ව්‍යවස්ථාපිත ආණ්ඩුවෙන් බැහැරව තිබෙන කළු පාලනේ ඉක්මනින් අවසන් කරනවා
මත්ද්‍රව්‍ය අවි ආයුධ අයථා දේපළ ධනය මිනිසුන් ඝාතනය කරන මානසිකත්වය අපි පරාජය කරනවා
සංචාරක කර්මාන්තය ප්‍රවර්ධනය රටේ සංස්කෘතිය හා සාරධර්ම මත සිදුවේවි
විහාර හා දේවාලගම් පනතේ 41 හා 42 වගන්තිය සංශෝධනය නීතිපති දෙපාර්තමේන්තුවට යොමු කර තිබෙනවා
ඓතිහාසික උරුමය මත සංචාරක ව්‍යාපාරය කරනවා
විධායක ජනාධිපතිට සීමා නැතත් මට සීමා තිබෙනවා
අභිනව අස්ගිරි අනුනාහිමියන්ට අක්තපත්‍ර පිරිනැමීමේ රාජ්‍ය මහෝත්සවයේදී ජනපති අවධාරණය කරයි
සදාචාර විරෝධී සමලිංගික චර්යාවන් ප්‍රවර්ධනය කිරීම රාජ්‍ය ප්‍රතිපත්තිය හෝ සංචාරක කර්මාන්තයේ මූලික මූලධර්මයක් නොවන බව ජනාධිපති අනුර කුමාර දිසානායක මහතා පැවසීය. මෙරට තුළ පවතින වසර 2500ක් වන දිගු ශිෂ්ටාචාරය, මෙරට තුළ පවතින ස්වභාව සෞන්දර්ය, ආගන්තුක සත්කාර සහ වනජීවී කලාප, සතුන් යන මූලික මූලධර්මයන් හතර මෙරට සංචාරක කර්මාන්තය ප්‍රවර්ධනය කිරීමට රජය යොදාගනු ලබන බවද ජනාධිපතිවරයා සඳහන් කළේය. අස්ගිරි පාර්ශ්වයේ අනුනායක ධුරය සඳහා අභිනවයෙන් තේරී පත්වූ පූජ්‍ය නාරම්පනාවේ ආනන්ද නාහිමියන් වෙත ශ්‍රී සන්නස්පත්‍රය පිරිනැමීමේ රාජ්‍ය මහෝත්සවයට එක්වෙමින් ඊයේ (03දා) පස්වරුවේදී ජනාධිපතිවරයා මේ බව කීය.
නීත්‍යානුකූල ව්‍යවස්ථාපිත පාලනයක් තිබියදී ‘කළු පාලනයක්’ කාටවත් ගෙනයන්න ඉඩ නොතබන බවත් එවැනි ‘කළු පාලන’ ඉක්මනින් අවසන් කර දමන බවත් ජනාධිපතිවරයා එහිදී කීය.
ජනාධිපතිවරයා මෙසේ ද සඳහන් කළේය.
“එක පැත්තකින් ව්‍යවස්ථාවෙන් පිහිටවූ ආණ්ඩුවක් තියෙනවා. එතරම් බලවත් නොවුණත් මතුපිට ආණ්ඩුවේ සියලු අංග සහිත කළු පාලනයකුත් අපේ රටේ තියෙනවා. නීත්‍යානුකූල පොලිසියක් තියෙනවා. කළු පාලනයටත් පොලිසියේ කට්ටියක් ඉන්නවා. දැන් අපි ඉන්නේ ද්විත්ව ආණ්ඩුකරණයේ. එකක් ජනතාව විසින් තෝරාපත් කරගත් ආණ්ඩුව. අනෙක අවිබලය විසින් නිර්මාණය කළ කළු පාලනය. අපි තීරණයක් ගත යුතුයි හාමුදුරුවනේ, එක්කෝ ඕන දෙයක් සිදුවුණා දේ කියලා කළු පාලනය තියෙද්දී අපේ පාලනය කරගෙන යන්න. එහෙම නැත්නම් ව්‍යවස්ථානුකූල පාලනය අතහැරලා අපි හැමෝම කළු පාලනයට යන්න ඕනේ. එහෙම නැත්නම් නීත්‍යානුකූල පාලනයේ සුරක්ෂිතභාවය උදෙසා කළු පාලනය අවසන් කළ යුතුයි. මම හිතනවා අපේ ආණ්ඩුව තෝරාගත්තේ ඒ පාර. ඒ සඳහා තැබූ පියවර කිසිසේත්ම ආපසු හරවන්නේ නැති බව හාමුදුරුවන් වහන්සේලාට සපථ කරලා පවසනවා.”
මේ අතර වැඩිදුරටත් අදහස් දක්වමින් ජනාධිපති අනුර කුමාර දිසානායක මහතා පවසා සිටියේ, සමාජයේ ඇති වී තිබෙන යම් යම් පිරිහීම් හමුවේ විහාර දේවාලගම් පනත සංශෝධනය කිරීමට කටයුතු කර ඇති බවය.
“විශේෂයෙන්ම විහාර දේවාලගම් පනතේ 41 වන වගන්තිය සහ 42 වගන්තිය අවශ්‍ය වන සංශෝධනය සහිත බලයන් ලබාදෙන්න කියලා ඔබවහන්සේලාගෙන් ඉල්ලා සිටියා. ඒ සංශෝධන සකස් කරා. නැවත සංශෝධනය කරලා මහනායක උන්වහන්සේලාට ඉදිරිපත් කළා. උන්වහන්සේලාගේ අදහස් සහිතව නැවත සංශෝධනය කරමින් දැන් නීති කෙටුම්පත් දෙපාර්තමේන්තුවේ තියෙනවා. ඉතා ඉක්මනින් අපි ඒ නීතිය සම්පාදනය කරලා ශාසනයේ චිරස්ථිතිය වෙනුවෙන් එහි පවත්වාගත යුතු විනය කර්ම පවත්වා ගැනීමට නීතිමය රැකවරණය අපි විසින් ලබාදෙන්නම්… හැබැයි නීතිය පමණක් ප්‍රමාණවත් වන්නේ නෑ.”
සමාජයේ කැලඹීමක් ඇති වෙන ඕනෑම වේලාවක මහනායක හිමිවරුන් සක්‍රීයව එයට දායකවී අනුශාසනා ලබාදීම සමාජයට අවශ්‍ය බවද සඳහන් කර සිටි ජනාධිපතිවරයා, විධායක ජනාධිපතිවරයාට සීමාවන් නොමැති වුවත් තමාට සීමාවන් ඇති බව ද මෙහිදී සඳහන් කළේය.
“ජනාධිපතිවරයා ලෙස මා දන්නවා මට තියෙන සීමාවන් කවරක්ද කියලා. බොහෝ අය හිතාගෙන හිටියා මේකට සීමාවන් නෑ කියලා. ඔව් ව්‍යවස්ථාවේ සීමාවන් නෑ. ඕනෑම වැරදිකරුවෙක් නිදහස් කරන්න පුළුවන්, ව්‍යවස්ථාවේ සීමාවන් නෑ. ඕන තරම් රාජ්‍ය ධනය නාස්ති කරන්න පුළුවන්. ව්‍යවස්ථාවේ සීමාවන් නෑ. ඕන තරම් මාලිගාවන් හදන්න පුළුවන් ව්‍යවස්ථාවේ සීමාවන් නෑ. ඕනෑ තරම් පුද්ගලික කාර්යමණ්ඩලය පත්කරගත හැකියි, ව්‍යවස්ථාවේ සීමාවන් නෑ. එහෙත් විධායක ජනාධිපතිට සීමාවන් නැති වුණාට අපිට සීමාවන් තියෙනවා. ඒ නිසා අපි ඔප්පු කරමින් ඉන්නවා සමහර දේ ප්‍රායෝගිකව සීමාකරන්න. ආණ්ඩුවට තමන්ට රිසි දේ කරන්න පුළුවන් දෙයක් නෙමෙයි. ස්වාමීන් වහන්සේලා ඉතිහාසය පුරා ඔවදන් දීලා මැදිහත් වෙලා තියෙනවා. ඒ උරුමය අපි පිළිගන්න ලෑස්තියි. ඒ නිසා මහනායක හිමිවරු පෙන්වා දුන් කරුණ ගැන කරුණු කිහිපයක් කියන්නම්.”
මේ අතර, මහනාහිමිවරුන් විසින් පසුගිය දා ඉදිරිපත් කරන ලද ලිඛිත ප්‍රකාශය පිළිබඳ ද ජනාධිපතිවරයා මෙහිදී රජයේ ස්ථාවරය ප්‍රකාශ කර සිටියේය.
සමාජ පරිහානියට හේතුවන අදූරදර්ශී නීති හඳුන්වාදීම හා සදාචාර විරෝධී සමලිංගික චර්යාවන් ප්‍රවර්ධනය කිරීමට රාජ්‍ය යාන්ත්‍රණය කටයුතු කිරීම සම්බන්ධයෙන් විරෝධය පළ කරමින් ත්‍රෛනිකායික මහනායක හිමිවරුන් විසින් ජනාධිපති අනුර කුමාර දිසානායක මහතා වෙත පසුගිය සැප්තැම්බර් 30 වන දින ලිපියක් නිකුත් කර තිබුණි.
ඒ පිළිබඳ අදහස් දැක්වූ ජනාධිපතියවරයා පවසා සිටියේ, සංචාරක කර්මාන්තය අවුරුදු 2500ක අනන්‍යාතවය මත ගොඩනැඟී ඇති බවත්, ඒ අනුව ඓතිහාසික උරුමය මත සංචාරක ව්‍යාපාරය පවත්වා ගැනීමට කටයුතු කරන බවත්ය.
එමෙන්ම රට තුළ ඇති දේශගුණික සෞන්දර්ය මත ද සංචාරක ව්‍යාපාරය තීරණය වී ඇතැයි පැවසූ ජනාධිපතිවරයා අනුරාධපුර රාජධානිය පැරණි පෞඪත්වය ඉස්මතු කිරීම සඳහා නැවත ගොඩනැඟිය යුතු බවද කියා සිටියේය.
“මේ දේවල් හැරුණු කොට වෙන දේවල් අපේ සංචාරක කර්මාන්තයේ ප්‍රමුඛතාවයන් නෙමෙයි. වෙන දේවල් වලට වෙනම තැන් තියෙනවා. ඒ නිසා ඔය නිවේදනය ගැන ඇතිවුණ පැටලැවිල්ල එය රාජ්‍ය ප්‍රතිපත්තිය හෝ සංචාරක කර්මාන්තයේ මූලික මූලධර්මයන් නොවේ” යැයි ද ජනාධිපතිවරයා කීවේය.
මේ අතර දණ්ඩ නීති සංග්‍රහයේ සංශෝධනය සම්බන්ධයෙන් ද අදහස් දක්වමින් ජනාධිපතිවරයා පවසා සිටියේ අවශ්‍ය නම් දණ්ඩ නීති සංග්‍රහයට සංශෝධන ඉදිරිපත් කළ හැකි බවත් එසේ නොවේ නම් එම නීතිය පවත්නා අයුරින්ම තැබිය හැකි බවත් වර්තමානයේ සිදුකර ඇති සියල්ල පෞද්ගලික අරමුණු මත සිදුකර නොමැති බවත්ය.
යහපත් රාජ්‍යයක් සඳහා වූ සිහිනය ඉටුකරගැනීමට විශාල කාර්යභාරයක් මහා සංඝයා වහන්සේ වෙත පැවරී ඇතැයි ද පැවසූ ජනාධිපතිවරයා මත්ද්‍රව්‍ය උවදුර තුරන්කර ගැනීමට පොලිසිය ගත් උත්සාහය සාර්ථක බව ද මෙහිදී කියා සිටියේය.
තරුණ තරුණියන් මත් උවදුරෙන් බේරාගැනීමට අවශ්‍ය බවත් ඒ සඳහා ජාතික ව්‍යාපාරයක් ගොඩනැඟිය යුතු බවත් එයට ගම් පුබුදුකරලීමේ විශාල කාර්යභාරයක් ගමේ පන්සල සතු බවත් පැවසූ ජනාධිපතිවරයා පොලිසියට පමණක් මෙම කාර්යභාරය සිදුකිරීම දුෂ්කර වන බව ද සඳහන් කළේය.
සිරිල් විමලසුරේන්ද්‍ර, සමන්තී වීරසේකර
Saru FM Media
