මැදපෙරදිග යුදමය තත්වය හමුවේ සංචාරකයන්ගේ සහ විදේශ ශ්රමිකයන්ගේ ආරක්ෂාව සහ සුභසාධන වෙනුවෙන් මේ වනවිට ක්රියාත්මක වැඩපිළිවෙළ සහ ඉදිරි පියවර පිළිබඳ සොයා බැලීමේ සාකච්ඡාවක් ජනාධිපති අනුර දිසානායකගේ ප්රධානත්වයෙන් අද (04) පස්වරුවේ ජනාධිපති කාර්යාලයේදී පැවැත්විණි.
උද්ගතව ඇති තත්වය හමුවේ විදේශගත ශ්රී ලාංකික ශ්රමිකයන් සහ මෙරටට පැමිණ සිටින සංචාරකයන් මුහුණ දී සිටින ගැටලු විසඳීම සඳහා විදේශ කටයුතු, විදේශ රැකියා සහ සංචාරක අමාත්යාංශය සහ වරාය සහ සිවිල් ගුවන් සේවා අමාත්යාංශයේ මෙහෙයවීමෙන් ක්රියාත්මක වැඩසටහන් පිළිබඳ මෙහිදී ජනාධිපතිගේ අවධානය යොමු විය.
විදේශගත ශ්රී ලාංකිකයන්ගේ සහ සංචාරකයන්ගේ ගැටලු ඉදිරිපත් කිරීම සඳහා පැය 24 පුරා ක්රියාත්මක හදිසි සේවා තානාපති කාර්යාල හරහා සක්රීය කර තිබෙන බවත්, ඒවා සාර්ථකව ක්රියාත්මක වන බවත් මෙහිදී සඳහන් කෙරිණි.
දැනට වාර්තා වී තිබෙන තොරතුරු අනුව අදාළ රටවල වෙසෙන කිසිදු ශ්රී ලාංකිකයෙකුට බරපතළ හානි වාර්තා වී නොමැති බවත්, තානාපති කාර්යාලවලින් සහාය ඉල්ලා ඇති අය වෙනුවෙන් අවශ්ය පහසුකම් සැපයීමට අවශ්ය ප්රතිපාදන අදාළ තානාපති කාර්යාල වෙත මේ වනවිටත් යොමු කර තිබෙන බවත් සඳහන් කෙරිණි.
මෙරට රැඳී සිටින සංචාරකයන්ට අවශ්ය සහාය ලබා දීම සඳහා ශ්රී ලංකා සංචාරක සංවර්ධන අධිකාරිය විසින් 1912 ක්ෂණික ඇමතුම් අංකය හඳුන්වා දී තිබෙන අතර, විදේශයන්හි සිටින ශ්රී ලාංකික ශ්රමිකයන්ගේ ගැටලු ඉදිරිපත් කිරීම සඳහා විදේශ සේවා නියුක්ති කාර්යාංශය මගින් 1989 ක්ෂණික ඇමතුම් අංකය හඳුන්වා දී තිබේ. මෙම ක්ෂණික දුරකථන අංක වෙත ලැබෙන සියලු තොරතුරු නිරන්තරයෙන් යාවත්කාලීන කෙරෙන බවත්, විශේෂ ගුවන් යානා පහසුකම් පිළිබඳ කිසිදු ඉල්ලීමක් මෙතෙක් ඉදිරිපත්ව නොමැති බවත් මෙහිදී සඳහන් විය.
එමෙන්ම විදේශ රැකියාවල නිරත, මෙරටට පැමිණ සිටින ශ්රී ලාංකික ශ්රමිකයන්ට යළි සේවයට වාර්තා කිරීම සඳහා කාලය ලබා දෙන ලෙස අදාළ තානාපති කාර්යාල හරහා ඉල්ලීමක් සිදු කිරීමටද තීරණය කෙරිණි.
සංචාරයට සහ ව්යාපාර කටයුතු සඳහා මැදපෙරදිග රටවලට ගොස් ආපසු ඒමට නොහැකිව සිටින ශ්රී ලාංකිකයින් පිළිබඳවද සොයා බලා ඔවුන් නැවත ගෙන්වා ගැනීමට අවශ්ය පහසුකම් සපයන ලෙසද ජනාධිපති මෙහිදී නිලධාරීන්ට උපදෙස් දුන්නේය.
මේ වනවිට ගුවන් සේවා ක්රමයෙන් යථා තත්වයට පත්වෙමින් තිබෙන බැවින් ගැටලුකාරී තත්වයකින් තොරව අවශ්ය පහසුකම් සැපයීමට හැකි බව ශ්රී ලංකන් ගුවන් සේවයෙහි නිලධාරීහු මෙහිදී වැඩිදුරටත් පෙන්වා දුන්හ.
විදේශ කටයුතු, විදේශ රැකියා සහ සංචාරක ඇමති විජිත හේරත්, වරාය සහ සිවිල් ගුවන්සේවා ඇමති අනුර කරුණාතිලක, සංචාරක නියෝජ්ය ඇමති රුවන් රණසිංහ, විදේශ රැකියා නියෝජ්ය ඇමති අරුන් හේමචන්ද්ර, ජනාධිපති ලේකම් ආචාර්ය නන්දික සනත් කුමානායක, ජනාධිපති කාර්ය මණ්ඩල ප්රධානී ප්රභාත් චන්ද්රකීර්ති, ජනාධිපති ජ්යෙෂ්ඨ අතිරේක ලේකම් රෝෂන් ගමගේ, විදේශ කටයුතු, විදේශ රැකියා සහ සංචාරක අමාත්යාංශයේ ලේකම් අරුණි රණරාජා, වරාය සහ සිවිල් ගුවන් සේවා අමාත්යාංශයේ ලේකම් ඩබ්ලිව්.ඩබ්ලිව්.එස් මංගල, සිවිල් ගුවන්සේවා අධිකාරියේ සභාපති සුනිල් ජයරත්න, ශ්රී ලංකා සංචාරක සංවර්ධන අධිකාරියේ සහ සංචාරක ප්රවර්ධන කාර්යාංශයේ සභාපති බුද්ධික හේවාවසම්, විදේශ සේවා නියුක්ති කාර්යාංශයේ සභාපති කෝසල වික්රමසිංහ, ආගමන හා විගමන පාලක ජනරාල් චමින්ද පතිරාජ, කටුනායක ගුවන්තොටුපොළ කළමනාකරණ ප්රධානී අරුණ රාජපක්ෂ ඇතුළු නිලධාරීහු පිරිසක් මෙම සාකච්ඡාවට එක්ව සිටියහ.
1
Saru News
