිසා පොලිසිය මුකුත් කරන්නේ නැද්ද? ඒ අයට තිබෙන්නේ වෙන නීතියක්ද? කතා කරපු සිස්ටම් චේන්ජ් එක කෝ!” යනුවෙන් මාධ්‍යවේදියා ජනාධිපතිවරයාට අභියෝගාත්මක ප්‍රශ්නයක් එල්ල කළේය.
මෙම ප්‍රශ්නයට විස්තරාත්මක පිළිතුරක් සපයමින් ජනාධිපති අනුර කුමාර දිසානායක මහතා පැවසූයේ තමා මෙම සිදුවීම සාධාරණීකරණය කිරීමට උත්සාහ නොකරන බවත්, එහෙත් සිදුවීමේ පසුබිම අවබෝධ කර ගැනීම වැදගත් බවත්ය.
“මම මේ ප්‍රශ්නය මතුවී තිබෙන විදිය බැලුවා. මම මේක සාධාරණීකරණය කරනවා නෙමෙයි. මේ අය දුර ඉඳන් එන පිරිසක්. මේ පිරිස එන්න ඇත්තේ දකුණෙන් නේ. ඒ ගැන මම සොයා බැලුවා,” ජනාධිපතිවරයා පැවසීය.
සිදුවීම සම්බන්ධයෙන් විස්තරාත්මක විමර්ශනයක් සිදු කළ බව ජනාධිපතිවරයා හෙළි කළේය. ඔහු මාතර, හම්බන්තොට, මොණරාගල, බදුල්ල සහ අම්පාර යන දිස්ත්‍රික්කවලට කතා කොට, එම බස් රථවල සිටියේ කවුරුන්ද, ඒවායේ සංවිධායකවරුන් කවුරුන්ද යන්න පිළිබඳ තොරතුරු සපයන ලෙස දැනුම් දී ඇති බව ජනාධිපතිවරයා පැවසීය.
“ඒ සිදුවීම වුනේ අධි වේගයේ වාහන නවත්වන තැන. එහි යම් ඉඩ ප්‍රමාණයක් තියෙනවනේ. ඒ ඉඩ ප්‍රමාණවත් නැති වුණාම ඇතුලේ හිරවෙනවා. ඒ ක්‍රියාව වැරදියි,” ජනාධිපතිවරයා පැහැදිලි කළේය.
“ඒ සිදුවීම බලා ඉඳලා පොලිසිය ඒකට ඉඩ දුන්නා නම් ඒකත් වැරදියි. ඒකට විනය ක්‍රියාමාර්ග ගන්න ඕන. එහෙම වැඩ කරන්න බෑ,” ජනාධිපතිවරයා දැඩි ලෙස අවධාරණය කළේය.
සිදුවීමට සම්බන්ධ සියලුම පාර්ශවයන්ට එරෙහිව ක්‍රියාමාර්ග ගැනීමේ අවශ්‍යතාව ජනාධිපතිවරයා අවධාරණය කළේය:
විශේෂයෙන්ම ම මෙම සිදුවීමට සම්බන්ධ වූ මාලිමාවේ පක්ෂ ක්‍රියාකාරීන්ට එරෙහිව පක්ෂය තුළින් ම දැඩි ක්‍රියාමාර්ග ගන්නා බව ජනාධිපතිවරයා සඳහන් කළේය.
“ඒ අයගේ ලැයිස්තුව මම ඉල්ලා තිබෙනවා. හැම බස් එකකටම සංවිධායක සහෝදරයෙක් ඉන්නවා. මොකද මෙය සිදු නොවිය යුතු දෙයක්. රටේ පොදු නීතියක් තිබෙනවා,” ජනාධිපතිවරයා අවධාරණය කළේය.
මෙම සිදුවීම ජාතික ජන බලවේගයේ “පද්ධති වෙනස” හෙවත් “සිස්ටම් චේන්ජ්” දේශපාලන වියාපෘතියට එල්ල වන සෘජු අභියෝගයකි. මාධ්‍යවේදියා විසින් “කතා කරපු සිස්ටම් චේන්ජ් එක කෝ!” යනුවෙන් මතු කළ ප්‍රශ්නය මෙම අභියෝගය පැහැදිලි කරයි.
Saru FM Media
