මොසාඩ් බුද්ධි අංශයේ මීළඟ අධ්යක්ෂවරයා ලෙස ඊශ්රායල අග්රාමාත්ය බෙන්ජමින් නෙතන්යාහුගේ හමුදා ලේකම්වරයා ලෙස කටයුතු කළ මේජර් ජෙනරාල් රෝමන් ගොෆ්මන් පත් කිරීමට අනුමැතිය හිමිව ඇති බව විදෙස් මාධ්ය වාර්තා කර තිබේ.
එරට අග්රාමාත්ය කාර්යාලය නිවේදනය කර ඇත්තේ ජූනි 2 වනදා මෙම පත්කිරීමට සිදු කිරීමට නියමිත අතර වසර 5ක් සඳහා එය බලාත්මක වන බවය.
හිටපු ශ්රේෂ්ඨාධිකරණ සභාපති අෂර් ගෲනිස්ගේ ප්රධානත්වයෙන් යුත් ජ්යෙෂ්ඨ පත්වීම් උපදේශක කමිටුවේ අනුමැතිය ලැබීමෙන් අනතුරුව මෙම නිවේදනය නිකුත් කර ඇති බවද සඳහන්.
2022 වසරේදී ගොෆ්මන් ගෝලාන් කඳුකරයේ යුද හමුදා බලසේනාධිපතිවරයකු ලෙස කටයුතු කළ සමයේ සිදු වූ සිදුවීමක් කෙරෙහි එම කමිටු වාර්තාවේ වැඩි අවධානයක් යොමු වී තිබුණි.
එහිදී ඉරානයට, හිස්බුල්ලා සංවිධානයට සහ හමාස් සංවිධානයට එරෙහිව අරාබි භාෂාවෙන් සිදු කළ ප්රචාරණ ව්යාපාරයක් සඳහා 17 හැවිරිදි බාල වයස්කරුවෙකු යොදා ගැනීමට ගොෆ්මන් අනුමැතිය ලබා දී ඇත.
මෙහිදී රහස්ය තොරතුරු ප්රසිද්ධ කිරීමේ චෝදනාව මත අදාළ තරුණයා දීර්ඝ කාලයක් ආරක්ෂක අංශ භාරයේ ද පසුවිය.
කෙසේවෙතත් ගොෆ්මන් එහිදී පවසා ඇත්තේ තමා අදාළ තරුණයාගේ වයස නොදැන සිටි බවත්, සමාජ මාධ්ය සඳහා ලබා දීමට නියම කළේ රහස්ය නොවන තොරතුරු පමණක් වන බවත් ය.
මෙම සිදුවීම මත පදනම්ව කමිටු සභාපති ගෲනිස් විසින් ගොෆ්මන්ව එම තනතුරට නුසුදුසු බව නිර්දේශ කළද, කමිටුවේ අනෙක් සාමාජිකයන් තිදෙනා ප්රකාශ කළේ එම සිදුවීම ඔහුට මොසාඩ් ප්රධානියා වීමට බාධාවක් නොවන බවය.
ඒ අනුව ගොෆ්මන් ජූනි මාසයේදී විශ්රාම යන වත්මන් මොසාඩ් ප්රධානී ඩේවිඩ් බාර්නියා වෙනුවට පත්වීමට නියමිතය.
බෙලරුස් රාජ්යයේ උපත ලැබූ ගොෆ්මන් 1990 දී වයස අවුරුදු 14 දී ඊශ්රායලයට සංක්රමණය වී ඇත.
2023 ඔක්තෝබර් 7 වන දින හමාස් ප්රහාරය එල්ල වූ අවස්ථාවේදී සටන් බිමට ගිය ඔහු එහිදී බරපතළ තුවාල ලැබීය.
ඔහු නෙතන්යාහුගේ සමීපතමයෙකු ලෙස සැලකෙන අතර, හමාස් පරාජය කිරීමෙන් පසු ගාසා තීරයේ හමුදා පාලනයක් පවත්වාගෙන යා යුතු බවටද ඔහු මීට පෙර යෝජනා කර තිබුණි.
Saru News
