සටහන – රුවන් නෙළුගොල්ල
තම ආණ්ඩුව බලයට පැමිණෙද්දී මහා භාණ්ඩාගාරය සතුව ඇමරිකානු ඩොලර් මිලියන 20 ක්වත් නොතිබුණු බවත් ගතවූ මාස හතර තුළ සංචිත ඩොලර් මිලියන 6190ක් දක්වා ඉහළ නැංවීමට තම ආණ්ඩුවට හැකිවුණු බවත් වෘත්තීය අධ්‍යාපන නියෝජ්‍ය අමාත්‍ය නලින් හේවගේ මහතා පවසයි.
“සමහර කට්ටියට දැන් තදියම් වෙලා තියෙනවා. ආණ්ඩුව හැදුවෙ නොවැම්බර් 21, අදට මාස 4යි දින 14යි. හැබැයි අපට සතුටු වෙන්න පුළුවන් ඉතිහාසයේ කිසිම ආණ්ඩුවක් නොකරපු දැවැන්ත අඩි තියලා හොඳ ගමනක් අපි ආරම්භ කරලා තියෙනවා මේ මාස හතරට විතරක්. අපි එනකොට භාණ්ඩාගාරයේ සංචිත ඩොලර් මිලියන 20ක් නැතිව තිබුණේ. දැන් අම්මාපල්ලා තියෙනවා ඩොලර් මිලියන 6190 ක්. ගහපු අප්පුඩිය නම් සැර මදි වගේ. ඩොලර් මිලියන 20ක් නැති තැනක 6190ක් ගත්තට පස්සෙ නිකම් උළු කැට දෙකක් තුනක් පහළට වැටෙන්න ගහන්න එපැයි හත් ඉලව්වේ ගාල්ලෙ අපි අප්පුඩියක්”
නලින් හේවගේ නියෝජ්‍ය අමාත්‍යවරයා මේ බව පැවසුවේ ඊයේ (අප්‍රේල් 07) ගාල්ලේදී පැවති මැතිවරණ ප්‍රචාරණ රැස්වීමක් අමතමිනි.
නියෝජ්‍ය අමාත්‍ය නලින් හේවගේ මහතාගේ මෙම ප්‍රකාශය සම්පූර්ණ අසත්‍යයක් වන අතර ජාතික ජන බලවේගය පාර්ලිමේන්තු මැතිවරණයෙන් ජයග්‍රහණය කළ 2024 නොවැම්බර් මාසය වෙද්දීත් ශ්‍රී ලංකාවේ විදේශ සංචිත ඇමරිකානු ඩොලර් මිලියන 6472 ක්ව පැවතිණි.
Saru FM Media
