ලෝක වෙළෙඳපොළේ රන් මිලෙහි හදිසි පහත වැටීමක්

ඉරාන යුද්ධය අවසන් කිරීම පිළිබඳව අමෙරිකානු ජනාධිපති ඩොනල්ඩ් ට්‍රම්ප් පැහැදිලි ප්‍රකාශයක් සිදුනොකිරීම හේතුවෙන්, දින හතරක් පුරා ඉහළ යමින් පැවති රන් මිල අද (02) 1% කට වඩා වැඩි අගයකින් පහත වැටී තිබේ.

ලෝක වෙළෙඳපොළේ රන් මිල 1.3% කින් පහත වැටී අවුන්සයක් අමෙරිකානු ඩොලර් 4,694.48 ක් ලෙස සටහන් විය.

අමෙරිකානු රන් මිල ද 1.9% කින් පහත වැටී ඩොලර් 4,723.70 ක් දක්වා අඩු වී තිබේ.

ඉදිරි සති දෙක තුන ඇතුළත ඉරානයට “ඉතා දැඩි ලෙස” පහර දෙන බවටත්, ඔවුන්ව “ශිලා යුගයට” ඇද දමන බවටත් ජනාධිපතිවරයා කළ ප්‍රකාශය ආයෝජකයින්ගේ දැඩි අවධානයට ලක්ව ඇති බව සඳහන් වේ.

යුද්ධය අවසන් වනු ඇතැයි පැවති බලාපොරොත්තු බිඳ වැටීම රන් මිල පහත වැටීමට ප්‍රධාන හේතුවක් වී ඇත.

රන් මිල පහත වැටීමට සමගාමීව බොරතෙල් මිල 4% කින් ඉහළ ගිය අතර අමෙරිකානු ඩොලරයේ අගය ද ශක්තිමත් විය.