ආනයනික හා දේශීයව නිෂ්පාදනය කරනු ලබන සියලුම ඖෂධවල මිල ගණන් ඉහළ දමන ලෙස ඖෂධ නිෂ්පාදන හා ආනයන සමාගම් රජයෙන් ලිඛිතව ඉල්ලා ඇතැයි වාර්තා වේ.
විදේශ විනිමය අනුපාත ඉහළ යාම, නිෂ්පාදන වියදම්, ප්රවාහන සහ රක්ෂණ ගාස්තු ඉහළ යාම ආදී කාරණා සැලකිල්ලට ගෙන දැනට මිල පාලනයට යටත් කොට තිබෙන ඖෂධ වර්ග 60 හි මිල ගණන් සියයට හතකින්වත් (7%) ඉහළ නංවන ලෙස මෙම සමාගම් සෞඛ්ය අමාත්යංශයේ ලේකම් විශේෂඥ වෛද්ය අනිල් ජාසිංහ මහතා වෙත ලිපි යොමු කරමින් මේ ඉල්ලීම කර තිබේ.
ඖෂධ වර්ග හැටකට මිල පාලනයක් දමන විට ඇමරිකානු ඩොලරය රුපියල් 295 ට පැවැති බවත් ඊයේ (24) වනවිට ඩොලරයේ අගය රුපියල් 317.5 දක්වා ඉහළ ගොස් ඇති බැවින් ඖෂධ ආනයනයේදී අමතර වියදමක් දැරීමට සිදුව ඇතැයි ශ්රී ලංකා ඖෂධ කර්මාන්ත මණ්ඩලයේ සභාපති ශාන්ත බණ්ඩාර මහතා මාධ්යට පවසා තිබේ.
ඒ අනුව දැනට පාලන මිලක් නියම කර තිබෙන ඖෂධ වර්ග හැටෙහි මිල ගණන් සියයට හතකින්වත් ඉහළ දැමිය යුතු තත්ත්වයක් ඇතිවී ඇතැයිද අනෙකුත් ඖෂධ වර්ග ගෙන්වීමේදී නිෂ්පාදන වියදම් ඉහළ යාම, නෞකා ගාස්තු, රක්ෂණ ගාස්තු හා ඉදිරියේදී විදුලි ගාස්තු ඉහළ යාම නිසා ඖෂධ ආනයනික පිරිවැය වැඩිවී ඇතැයිද ඔහු කියා සිටී.
මෙරටට අවශ්ය අත්යවශ්ය හා අනෙකුත් ඖෂධ වර්ග 1800 ක් පමණ ආනයනය කරන අතර පවතින තත්ත්වය හමුවේ ඒවා ගෙන්වීමට යන පිරිවැය වැඩිවී ඇතැයිද ඔහු සඳහන් කරයි.
මේ අතර දේශීය ඖෂධ නිෂ්පාදකයන්ගේ සංගමයද සෞඛ්ය ලේකම්වරයා වෙත ලිපියක් යොමු කරමින් ඖෂධ මිල වැඩි කිරීමට ඉඩ දෙන ලෙස ඉල්ලා ඇතැයි වාර්තා වේ.
දේශීයව සකසන ඖෂධ බහාලන ඇසුරුම්වල සිට සියලුම අමුද්රව්යවල මිල ගණන් සහ නිෂ්පාදන පිරිවැය වැඩිවීම නිසා මිල වැඩි කිරීමට සිදුව ඇතැයිද දේශීය ඖෂධ නිෂ්පාදකයෝ කියන බව පැවසේ.
දේශීයව ඖෂධ වර්ග 250 ක් පමණ නිපදවන බවද ඔවුහු කියා සිටිති.
එවැනි ඖෂධ නිෂ්පාදන සමාගම් දහතුනක් මෙරට ක්රියාත්මකය.
Saru News
