වර්තමානයේ දී ස්මාට් කාන්තාවන් බොහොමයක් දෙනා ස්කූටියක හිමිකාරියක්. ප්‍රමාණයෙන් කුඩා බවත්, හුරුබුහුටි පෙනුමත්, පාලනය කිරීමේ පහසුවත් ස්කූටි කාන්තාවන් අතර ජනප්‍රිය වන්නට බලපානවා. නිතර කුඩා දුරක් ගමන් කිරීමට ඇත්නම් ස්කූටියක වටිනාකම බොහොමයි. ස්කූටියක් පැදවීමේදී අප සැලකිලිමත් විය යුතු කරුණු රාශියක් තිබෙනවා.
ස්කූටියෙන් ගමනක් යාමට පෙර ඔබ සිදු කළ යුතු දේවල් කිහිපයක් විශේෂඥයින් දක්වා තිබෙනවා. ඒ ගමන කරදරයකින් තොරව නිම කරන්නටයි.
ස්කූටි වුවද අදාළ රථ වාහන නීති සියල්ල පිළි පැදිය යුතු වීම අතිශය සාමාන්‍ය කරුණක්. එහෙත් එය ඉතා වැදගත්. ඔබ පුහුණු කාලයේදී ඉගෙන ගන්නා සියලු නීති රීතිවලට අදාළව දළ අදහසක් මතකයේ තබා ගනිමින් පැදවීම කළ යුතුයි.
ස්කූටියක් යන්නත් පාපැදියක් නොව තවත් වාහනයක් බව ඔබ සිහි තබාගත යුතුයි. විශේෂයෙන් අතුරු මාර්ගවල ස්කූටි පදින ඔබත් මේ රථ වාහන නීති නිසි අයුරින් පිළිපදින්නට අවශ්‍ය වෙනවා. අතුරු මාර්ගවල රථවාහන නීති නොතකා ධාවනයෙන් මේ මොහොත වන විටත් අනතුරු විශාල සංඛ්‍යාවක් සිදු වීම ඊට හේතුවයි.
ස්කූටිය කුඩා නිසා ඔබ අනෙක් වාහනවලට කිට්ටුවෙන් ගමන් කරන්නේ නම් අනෙක් වාහනවල පැති කණ්ණාඩිවලට ඔබව නොපෙනෙන්නට ඉඩකඩ වැඩියි. නිසි දුර පවත්වාගෙන පැදවීම කෙරෙහි ඔබ අවධානය යොමු කළ යුතුයි. නැතිනම් පැත්තෙන් ඉස්සර කිරීම්වලදී අනතුරු සිදුවිය හැකියි.
වාහනයක් පසු පසින් යන විට සෑම අවස්ථාවකදීම නිශ්චිත දුරක් පවත්වාගනිමින් ස්කූටිය පැදවිය යුතුයි. හදිසියේ ඉදිරියේ වාහනය නැවැත්වුවහොත් ඔබට නතර කරගැනීමට ඉඩක් තිබිය යුතුයි. ඔබට නිසි පරිදි ඉදිරිය නොපෙනුනහොත් ද අනතුරු සිදුවිය හැකියි.
හිස් ආවරණය (helmet) ඔබ අනිවාර්යයෙන් පළඳිනවාමයි. පොලිසියට බිය වීම නිසා ඔවුන් දුටු තැන හෙල්මට් පැළඳීම නම් කොහෙත් ම සුදුසු නැහැ. ඔබේ ආරක්ෂාව ඔබ සතුයි. ස්කූටියේ යන දෙදෙනාම අනිවාර්යයෙන් හෙල්මට් පැළඳීම අත්‍යවශ්‍යයි.
ඔබ අඳින්නේ සාරියක් හෝ ඔසරියක් නම්, එහි පොට පිළිබඳ ව ඉතාම සැලකිලිමත් විය යුතුයි. එය රෝදයේ පැටලී අනතුරු සිදු විය හැකි වීම ඊට හේතුවයි. එය නිසි පරිදි රඳවා ගත යුතුයි. නොමැති නම්, පහසු නමුත් ඉතා ආරක්ෂාකාරී ඇඳුමක් ඇඳ ගැනීම සුදුසුයි. හොඳ ප්‍රමිතියෙන් යුතු ආරක්ෂිත කබායක් ද පැලඳිය යුතු වනවා. අත් වැසුම් ද පැළඳීම කළ යුතුයි.
නිතරම අමතර යතුරක් තබා ගැනීම නුවණට හුරු දෙයක්. බොහෝ දෙනා හිස් ආවරණයත් සමඟ යතුරත් ආසන කවරය යටට දමා අමතක වීමෙන් වසනවා. එය කරදර ගොඩකට මුලක්. අමතර යතුරක් තිබීමෙන් ඒවා විසඳෙනවා.
කාලගුණ වෙනස්විම් පිළිබඳ අවධානය යොමු කළ යුතුයි. අධික වර්ෂාවක දී ඔබට ස්කූටියට යාම අසීරුයි. එම අවස්ථාවන්වල පාර ලෙස්සීම නිසා ඉතා සෙමින් සහ ප්‍රවේශමෙන් පැදවූයේ නැත්නම් අනතුරු වීමේ සම්භාවිතාවය ඉහළයි.
මේ ස්මාට් ටිප්ස් භාවිතා කරමින් ඔබට වඩාත් හොඳින් ස්කූටි පදවන්නට හැකි වේ යැයි අප විශ්වාස කරනවා. ඕනෑම අවස්ථාවක වැඩියෙන් ම වටින්නේ ආරක්ෂාවයි. ඔබේ ආරක්ෂාව ඇත්තේ ඔබ අතේමයි. ස්කූටි පදවන විට ඉහත ආරක්ෂක ක්‍රමවේද භාවිතා කිරීමෙන් අනතුරු වළක්වා ගන්නට ඔබට පුළුවන්.
Saru FM Media
