ප්‍රවීණ චිත්‍රපට අධ්‍යක්ෂිකා සුමිත්‍රා පීරිස් නිර්මාණය කොට ආචාර්ය ලෙස්ටර් ජේම්ස් පීරිස් නිෂ්පාදන මෙහෙවරින් දායක වුණු ‘ගැහැනු ළමයි’ චිත්‍රපටය 2025 අවුරුද්දේ පැවැත්වීමට නියමිත කෑන්ස් චිත්‍රපට උළෙලේදී තිරග කිරීම සඳහා තෝරාගෙනයි කියලා දැනගන්න ලැබුණා. Sri Lanka Latest News
ඒ නිවුස් එක ඇත්තටම සිංහල සිනමා ලෝලීන්ට සතුටුදායක ආරංචියක් බව නොකියාම බැහැ.
සතුටට හේතු පාඨය වුණේ ලංකාව පුරාම චිත්‍රපට හෝල් විසි තිස් ගානක් වැහිලා සිංහල සිනමාව කඩාවැටිලා තියෙන කාලයක දශක ගණනක් පැරැණි අපේ චිත්‍රපටයකට ජාත්‍යන්තර අගැයීමක් ලැබෙනවාය කියන එක ලොකු ගැම්මක් තමයි ඉතින්.
මේ වෑයම වෙනුවෙන් උරදුන්නේ චිත්‍රපට උරුමය සුරැකීමේ පදනම (Film Heritage Foundation) විසිනුයි. එය ඔවුන්ගේ සුවිශේෂ ජයග්‍රහණයක් බවයි සිනමා විචාරකයන් පෙන්වා දෙන්නේ.
1978 අවුරුද්දෙදිත් ‘ගැහැනු ළමයි’ ලන්ඩන් නුවර පැවැති චිත්‍රපට උළෙලකදී විශිෂ්ටතම චිත්‍රපටයට හිමි සම්මානයටද පාත්‍ර වුණා.
ඇවැස්ස නෑකමක අයිතියට අනුව පෙමක පැටලෙන තරුණ යුවලක් වටා ගෙතුණු මෙහි කතා පුවතට පන්ති අරගලය සහ තරුණ වියෙහි දූපුතුන් මුහුණ දෙන සාම්ප්‍රදායික ගැටලුද ඇතුළත්ය. සුමිත්‍රා පීරිස් මහත්මිය විසින්ම සොයාගත් සිනමා කුසුම වූ වසන්ති චතුරාණි නිළියක ලෙස දොරට වැඩියේ ‘ගැහැනු ළමයි’ තුළින්ය. එවක වසන්තිගේ වයස යන්තම් 16 පිරුණා පමණය. අජිත් ජිනදාස, ජෙනිටා සමරවීර සමග ශ්‍යාමා ආනන්දද නව යෞවනය නියෝජනය කරමින් මේ සොඳුරු සිනමා පටයට මිහිරිතම රංගන දායකත්වයක් ලබාදුන්නේ ටි්‍රලීෂියා ගුණවර්ධන, චිත්‍රා වාකිෂ්ඨ, ලොයිඩ් වාකිෂ්ඨ වැනි ප්‍රවීණයන් පිරිවරා ගනිමින්ය.
ප්‍රවීණ සංගීතඥ නිමල් මෙන්ඩිස්ගේ රසයෙන් හැඩවූ මියුරු සංගීත රටා මේ අලංකාර සිනමා පටයට දුන් මිහිර මනහරය. හිතට වදින කෝණ ඇසට හසුකර ගනිමින් කැමරාව මෙහෙයවූයේ ශ්‍යාමා ආනන්දගේ පියා වූ ප්‍රවීණ කැමරා අධ්‍යක්ෂ එම්.එස්. ආනන්දයන්ය. වාණිජ ගණයේ චිත්‍රපටයක් ලෙස නිර්මාණය නොවුණද ‘ගැහැනු ළමයි’ බොක්ස් ඔෆිස් චිත්‍රපට අතර වාර්තා තැබුවේය.
2025 ප්‍රංශ කෑන්ස් උළෙලේදී තිරගත වීමට නියමිත සම්මානනීය ‘ගැහැනු ළමයි’ සිනමා පටය ඒ වෙනුවෙන් ප්‍රතිසංස්කරණය කිරීමේ මෙහෙවරට රටවල් කිහිපයකම පුරෝගාමීත්වයෙන් තැනුණු ජාත්‍යන්තර සහයෝගීතාවක් වන FISCH හි දායකත්වය ද ශ්‍රී ලංකාවේ චිත්‍රපට සුරැකීමේ පදනමේ දායකත්වයද නොමසුරුව තිළිණ කොට තිබිණි.
මල්මි කෞෂල්‍යා
Saru FM Media
