රෂිකා හෙන්නායක
ලෝක කම්කරු දිනය (මැයි01) වෙනුවෙන් පැවැත්වෙන මැයි රැළි සහ පෙළපාළි සඳහා මේ වන විට සියලු කටයුතු සූදානම් කරමින් පවතින අතර, ප්‍රධාන රැළි ආරම්භ වන්නේ අද (01) පස්වරුවේයි.
පොලීසියේ දත්තවලට අනුව කොළඹ පමණක් මැයි රැළි 14ක් සංවිධාන කර තිබෙන අතර, පැවැත්වෙන පෙළපාළි සංඛ්‍යාව 09කි.පොලීසිය පැවසුවේ, තලවකැලේ නගරසභා ක්‍රීඩාංගණයේ ඇතුළු කොළඹින් පිට ප්‍රදේශවල මැයි රැළි 16ක් පැවැත්වෙන බවයි .
ගාලු මුවදොර ක්‍රීඩා පිටිය, පී ඩී සිරිසේන ක්‍රීඩංගණය, තැපැල් මූලස්ථානය, හයිඩ් පිටිය, පුස්තකාල ශ්‍රවණාගාර පරිශ්‍රය, විහාරමහාදේවි එළිමහන් රංගපීඨය සහ ලලිත් ඇතුළත්මුදලි ක්‍රීඩාපිටියේ මැයි රැළි සංවිධාන කර තිබෙන අතර, කොස් ගස් හන්දිය, බාලාතම්පෝ පටුමඟේ සංගම් මූලස්ථානය, ශාන්ත මයිකල් දේවස්ථානය, කොළඹ 05 සංගම් මූලස්ථානය සහ නගර ශාලාවේද මැයි රැළි පැවැත්වීමට නියමිතව ඇත.
පොලීසිය සඳහන් කළේ, කොළඹ පැවැත්වෙන ප්‍රධාන මැයි රැළිය ගාලු මුවදොර පිටියේදී පැවැත්වෙන බවත් ඊට ලක්ෂ දෙක හමාරකට ආසන්න පිරිසක් පැමිණෙනු ඇති බවත්ය .රථවාහන පාලන හා මාර්ග ආරක්ෂක දිසාව භාර නියෝජ්‍ය පොලිස්පති ඉන්දික හපුගොඩ මහතා සඳහන් කළේ, මෙම රැළිය සඳහා බස්රථ 5,532ක් පැමිණෙනු ඇති බවයි.
Saru FM Media
