වත්මන් ජාතික ජන බලවේග රජය, පාස්කු ඉරිදා ප්රහාර සම්බන්ධයෙන් සත්යය සහ යුක්තිය සඳහා එහි අඛණ්ඩ කැපවීම නැවතත් තහවුරු කර ඇති බවත් එප විමර්ශන යුක්තිය සහතික කරන දිශාවකට ගෙනයාමේ අර්ථවත් පියවර ගනිමින් සිටින බවත් සඳහන් කරමින් ජනෝදානය – ශ්රී ලංකාව සංවිධානය මාධ්ය නිවේදනයක් නිකුත් කරමින් සඳහන් කරයි.
එම මාධ්ය නිවේදනය සම්පූර්ණයෙන් පහතින් දැක්වේ,
“මාධ්ය නිවේදනය
ජනෝදානය – ශ්රී ලංකාව
ඇදහිල්ලෙන් හා ලෝක ක්රිස්තියානි විමුක්ති ව්යාපාරයන්හි ආභාසය ලැබූ සිවිල් ව්යාපාරයක් සහ ජාතික ජන බලවේගයේ (NPP) පාර්ශවීය සංවිධානයක් වන ජනෝදානය, පාස්කු ඉරිදා ප්රහාර සම්බන්ධයෙන් සත්යය සහ යුක්තිය සඳහා එහි අඛණ්ඩ කැපවීම නැවතත් තහවුරු කරයි.
ආරම්භයේ සිටම, මෙම ඛේදජනක සිදුවීම් සහ ඒවායේ ගැඹුරු පසුබිම පිළිබඳව විනිවිද පෙනෙන, විශ්වාසදායක හා සම්පූර්ණ පරීක්ෂණයක් සිදු කළ යුතු බව ජනෝදානය නිරන්තරයෙන් අවධාරණය කර ඇත. මෑත මැතිවරණ ව්යාපාරයේදී, අනාගත ජාතික ජන බලවේග රජයක් යටතේ යුක්තිය සහතික කරන බව ජනතාවට පැහැදිලිව ප්රකාශ කරන ලෙස අපි ජාතික ජන බලවේගයෙන් ඉල්ලා සිටියෙමු. වත්මන් රජය එම දිශාවට අර්ථවත් පියවර ගනිමින් සිටීම අපි අගය කරමු.
මේ දක්වා ලබා ඇති ප්රගතිය අපට දිරිගැන්වීමකි. නීතිමය ක්රියාවලිය යථාර්ථවත් බැරෑරුම්කමකින් යුතුව ඉදිරියට යමින් ඇති අතර, දිනපතා පැවැත්වෙන නඩු විභාග වගවීම පිළිබඳ නව කැපවීමක් පිළිබිඹු කරයි. මෙම වර්ධනයන් පිළිබඳව ශ්රී ලංකාවේ කතෝලික සභාව ද සතුටු වන බව ඔවුන්ගේ ප්රකාශවලින් පැහැදිලි වේ.
කෙසේ වෙතත්, වසර හතක් ගතවී ඇති අතරත්, බලපෑමට ලක්වූවන් සහ ඔවුන්ගේ පවුල්වල වේදනාව තවමත් ගැඹුරු ය. යුක්තියේ ගමන් මග ප්රමාද කිරීමට, නොමගට හරවා ගැනීමට හෝ අඩපණ කිරීමට උත්සාහ කරන ඕනෑම බලවේගයකට එරෙහිව අවධානයෙන් හා සුපරීක්ෂාකාරීව ක්රියා කරන ලෙස ජනෝදානය රජයෙන් ගෞරවාන්විතව ඉල්ලා සිටී. එමෙන්ම, නීතිමය ක්රියාවලිය කඩිනමින් ඉදිරියට ගෙන යාම සඳහා අඛණ්ඩ කැපවීමක් අවැසි බව අපි තවදුරටත් අවධාරණය කරමු.
ජනෝදානය, බලපෑමට ලක් වූ සියලු දෙනා සමඟ අඛණ්ඩ සහයෝගයෙන් සිටින අතර, එදින මරා දමන ලද සියලුම සහෝදර සහෝදරියන් වෙනුවෙන් සහ තවමත් දුක් විඳින සියලු දෙනාට ලැබිය යුතු යුක්තිය වෙනුවෙන් කිතුනු ඇදහිල්ල තුළ කිසිදු පැකිලීමකින් තොර ව සැමදා පෙනී සිටින්නෙමු.
ජනෝදානය
2026.04.20”
0
Saru News
