කොළඹ LNW:රක්ෂිත බන්ධනාගාර ගතකර සිටි පාර්ලිමේන්තු මන්ත්‍රී චාමර සම්පත් මහතා ඇප මත නිදහස් කිරීමට කොළඹ මහේස්ත්‍රාත් අධිකරණය නියෝග කර තිබේ.
ඒ, එම නඩුව අද (08) කොළඹ ප්‍රධාන මහෙස්ත්‍රාත් තනූජා ලක්මාලී මහත්මිය ඉදිරියේ කැඳවනු ලැබූ අවස්ථාවේදීය.
2016 වසරේ ඌව පළාත් සභාවේ ප්‍රධාන අමාත්‍යවරයා වශයෙන් කටයුතු කරමින් එම පළාතේ පෙර පාසල් දරුවන්ට බෑග් ලබාදීම සඳහා රාජ්‍ය බැංකුවක් අනුග්‍රහයක් ඉල්ලා එම බැංකුව විසින් එය ප්‍රතික්ෂේප කිරීමෙන් පසුව අදාළ පළාත් සභාවට අයත් ස්ථාවර තැන්පතු ගිණුම් 06ක් කල්පිරීමට පෙර ඉවත් කිරීම තුළින් අදාළ පළාත් සභාවට රුපියල් ලක්ෂ 173කට අධික පාඩුවක් සිදුකිරීම ඔහුට එල්ල වී තිබෙන චෝදනාවයි.
දුෂණ චෝදනා විමර්ශන කොමිසම විසින් මන්ත්‍රීවරයාට චෝදනා ගොනුකර ඇත.
නඩුව කැඳවූ අවස්ථාවේදී අල්ලස් කොමිසමේ නීති නිලධාරිනිය අධිකරණය හමුවේ කරුණු දක්වමින් ඉල්ලා තිබුණේ මෙම සිද්ධියට අදාළ මූලික විමර්ශන අවසන් කර තිබෙන බවත් සැකකරු සම්බන්ධයෙන් අධිකරණයට සුදුසු යැයි හැඟෙන නියෝගයක් නිකුත් කරන ලෙසත්ය.
කරුණු සලකා බැලූ අධිකරණය සැකකරුව රු.50,000ක මුදල් ඇපයක් සහ මිලියන දෙක බැගින් වූ ශරීර ඇප පහක් මත මුදාහැරීමට නියෝග අකර තිබේ.
එමෙන්ම සැකකරුට විදේශ ගමන් තහනම් කිරීමට ද නියෝග කර ඇත.
ආශිකා බ්‍රාහ්මණ
Saru FM Media
