කොරෝනා වසංගතය ලෝකය ගිල ගත්තත් පුංචි පැටවුන්ට මේ ගැන වගක් විභාගයක් නැහැ.වෙනදා වගේ අම්මා, තාත්තා එන පෙරමගට ගොස් අතේ එල්ලෙන්න අවසර නැහැ.නිවාඩු දවසකටවත් එලියට ගිහින් විනෝද වෙන්න අද හිතන්නවත් බැහැ.හෙට අනිද්දා ඉවර වෙයි කියලා කාලරාමුවක් නියම කරන්න බැරි මෙම වසංගත උවදුර සමග පොඩ්ඩන්ගේ කෑම බීම ගැන ගැටුම්ද ඇති නොවෙනවාම නොවෙයි.නමුත් මෙතැනදී දෙමව්පියන් විදිහට දරුවන්ගේ සතුට ,පෝෂණය වගේම පවතින තත්වයේ අවදානම හොදින් දැනගෙන දරුවන්ගේ සතුට ගැනත් අවධානයක් දැක්වීම ඉතාම වැදගත්.
ගෙදරට අවශ්‍ය බඩු මුට්ටු අරගෙන එන අම්මා,තාත්තා අත් සෝදාගන්නා තෙක් දරුවන් ස්පර්ශ කිරීම පුංචි වේලාවකට සීමා කරන බව ඔවුන්ට තේරුම් කරන්න.හැමදාම නගරයට යද්දී දරුවන් පිරිවරාගෙන ගියත් අද දරුවන් නිවසට සීමා කරලා තාත්තා විතරක් ටවුමට යන්නේ ඇයි කියන බවත් දරුවන් දැනගත යුතුයි.ලෝකය පුරා යන වසංගතයෙන් අපි හැම දෙනෙක්ම ආරක්ෂාවෙන් සිටිය යුතු බවට දරුවන් දැණුවත් කිරීම මිසක ඉහළ යන මරණ ගැන කියමින් පුංචි හිත් බියට පත් කිරීම එතරම් සුදුසු නැහැ.මේ වසංගතයෙන් පුතාගේ අම්මා,තාත්තා මැරෙයි ..එහෙම වුනොත් ඔයාට තනියම ඉන්න වෙයි කියන අසුබ සිතුවිලි දරුවාගේ හිතට ඇතුල් කරන්න එපා.ඒ වෙනුවට අපි විෂබීජවලින් ආරක්ෂා වුනොත් මේ වසංගතයෙන් බේරෙන්න හැකියාවක් තිබෙනවාය යන සුබ සිතුවිල්ල ඔවුන්ගේ හිතට ඇතුළු කිරීම අපහසු නැහැ.මේ සිතුවිල්ල දරුවාගේ හිතට දැණුනාම ඔවුන්ද වෛරසයෙන් ආරක්ෂා වීම ගැන යම් සංකල්පයක් ගොඩ නගා ගන්නවා.
වෙනදාට නම් ඇති හැකි අයට මේ ගැන කිසිම ගැටළුවක් තිබුනේ නැහැ. එක්තරා කතාවක දැක්වෙන ‘‘ධනිය ගෝපාල“සිටුවරයා වගේ පිසින ලද බත් ඇත…දොවන ලද කිරි ඇත..ඒ නිසා වැස්සට වහින්න ආරාධනා කිරීම පමණක් නොව ගංවතුර ගලන තෙක් වැස්සත් කමක් නැත කියන සාහිත්‍ය කතාව අදට ගැලපෙන්නේ නැහැ.සෙනග සමග ගැවසීමට අද අවසර නැති නිසා නිවසට ගෙනෙන කළමනා පරිස්සමින් පාවිච්චි කිරීමත් වැදගත්.ඒ නිසා බත්,ව්‍යංජන පිලියෙල කිරීමේදී යම් පිරිමැස්මක් පවත්වා ගැනීම අවශ්‍ය වෙනවා.
සාමාන්‍ය බතක් පිළියෙල කළ විට ඒ වෙනුවෙන් ව්‍යංජන දෙක තුනක් අවශ්‍යයි.ඒ නිසා උදේට කිරිබතක්, රාත්‍රියට ඉදිආප්ප, නූඩ්ල්ස් හෝ එලවළු බතක් පිලියෙල කර ගන්න පුලුවනි.ඒ වගේම කොස්, පොළොස් වැනි වත්තෙන් පිටියෙන් හොයා ගත හැකි අයට මේවායින් රසවත් ව්‍යංජන විවිධ විදිහට සකස් කර ගන්න කාගෙන්වත් බාධාවක් නැහැ. කොස් වුනත් මැල්ලුම, ව්‍යංජන හෝ කිරිකොස් වගේ හදාගන්නත් පුලුවනි.
මේ ගැන නම් බොහෝ දේ කතා කරන්න පුලුවනි. මුලින්ම ඔබේ ගමේ තිබෙන පුංචි කඩය අමතක කරන්න එපා. සුපිරි වෙළදසැල්වලින් ද්‍රව්‍ය මිළට ගැනීමේ වාසි තිබෙන බව ඇත්ත.ඒත් කිලෝමීටර් ගණනක දුර පෝලිමේ යනවා වෙනුවට ගමේ කඩයෙන් ගනුදෙණු කරද්දී එබේම අසල්වැසියාටත් ආදායමක් ලැබේවි.ගමේ පළතුරක වුනත් තවම විශ්වාසයක් තියන්න පුලුවනි.ඊටහේතුව පුංචි කඩේ මුදලාලිගේ කඩේට එන්නේ කෙසෙල් කැනක්,පැපොල් ගෙඩි තුන හතරක් ,අනෝදා ගෙඩි කීපයක් වගේ සුලුවෙන් නිසා ඒවා ඉදවන්න බේත් ඇත්තෙත් නැතිබවට පිලිගැනීමක් තිබෙනවා.ඒ නිසා නිවසට අවශ්‍ය හාල්,තුනපහ,සීනි වගේ දේවල් වෙනුවෙන් ගමේ කඩපිළට යන්න පුලුවනි.
සුපිරි වෙළදසැලේ රාක්ක හිස් වෙනකම්ම බඩු ගත්තත් නිවසට ගිහිං බැලුවොත් දවස් දෙක තුනක්වත් පිරිමහ ගන්න බැහැ.ඇයි ඉතිං බඩු දැක්කාම ‘‘පැනික්“ වෙනවා. ඒ නිසා වෙලදසැලට යන්න පෙරාතුව අවශ්‍ය බඩු ලැයිස්තුවක් සකස් කර ගන්න.
මේ බඩු ලැයිස්තුවට හාල්වලට අමතරව කල් තබා ගත හැකි නූඩ්ල්ස්,පැස්ටා,ඕට්ස්,සැමන්,කරවල,හාල්මැස්සන් වැනි දේ ඇතුලත් කරන්න.ඉස්සර වගේ පාන්,බනිස් අවශ්‍ය වේලාවට නැති නිසා පාන්පිටි, ආටා පිටි වගේ දෙවල්ද ඇතුලත් කරන්න.හදිසියකට බිස්කට් වර්ගත් මිළට ගත්තොත් හොදයි.ඇයි අපේ බඩගිනි පැටවුන්ට හදිසියකට එපායැ.
මේ දවස්වල පාසල වගේම කන්තෝරුවලටත් නිවාඩු. අම්මා වගේම දරුවන් නිවසේ ඉන්න අවස්තාවක්. රටේ තත්වය නිසා ගමන් බිමන් නැති නිසා අතපසු වුන වැඩකොටස් ලැබුන කාලවේලාවෙන් කර ගන්නත් පුලුවනි. මල්වවන්න, නිවස පිරිසිදු කරන වැඩ කොටස්වලට දරුවනුත් හවුල් කර ගෙන කරගන්න පුලුවන් විරල නිවාඩුවක් දැන් ඔබට ලැබිලා තිබෙනවා.
Saru FM Media
