සම්මාන නොලැබුණත්, මිනිස්සුන්ගේ හිත්වලට ‘කික්’ එකක් වෙච්ච ජනකාන්ත නළුවො ඕනෑතරම් ඉන්නවා.
විරාජ් පෙරේරා කියන්නෙත් අන්න එහෙම නළුවෙක්. ඔහුට තියෙන්නේ මලයාලම්, තෙලිඟු ටයිප් එකේ බයිස්කෝප් ස්ටයිල් එකක් කියලා බොහෝ දෙනා කියනවා.Sri Lanka Latest News
චරිතයෙන් චරිතයට තමන්ගෙ පෙනුමට වෙනසක් එක්කරන දක්ෂ චරිතාංග නළුවකු වූ විරාජ් අපි එක්ක දොඩමලු වුණේ මේ විදියටයි.
පහුගිය දවස්වල විරාජ් ගොඩක් බිසී වෙලා හිටියේ?
ඔව්. අවුරුදු ප්‍රෝග්‍රෑම් එක්ක තරමක් වැඩ වැඩිවුණා. ඩුබායි, අබුඩාබි, සාජාවල ෂෝවලටත් සහභාගි වෙන්න වුණු නිසා ටිකක් බිසී වුණා කිව්වොත් ඒක හරි.
කොයි තරම් බිසී වුණත් ඔබ ‘හාට්’ එක වෙනුවෙන් ටයිම් එකක් දුන්නා?
මම එහෙමයි කා සමගත් සුහදයි. හරි වෙලාවට වැඩ. සෙට් එකට වුණත් ටයිමින් නම් ටයිමින් තමයි. මේ ෆීල්ඩ් එකේ නමක් හදාගන්න නම් කැපකිරීම් අවශ්‍යයි. නිහතමානීකම සහ සුහද මිත්‍රශීලීකම අවශ්‍යයි. නැත්නම් රැඳෙන්න අමාරුයි.
ඔබ වැඩ ගොඩක ඉන්නේ ඒ කැපකිරීම නිසා වෙන්නැති?
ඒක එහෙමයි. මම ඇවිදින් දැනට අවුරුදු 14යි. ලොකුකමකට එහෙම කියනවා නෙවෙයි. මං එක්ක ආපු අනෙක් අය අද මේ ෆීල්ඩ් එකේ හොයාගන්නත් නෑ. ඒත් මං තවම ඉන්නවා. ඒ කාලයක් තිස්සේ විරාජ් පෙරේරා කියන නම හදාගන්න මං දරපු මහ්නසියේ ප්‍රතිඵල තමයි. මේ දවස්වල වුණත් මගේ ටෙලි 5ක් විකාශය වෙනවා. පාට කුරුල්ලෝ, සිත නිදි නැහැ, ආලවන්ති, ප්‍රේම රස්තියාදුව සහ දෙවෙනි ඉනිම සීසන් 2.
ඔබ හරි ආඩම්බරෙන් කතා කරන්නේ?
ඔව්. ඇත්තටම මං ගැන මට මාරම සතුටුයි. ඒ වගේම මං ආවේ හෙමින් ගමනක්. මට කා එක්කවත් තරගයක් තිබුණේ නෑ. කලබලයක් නැතිව කා එක්කත් සුහදව මගේ ගමන ආවා.
විරාජ් චරිත රිජෙක්ට් කරන්නේ නැහැලු?
ඔව්. මම මට ලැබෙන චරිත රිජෙක්ට් කරන්නේ නැහැ. කවුරු කොහොම කිව්වයි කිව්වත් චරිත තෝරන්න බේරන්න තරම් මේ ඉන්ඩස්ටි්‍රය ලොකු නැහැ. අනෙක චරිත රිජෙක්ට් කරනවා කියන්නේ මොකක්ද? විලන්ට රඟපාන්න කැමැති නැහැ, ප්‍රධාන චරිතය නෙවෙයි නම් දෙවැනි හෝ මැද චරිත භාරගන්න කැමැති නැහැ. ටෙලියෙ තමන්ට තියෙන්නේ කොටස් දෙක තුනයි නම් ඒකට එන්න කැමැති නැහැ. වියපත් චරිතවලට කැමැතිම නෑ. ඕවා තමයි එතැන තියෙන අවුල්. හැබැයි මම එතැන නැහැ. මට තියෙන්නේ අන්තිම කොටස් දෙක තුන විතරයිද? සීන්ස් හතරයි පහයිද? මට ඒ ගැන වගක් නැහැ. සාධාරණයක් හෝ මතක හිටින යමක් කරන්න පුළුවන් නම් මම ඒ චරිතය භාරගන්නවා.
මම චරිතවලට පේරේතයි. ඇක්ටිං කියන්නේ මට උමතුවක්. මං කවදා හරි මැරෙන්නේ වෘත්තීය මට්ටමේ දක්ෂ චරිතාංග නළුවෙක් විදියටයි. මගේ ජීවිතේ සතුට ඒකයි.
විලන්ගෙ චරිතයට ඔයාව කොටුවෙලා කියලා හිතෙන්නේ නැද්ද?
වෙන්න පුළුවන්. මට වැඩිපුරම ලැබෙන්නේ විලන්ගේ පාට් එක. හැබැයි ඒ විලන්ලාගේ චරිත හාත්පසින්ම එකිනෙකට වෙනස්. ස්වරූපය, වෙස්ගැන්වීම, ඇඳුම පැලඳුම පවා එහෙමයි. ඉතින් එහෙම බැලුවම මට එතැන ඒකාකාරී බවක් දැනෙනවා අඩුයි.
විලන්ගෙන් වෙනසකට යන සූදානමක් නැද්ද?
මම සූදානම් වෙන්න කලින් මට ඒ අවස්ථාව ලැබුණා කියලා සතුටින් කියනවා. හිතුවෙවත් නැති විදියට සංකීර්ණ ප්‍රබල චරිත කිහිපයකට මම සම්මාදම් වෙලා ඉවරයි. ඒ, එක් චරිතයක් වඩාත් විශේෂයි. බොහෝ විට එය මගේ රංගන ජීවිතයේ ටර්නින් පොයින්ට් එක වෙනවා නිසැකයි.
කුතුහලයට මැදි නොකර ඒ ගැන අටුවා ටීකා ටිකක් අපිට කියමුද?
දැනට මේ ටික ඇති. ඊට එහා මම යන එක හොඳ මදියි කියලා මම හිතන්නේ. කුතුහලය කියන්නේ කලා නිර්මාණ හමුවේ සොඳුරු අත්දැකීමක්. ඒ හින්දා මෙතැනින් අපි ඒ කතාව නවත්තමු.
පෙපර්-සෝල්ට් ෆැෂන් එකට රැවුලයි කොණ්ඩෙයි හදන්න හිතුවෙ ඇයි?
සිත නිදි නෑ ටෙලියෙ මම රඟන වියපත් චරිතය වෙනුවෙනුයි ඒක කළේ.
‘ආලවන්ති’ ඇතුළු තව ටෙලිවලත් විරාජ් ඒ පෙනුමෙන් රඟනවා?
හැමෝම ඒ ෆැෂන් එක අපූරුයි කිව්වා. ආලවන්ති අධ්‍යක්ෂ ශිවගුරුනාදන් පවා ඒක මරු කිව්වා. ඒ හින්දා ආලවන්ති එකටත් ඒ ෆැෂන් එක භාවිත කළා.
ඔබ මලයාලම් තෙලිඟු නළු පෙනුම කොපිකරනවා කියලයි කවුරුත් කියන්නේ?
මම ආසයි එහෙම හිතනවට. සමහර අවස්ථාවල මම තෙලිඟු කොලිවුඩ් චිත්‍රපට බලනකොට මම ඔවුන්ගේ සිත්කලු නිරූපණයන් හිතට ගන්නවා. ඒ ඒ අයට විශේෂ වූ ඔවුන්ගේ බැල්ම කැල්ම හිනාව වෙනත් සුවිශේෂ ඉරියව් මොන තරම් අපූරුයිද? මම සූර්යා විදියට විජය විදියට රඟන්න හදනවා කියලා මාව නරඹන කවුරුන් හෝ කියනවා නම්, ඒක මට සතුටක්. මොකද අපට වඩා ප්‍රවීණයන්ගෙන් ගන්න දේවල් අපිට තියෙනවා.
ටෙලි කලාව තුළ ඔබ දිනුම් කියලා හිතනවද?
එහෙමත් හිතනවා. තව යන්න තියෙන දුර, කරන්න තියෙන වැඩ බොහොමයි කියලත් හිතනවා.
ඒ බොහොමයක් දේ අතර තියෙන එක ඉලක්කයක් ගැන කියමුද?
මගේ හිත ගත් ප්‍රවීණයන් රැසක් ඉන්නවා. ඔවුන්ගේ එකම එක නිර්මාණයකට හෝ දායක වීමේ විශාල බලාපොරොත්තුවක් මා තුළ තියෙනවා.
ඒක ඔබේ රංගන ජීවිතයේ හීනයක්ද විරාජ්?
සත්තකින් ඔව්. මා රඟපාන ටෙලිනාට්‍ය පෙළ දකින ඔවුන් කවදාක හෝ ඔවුන්ගේ නිර්මාණ කාර්යයක් වෙනුවෙන් මට ආරාධනා කරයි කියා හිතනවා. කාලයට ඉඩදී බලාගෙන ඉමු.
මල්මි කෞෂල්‍යා
Saru FM Media
