පවුලකට අලුත් අමුත්තෙක් එකතු වෙනවා කියන සුබ ආරංචිය අම්මාට තාත්තාට බොහාම සතුටක්.ඒත් කුසට පැමිනි පමණටම දරුවා බිහි කිරීම සාර්ථක දෙමව්පියන්ගේ ගති ලක්ෂනයක් නොවෙයි.දරුවෙකු ලැබෙන පෙර නිමිති පහල වෙලත් මාස නවයක් පමණ කාලයක් පුරා ඒ වෙනුවෙන් සැලසුම් හදා ගන්න පුලුවනි. ඒ නිසා දෙමව්පියන් විදිහට ඔබ පුංචි අමුත්තා වෙනුවෙන් හැඩ ගැහෙන්නේ කෙසේද..?
පැටියා කුස පිලිසිඳ ගත් තැන පටන් මෙලොව එලිය දකින තුරු පමණක් නොවෙයි,එයින් පසුවත් අපට විය පැහැදම් බොහොම වැඩියි.ඒ නිසා දෙමව්පියන් විදිහට යම් මුදලක් අත මිට තබා ගැනීම ඉතාම වැදගත්.ගැබ දරණ අම්මාගේ වගේම පුංචි පැටියෙක් නිවසේ ඉන්නා විට කොයි වේලාවක මුදල් උවමනා වෙයිද දන්නේ නැහැ.
දරුවෙකු ලැබෙන්න සිටියදී කල් තබා ඇඳුම් පැලදුම් සුදානම් කිරීම ගැන විවිධ මත තිබුනත් රෝහලට යන්න ආසන්න වෙද්දී නම් ළදරු කමිස ,නැප්කින් ආදිය සූදානමින් තබා ගන්නම වෙනවා.එහෙම නැතුව දරුවා ලැබෙන්න සුතිකාගාරයට අම්මා ඇතුලු කලාට පසුව පැටියා වෙනුවෙන් ඇදුම් හොයන තාත්තලාත් ඉන්නවා. ඒ නිසා කල් තබා ඇදුම් සහ අවශ්‍ය දේ සූදානම් කර ගෙන තබා ගන්න.
වෙනදා සැමියා සහ බිරිඳ මොනවා හෝ රත් කර ගෙන කෑමෙන් පසුව නින්දට ගියත් දැන් එහෙම බැහැ. පුංචි අමුත්තාගේ වැඩ කෝටියයි.එයාට අම්මා තාත්තාගේ වෙලාව ගැන තේරුමක් නැහැ.ඒ හින්දා අම්මයි තාත්තයි දෙන්නම එකතු වෙලා පැටියාගේ වැඩ කොටස් සහයෝගයෙන් කරනවා නම් මොන තරම් අගෙයිද නේද..?
පැටියා දවල් රෑ දන්නේ නැහැ. ඒ විතරක් නොවෙයි. පැටියා දවල් කාලයට හොදට නිදා ගෙන රාත්‍රියේ අවදිව ඉන්නවා.මේ වෙලාවට අම්මාටම නිදි මරන්න දෙන්න එපා. තාත්තාත් සලාක ක්‍රමයට හෝ පැටියා වෙනුවෙන් අවදිව ඉන්නවා නම් අම්මාටත් සතුටුයි.
දරුවා ලැබුනාට පසුව සිදු වෙන හෝර්මෝන වෙනස්කම් නිසා සමහර විට අම්මාගේ මානසික තත්වයත් වෙනස් වෙනවා.අවිවේකය නිසා මේ තත්වය තවත් වැඩි වෙන්න පුලුවනි.ඒ හින්දා තාත්තාත් අම්මාට විවේකයක් දුන්නොත් හෝර්මෝන අසමතුලිතතාවය නිසා ඇති වෙන ව්‍යාකූල තත්වය ටිකකින් හෝ පිරිමැසේවි.
පුංචි පැටියා අඬන විවිධ හේතු තිබෙනවා.එයාලගේ භාෂාව ඇඬීමයි. අම්මා තාත්තා බබාගේ භාෂාව තේරුම් ගැනීම ඉතාම වැදගත්.ඒ නිසා කුසගින්න,මල මුත්‍ර පිටවීම වගේම බඩ පුරවා දැමීම,ඇදුම්වල අපහසුව වගේ දේවල් නිසාත් අඬන්න පුලුවන්. මේවා ගැන දෙමව්පියන් විදිහට ක්‍රමයෙන් අවබෝධ කර ගැනීම වැදගත්.
සමහර වෙලාවට වැඩිහිටියන්ගේ උපදෙස් නිසා අම්මා ,තාත්තා අසරණ වෙන වෙලාවල් තිබෙනවා.හැබැයි වැඩිහිටියන්ගේ අදහස් හැම එකක්ම පරණයි කියලා ඉවත දාන්නත් බැහැ.ඒ වගේම පබලු වැල් දැමීම, මුදු දැමීම වැනි සමහර දේවල් නම් කිසිම විදිහකින් ප්‍රායෝගික නැහැ.ඒ විතරක් නොවෙයි, දරුවාට පහසුවක් ඇති වෙන්නෙත් නැහැ.
හැබැයි සවස් කාලයට පෙරාතුව පැටියාගේ ඇදුම් නිවසට ගැනීම, රෙදි මිරිකන්නේ නැතුව වනන්. වැනි යම් යම් දේවල් තුළ විදයාත්මක ඇත්තක් තියෙනවා.ඒ නිසා හරි දේ වැරදි දේ තෝරා බේරා ගෙන ගනුදෙණු කරන්න.
සමහර විට ඔබේ පැටියාට මාසයක් එහෙම නැත්නම් සතියක් පමණ ගෙවිලා උපත ලැබූ ඔබේ අසල්වැසියාගේ එහෙම නැත්නම් ඥාතියෙකුගේ දරුවාගේ වර්ධනය ඔබේ දරුවාට වඩා ප්‍රගතියක් පෙන්වන්න පුලුවනි.ඒ ගැන කලබල වෙන්න එපා.යම් විදිහකින් පසුබැස්මක් ඇතැයි හිතෙනවා නම් පවුල් සෞඛ්‍ය නිළධාරී මහත්මියගෙන් මුලික උපදෙස් ලබා ගන්න. එහෙම නැතුව විස්සෝප වෙන්න කරුණු හොයන්න එපා.
දැන් ඉතින් අපි දෙමව්පියෝ…කියලා ඉස්සර ඔබ දෙදෙනා අතර තිබුන බැදීමත් දුරස් කර ගන්න එපා.දරුවා ඔබේ ලෝකය සම්පූර්ණ කලා සේම දරුවාගේ ලෝකය සම්පූර්ණ වෙන්නේ අම්මාගේ තාත්තාගේ ආදර බැදීම නිසයි.පවුල සොඳුරු කැදැල්ලක් වේනනේ එවිටයි.ඒ නිසා සැමියා සහ බිරිද අතර ආදාර සම්බන්ධතාවය වගේම පැවැත්ම දිගින් දිගටම පවත්වා ගැනීම ඉතාම වැදගත්.දරුවා ඔබේ ජීවිතයට ලබා දුන් සුන්දරත්වය සම්පූර්ණ වෙන්නේ එවිටයි.
Saru FM Media
