ශ්රී ලංකාවේ වාණිජ බැංකුවක් වන ජාතික සංවර්ධන බැංකුවේ (NDB) සිදුව ඇතැයි කියන මූල්ය වංචාව පිළිබඳ මූලික පරීක්ෂණයක් දැනට සිදුවෙමින් පවතින බව ශ්රී ලංකා මහබැංකුවේ අධිපති ආචාර්ය නන්දලාල් වීරසිංහ මහතා රජයේ මුදල් පිළිබඳ කාරක සභාවට දැණුම් දී තිබේ.
මේ දැණුම්දීම කර ඇත්තේ පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ ප්රධානත්වයෙන් පසුගිය අප්රේල් මස 07 වෙනිදා රජයේ මුදල් පිළිබඳ කාරක සභාව රැස්වූ අවස්ථාවේ එම මූල්ය වංචාව පිළිබඳ ශ්රී ලංකා මහබැංකුවෙන් කළ විමසීමකදීය.
එහිදී, අවශ්ය තොරතුරු රැස් කළ පසු හැකි ඉක්මනින් මහ බැංකුව, කාරක සභාවට මේ සම්බන්ධව වාර්තා කරන බව ද මහ බැංකු අධිපතිවරයා පවසා තිබේ.
කෙසේවුවද, මෙම සිදුවීමට සම්බන්ධ බැංකුවේ ආයතනික පාලනයේ සැලකිය යුතු අඩුපාඩු, ශ්රී ලංකා මහ බැංකුවේ අදාළ දෙපාර්තමේන්තු මගින් සිදුකළ යුතු අධීක්ෂණයේ අඩුපාඩු සහ තොරතුරු වාර්තා කිරීමේ ප්රමාදයන් පිළිබඳව කාරක සභාවට නිරීක්ෂණය වී ඇති අතර ඒ සම්බන්ධ දැඩි අවධානය හා විමර්ශනයට ද තීන්දුවී ඇති බව පැවසේ.
එවැනි අඩුපාඩු පිළිගත නොහැකි බව කාරක සභාව මහ බැංකු අධිපතිවරයාට අවධාරණය කර ඇති අතර එම තත්ත්වයන් වහාම නිවැරදි කිරීමට පියවර ගත යුතු බවට උපදෙස් ලබාදී තිබේ.
මෙම කාරණය සමීපව නිරීක්ෂණය කිරීම අඛණ්ඩව සිදුකරන බවත්, පූර්ණ වගවීම, විනිවිදභාවය සහ මූල්ය පද්ධතිය කෙරෙහි මහජන විශ්වාසය ආරක්ෂා කිරීම සහ සහතික කිරීම සඳහා අධීක්ෂණ කටයුතු සිදුකරන බවත් කාරක සභාව විසින් අවධාරණය කර ඇත.
ශ්රී ලංකා මහ බැංකුව නෛතික අවශ්යතා අනුව මාස හතරකට වරක් පාර්ලිමේන්තුවේ පෙනි සිටිය යුතුය.
ඒ අනුව ශ්රී ලංකා මහබැංකුවේ අධිපති ආචාර්ය නන්දලාල් වීරසිංහ මහතා, පාලක මණ්ඩලයේ සහ මුදල් ප්රතිපත්ති මණ්ඩලයේ සාමාජිකයින් මෙන්ම ජ්යෙෂ්ඨ නිලධාරීන් පිරිසක් මෙම රැස්වීමට සහභාගී වූහ.
එහිදී NDB බැංකුවේ සිදුවී ඇතැයි කියන මූල්ය වංචාව පිළිබඳ මෙහිදී කාරක සභාවේ අවධානය යොමු වූ බව පාර්ලිමේන්තු සන්නිවේදන දෙපාර්තමේන්තුව සඳහන් කරයි.
සබැඳි පුවත්:
Saru News
