හිටපු රාජ්‍ය අමාත්‍ය ප්‍රසන්න රණවීර මහතා අත්අඩංගුවට ගැනීම සඳහා දිවයින පුරා විවිධ ස්ථාන දහයක් පරීක්ෂා කර ඇතත්, මේ වනතුරු ඔහු පිළිබඳ කිසිදු තොරතුරක් අනාවරණය වී නොමැති බව අපරාධ පරීක්ෂණ දෙපාර්තමේන්තුව ප්‍රකාශ කරයි.
මෙම සෝදිසි මෙහෙයුම් මාවර, මණ්ඩිය, කිරිබත්ගොඩ, කිරිල්ලවල, මීගමුව, ගම්පහ, කැලණිය සහ වත්තල ඇතුළු ප්‍රදේශ දහයක් පුරා පැවැත්වූ බව
අපරාධ පරීක්ෂණ දෙපාර්තමේන්තු ආරංචි මාර්ග සඳහන් කරයි. ඒ අනුව, රණවීර මහතා සොයා ගැනීම සඳහා විවිධ වෙස්ගත් බුද්ධි අංශ කණ්ඩායම් කිහිපයක් ද විවිධ ප්‍රදේශ කරා යොමු කර ඇති බව පොලිසිය පැවසීය.
මේ අතර, පාතාල නායක ගනේමුල්ල සංජීව නමැත්තා කොළඹ අලුත් කඩේ උසාවි සංකීර්ණයේදී ඝාතනය කිරීමේ සිද්ධියට සම්බන්ධ යැයි සැක කෙරෙන ඉෂාරා සෙව්වන්දි නමැත්තිය සොයා ගැනීම සඳහා ද දිවයින පුරා විවිධ ස්ථාන දෙසීයකට ආසන්න සංඛ්‍යාවක් පරීක්ෂා කර ඇතත්,
ඇය පිළිබඳව ද කිසිදු සාධක හෝඩුවාවක් මේ වන තුරු ලැබී නොමැති බව උසස් පොලිස් නිලධාරියෙකු ප්‍රකාශ කළේය. මෙම සැකකරුවන් දෙදෙනාම අත්අඩංගුවට ගැනීම සඳහා පරීක්ෂණ දිගටම කරගෙන යන බව ද ඒ මහතා තවදුරටත් සඳහන් කළේය.
හිටපු රාජ්‍ය අමාත්‍ය ප්‍රසන්න රණවීර මහතා පසුගිය මාර්තු මස 7 වැනිදා සිට අතුරුදන්ව සිටින අතර, ඉෂාරා සෙව්වන්දි නමැත්තිය ගනේමුල්ල සංජීව පාතාල නායකයාට වෙඩි තැබීමේ සිද්ධිය වූ පසුගිය පෙබරවාරි 19 වැනිදා සිට අතුරුදන්ව සිටී. එනම්, ඇය අත්අඩංගුවට ගැනීමට නොහැකි වී ඇති කාලය මාස දෙකකට වැඩි කාලයක් වන අතර, ප්‍රසන්න රණවීර මහතා ද දැනට සති ගණනක සිට අතුරුදන්ව සිටී.
කිරිබත්ගොඩ ප්‍රදේශයේ රජයේ ඉඩමක් ව්‍යාජ ඔප්පුවකින් අලෙවි කිරීමේ සිද්ධියක් සම්බන්ධයෙන් මහර මහේස්ත්‍රාත් කාංචනා නිරන්ජලා ද සිල්වා මහත්මිය විසින් හිටපු රාජ්‍ය අමාත්‍ය ප්‍රසන්න රණවීර මහතා අත්අඩංගුවට ගැනීමට පසුගියදා නියෝගයක් නිකුත් කෙරිණි. ඒ අනුව, අපරාධ පරීක්ෂණ දෙපාර්තමේන්තුවේ කණ්ඩායමක් රණවීර මහතා අත්අඩංගුවට ගැනීම සඳහා පසුගිය මාර්තු 6 වැනිදා ඔහුගේ කැලණියේ නිවසට ගොස් ඇතත්, ඔහු නිවෙසින් පලා ගොස් සිටි බව වාර්තා විය.
දැන් මාස දෙකකට ආසන්න කාලයක් තිස්සේ පලා යාමට සමත් වී ඇති මෙම දෙදෙනා සොයා ගැනීම සඳහා පොලිසිය විශේෂ මෙහෙයුම් දිගටම ක්‍රියාත්මක කරන අතර,
ඔවුන් පිළිබඳව තොරතුරු ලබා දෙන ලෙස මහජනතාවගෙන් ඉල්ලා සිටී.
පොලිසිය පවසන අන්දමට, දෙදෙනාම ලංකාවෙන් පිටව යාමේ හැකියාවක් ඇති බැවින්, විවිධ සැකකටයුතු ස්ථාන සෝදිසි කිරීමට අමතරව, ඔවුන් රටින් පැන යා හැකි විවිධ මාර්ග පිළිබඳවද පොලිසිය විශේෂ අවධානය යොමු කර ඇති බව වාර්තා වේ.
අදාළ පරීක්ෂණ සම්බන්ධයෙන් පොලිසිය දිගටම වැඩසටහන් ක්‍රියාත්මක කරන අතර ඉදිරි කාලය තුළ දැඩි විමර්ශන සිදු කිරීමට කටයුතු යොදා ඇති බව ද පොලිස් ප්‍රකාශකවරයෙකු සඳහන් කළේය.
Saru FM Media
