සිංහල හා ද්‍රවිඩ අලුත් අවුරුදු උත්සවයේ හිසතෙල් ගෑමේ මංගල්‍යයේ රාජ්‍ය උත්සවය අද (16) පෙරවරු 09.04ට යෙදී තිබුණ සුබ මොහොතේ දී මහනුවර ශ්‍රී දළදා මාළිගා පරිශ්‍රයේ ඓතිහාසික නාථ දේවාල භූමියේ දී සිදු කෙරුණා.
සෞඛ්‍ය අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන් ආගමික වතාවත් සඳහා මුල් තැන දී පැවති උත්සවය සඳහා ගිහි පැවිදි විශාල පිරිසක් එක්ව සිටි බවයි අප ප්‍රාදේශීය වාර්තාකරු පැවසුවේ.
මල්වතු පාර්ශ්වයේ අනුනායක පූජ්‍ය නියංගොඩ විජිතසිරි, පූජ්‍ය දිඹුල්කුඹුරේ විමලධම්ම, අස්ගිරි පාර්ශ්වයේ අනුනායක පූජ්‍ය වේඩරුවේ ශ්‍රී උපාලි , ලේඛකාධිකාරී පූජ්‍ය මැදගම ධම්මානන්ද, නියෝජ්‍ය ලේඛකාධිකාරී පූජ්‍ය ආරම්පරාවේ ආනන්ද නාහිමිවරු ප්‍රමුඛ මල්වතු අස්ගිරි මහා සංඝරත්නය මෙන්ම මධ්‍යම පළාත් ආණ්ඩුකාර මහාචාර්ය සරත් බී. අබේකෝන්, ආයුර්වේද කොමසාරිස් ජනරාල් ධම්මික අබේගුණවර්ධන, නියෝජ්‍ය සෞඛ්‍ය අමාත්‍ය වෛද්‍ය හංසක විජයමුණි, පාර්ලිමේන්තු මන්ත්‍රී චමින්ද්‍රාණී කිරිඇල්ල ,නාථ දේවාලයේ බස්නායක නිලමේ ඒ.ඩබ්.එස්. බණ්ඩාරනායක යන මහත්වරු පිරිසක් මෙම අවස්ථාවට එක්ව සිටියා.
දළදා මාලිගාවේ ඇත් පන්තියේ බුරුම රාජා හා මිගාර රාජා ඇතුන්ගේ ද හිස තෙල් ගෑම සිදු කෙරුණු බවයි වාර්තා වන්නේ.
මීට අමතර ව දිවයින පුරා වෙහෙර විහාරස්ථානවල ආගමික වතාවත්වලට මුල් තැන දෙමින් හිසතෙල් ගෑමේ මංගල්‍යය සිදු කෙරුණු අතර ශ්‍රීපාද උඩ මළුවේ ද මෙම චාරිත්‍රය අද සිදු කෙරුණා.
ඒ ශ්‍රීපාද භාරකාර දොරපනේ සුමන ජෝති හිමියන්ගේ ප්‍රධානත්වයෙන්.
Saru FM Media
