ආන්දොලනයක් ඇති කළ දිල්ෂි අම්ෂිකා සිසුවිය ලිංගික අපයෝජනයක් හේතුවෙන් දැඩි මානසික පීඩාවකට ලක්ව සියදිවි නසා ගැනීමේ සිද්ධියේ මරණයට වගකිව යුතු බවට සැක කෙරෙන ගණිත ගුරුවරයා කොළඹ සිට පුත්තලම සහිරා ජාතික විද්‍යාලයට මාරු කිරීමට ගත් තීරණයට එරෙහිව අද උදෑසන පුත්තලම සහිරා ජාතික විද්‍යාලය ඉදිරිපිට දැවැන්ත විරෝධතාවක් පැවැත්විණි.
කොටහේන රාමනාදන් හින්දු විදයාලයේදී ඔහු 2023 වසරේ අග භාගයේදී මෙම අතවරය සිදුකර තිබූ අතර
සිද්ධිය පිලිබඳ වසර ගනනාවකට පසු ඇතිවූ උණුසුම හමුවේ ගුරුවරයා පුත්තලම සහිරා ජාතික විද්‍යාලයට මාරු කර යවා තිබුණි.
ඉහත ස්ථාන මාරුව අධ්‍යාපන, උසස් අධ්‍යාපන හා වෘත්තීය පුහුණු අමාත්‍යාංශයේ අතිරේක ලේකම්වරයා විසින් 7 වන දින ලබා දෙන ලදී.
මෙම මාරු කිරීම සම්බන්ධ ලිපියේ පිටපත් කොළඹ සහ වයඹ පළාත් අධ්‍යාපන අධ්‍යක්ෂවරුන්ට, කොළඹ සහ පුත්තලම කලාප මට්ටමේ අධ්‍යාපන අධ්‍යක්ෂවරුන්ට සහ අදාළ විදුහල්පතිවරුන් දෙදෙනාට යවා ඇත.
මෙම තත්ත්වය තුළ, බරපතල චෝදනාවකට සම්බන්ධ ගණිත ගුරුවරයෙකුට පාසලට ඇතුළුවීමට අවසර දිය නොහැකි බව අවධාරණය කරමින් පුත්තලම ජනතාව ඉහත විරෝධතාවයේ නිරත වූහ.
මෙම විරෝධතාවයට තරුණයින්, මහජනතාව, කාන්තාවන් සහ සිසුන් ඇතුළු සියයකට අධික පිරිසක් සහභාගී වූහ.
‘පුත්තලම, ප්‍රතිසංස්කරණ පාසලක් නොවේ’, ‘යුක්තිය ලෙස අසාධාරණ පත්වීම්වලට අපි විරුද්ධ වෙමු’, ‘විනය විරෝධී ගුරුවරයා සේවයෙන් පහ කරනු’, ‘අත්හිටුවිය යුතුව තිබූ ගුරුවරයෙකුගේ මාරු කිරීම අපි හෙළා දකිමු’ වැනි සටන් පාඨ විරෝධතාවට ඇතුළත් විය.
‘වැරදිවලට දඬුවම් ලැබිය යුතු රජයේ නිලධාරීන්ට පුත්තලම හිරගෙයක් නොවේ, පුත්තලම තවදුරටත් මෙයට ඉඩ නොදේ’ ආදී වශයෙන් භාෂා තුනෙන්ම ලියන ලද සටන් පාඨ අතැතිව පුත්තලම ජනතාව තම විරෝධය පළ කළහ.
සියදිවි නසාගත් සිසුවියට සහ ඇගේ පවුලට යුක්තිය ඉටු කරන ලෙසද විරෝධතාකරුවන් ඉල්ලා සිටියහ.
මේ අතර අද සජබ මන්ත්‍රී මුජබර් රහුමන් පාර්ලිමේන්තුවේදී කියා සිටියේ අදාළ ගුරුවරයාගේ කොළඹ නිවසට පොලිස් ආරක්ෂාව ලබාදී ඇති බව දැනගන්නට ඇති බවයි.
මෙම සිද්ධියට අදාළව මියගිය දැරිය වෙනුවෙන් අද දිනයේද කොළඹ ස්ථාන කිහිපයක විරෝධතා පැවතිණි.
Saru FM Media
