පැවති යුදමය තත්වය මත වසර 34ක් පුරා වසා තිබූ යාපනය, වසාවිලාන් – පලාලි මාර්ගය, ප්‍රදේශවාසීන්ගේ සහ මහජනතාවගේ දැඩි ඉල්ලීම මත අද (10) උදෑසන සිට යළි විවෘත කිරීමට කටයුතු කර තිබේ.
මෙම මාර්ගය අධි ආරක්ෂක කලාපයක් සහ යුද හමුදා නිල නිවාස හරහා දිවෙන බැවින් ආරක්ෂක හේතුන් මත නීතිරීති මාලාවක් යටතේ මහජනතාවට විවෘත කිරීමට පියවර ගෙන ඇති අතර මෙම මාර්ගය මහජනතාවට විවෘත වන්නේ උදෑසන 6.00 සිට සවස 5.00 දක්වා පමණි.
මෙම මාර්ගය ඔස්සේ ගමන් ගන්නා මගීන් සහ රියදුරන් අවශ්‍ය වූ ඕනෑම මොහොතක දී සිය අනන්‍යතාවය තහවුරු කිරීමට සුදානමින් සිටිය යුතුය.
අදාළ මාර්ගයේ කිසිවිටෙකත් පයින් ගමන් කිරීම හෝ පාපැදියෙන් ගමන් කිරීම තහනම් වන අතර මගී ප්‍රවාහන බස්රථ හැර අනෙකුත් බර වාහන කිසිවක් ධාවනය කළ නොහැකිය.
එමෙන්ම කිසිවිටෙකත් රථ වාහන මාර්ගයේ නවතා තැබීමක් හෝ හැරවීමක් සිදුකළ නොහැකිය.
කිසිදු මොහොතක ඡායාරූප ගැනීම හෝ පටිගත කිරීම තහනම් කර ඇත.
මේ අතර ධාවනය කළ හැකි උපරිම වේගය පැයට කිලෝ මීටර් 40ක් බවද දැනුම් දී තිබේ.
මාර්ගය ආරම්භක ස්ථානයේ මෙම නීතිරීති සඳහන් කරමින් දැන්වීම් පුවරුවක් සවිකර ඇති අතර එහි වැඩිදුරටත් සඳහන් කර ඇත්තේ ඉහත සඳහන් නීතිරීත කඩකරන පුද්ගලයින්ට එරෙහිව නීතිමය පිවර ගන්නා බවය.
Saru FM Media
