අද (07) පස්වරු 04.30 නව පාප් වහන්සේ තෝරා පත් කරගැනීමේ ඡන්ද විමසීමේ ක්‍රියාවලිය ආරම්භ වීමට නියමිත ව තිබෙනවා.
වතිකානු මාධ්‍ය වාර්තා කළේ මෙලෙස අද දිනයේ දී තෝරාපත් කරගනු ලබන්නේ 267 වැනි කතෝලික පල්ලියේ පාප් වහන්සේ බවයි.
මෙම ඡන්දය කාදිනල්වරුන්ගේ රහස් සමුළුවකින් පසුව ආරම්භ වනවා.
වතිකානයේ මයිකල් ආන්ජිලෝගේ සිතුවමින් පූර්ණ ලෙස සැරසුණු සිස්ටයින් දේවස්ථානයේ ගෝලාකාර සිවිලිම යට දී අද මෙම නිලවරණය පැවැත්වෙනු ඇති.
ඊට කාදිනල්වරුන් 133 දෙනෙකු සිය ඡන්දය භාවිත කිරීමට සුදුසුකම් ලබා සිටිනවා.
මෙම කාදිනල්වරුන්ගේ රහස් සමුළුව අද පෙරවරු 10ට එරට වේලාවෙන් ආරම්භ වන්නේ ශාන්ත පීතර බැසිලිකාවේ දිව්‍ය පූජාවකින් අනතුරුවයි.
එය ෆ්‍රැන්සිස් පාප් වහන්සේගේ අවමංගල්‍ය උත්සවය පැවැත්වූ 91 හැවිරිදි කාදිනල් පීඨාධිපති ජියෝවානි බැටිස්ටා රේ විසින් මෙහෙයවනු ලබනවා.
දහවල් කාලයේ දී, සම්මේලනයට සහභාගී වන කිසිවෙකු බාහිර ලෝකයට සම්බන්ධ වීම වැළැක්වීම සඳහා වතිකානු භූමිය තුළ ජංගම දූරකථන සංඥා අක්‍රීය වනු ඇති.
Saru FM Media
