දැනට ශ්‍රී ලංකාවේ කොවිඩ්-19 ව්‍යාධියේ නව ප්‍රභේදයක් ව්‍යාප්ත වීමේ අවදානමක් නොමැති නිසා මහජනතාව අනිසි බියක් ඇති කර ගැනීමට අවශ්‍ය නොවන බව සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහතා ප්‍රකාශ කළේය. වසංගත රෝග විද්‍යා අංශයේ විද්‍යාත්මක දත්ත පදනම් කර ගනිමින් ඔහු විසින් නිකුත් කරන ලද නිවේදනයක මෙම කරුණු සඳහන් වේ.
පසුගිය සති කිහිපයේ කාලය තුළ දී ආසියානු රටවල් කිහිපයක කොවිඩ්-19 ආසාදිතයන්ගේ සංඛ්‍යාවේ සැලකිය යුතු ඉහළ යාමක් මාධ්‍ය වාර්තා කර ඇති බව ලේකම්වරයා සඳහන් කළේය. මෙම අවස්ථාවේදී ප්‍රජාව තුළ රෝගයට මුහුණ දීමේ ශරීරික ප්‍රතිරෝධතාව අඩු වී ඇති හැකියාව ඇතුළු විවිධ සාධක මෙම තත්ත්වයට හේතු වී ඇති හැකි යැයි ඔහු පැහැදිලි කළේය.
මෙම පරිසර තත්ත්වය සැලකිල්ලට ගනිමින් සෞඛ්‍ය අමාත්‍යාංශය ජාතික මට්ටමින් සූදානම් වීම සහ මහජන සෞඛ්‍යය ආරක්ෂා කිරීම සඳහා අවශ්‍ය පියවර ත්‍රීව්‍ර කර ඇති බව අමාත්‍යාංශ ලේකම්වරයා තවදුරටත් ප්‍රකාශ කළේය.
අමාත්‍යාංශ ලේකම්වරයාගේ නිවේදනයට අනුව, කොවිඩ්-19 සඳහා සායනික සාම්පල පරීක්ෂා කරනු ලබන ඒකාබද්ධ ශ්වසන ආවේක්ෂණ පද්ධතිය රට පුරා තෝරා ගත් රෝහල් වල අඛණ්ඩව ක්‍රියාත්මක වෙමින් පවතී.
මෙම ක්‍රමවත් ආවේක්ෂණ කටයුතු මගින් රටේ කොවිඩ්-19 තත්ත්වය නිරන්තරයෙන් අධීක්ෂණය කරමින් සිටින බව ඔහු සඳහන් කළේය.
වර්තමානයේ මෙම ආවේක්ෂණ පද්ධතියට අනුව කොවිඩ්-19 රෝගීන්ගේ සංඛ්‍යාවේ කිසිදු වැඩිවීමක් නොපෙන්වන බව ලේකම්වරයා වැඩිදුරටත් ප්‍රකාශ කළේය. මෙම දත්ත මගින් ශ්‍රී ලංකාවේ වර්තමාන තත්ත්වය සාපේක්ෂව ස්ථායී බව පිළිබිඹු වන බව ඔහු අවධාරණය කළේය.
ශ්‍රී ලංකාවේ ඇති විය හැකි වසංගත තත්ත්වයන් කල් තියා හඳුනා ගැනීමට අවශ්‍ය රසායනාගාර ආවේක්ෂණ පද්ධතිය සක්‍රියව ක්‍රියාත්මක වන බව නිවේදනයේ සඳහන් වේ. මෙම පද්ධතිය මගින් නව ප්‍රභේද හෝ වෙනස්කම් ඉක්මනින් හඳුනා ගැනීමට හැකියාව ඇති බව ලේකම්වරයා පැහැදිලි කළේය.
නිවේදනයේ සඳහන් වන පරිදි, අනෙකුත් ශ්වසන රෝග වන ඉන්ෆ්ලුවෙන්සා රෝගය මෙන්ම කොවිඩ්-19 රෝගීන්ගේ වැඩිවීමක් ඇති විය හැකි බව සාමාන්‍ය තත්ත්වයකි. කෙසේ වෙතත්, දැනට සාමාන්‍ය ජනතාවට ඇති අවදානම අඩු මට්ටමක පවතින බව ලේකම්වරයා අවධාරණය කළේය.
ඒ අතරම, වැඩිහිටියන්, ප්‍රතිශක්තිකරණ පද්ධතිය දුර්වල පුද්ගලයන් සහ දියවැඩියාව,
හෘද රෝග වැනි නිදන්ගත රෝග ඇති පුද්ගලයන් වැනි වැඩි අවදානමට ලක් විය හැකි කණ්ඩායම් කෙරෙහි විශේෂ අවධානයකින් සිටීම ඉතා වැදගත් බව ඔහු පැහැදිලි කළේය.
සෞඛ්‍ය හා ජනමාධ්‍ය අමාත්‍යාංශයේ වසංගත රෝග විද්‍යා අංශයේ දත්ත පදනම් කර ගනිමින් ලේකම්වරයා විසින් නිකුත් කරන ලද නිවේදනයේ මූලික සනීපාරක්ෂක පිළිවෙත් පිළිබඳව සවිස්තර උපදෙස් ලබා දී ඇත.
නිතර අත් සේදීම, කැස්ස සහ කිවිසුම් යන අවස්ථා වලදී නාසය සහ මුඛය ආවරණය කිරීම ඇතුළු මූලික සනීපාරක්ෂක පිළිවෙත් සහ ශ්වසන ආචාර විධි නිරන්තරයෙන් පවත්වා ගත යුතු බව ඔහු අවධාරණය කළේය. මෙම සරල නමුත් ඵලදායී පිළිවෙත් මගින් රෝග සම්ප්‍රේෂණ අවම කර ගත හැකි බව ඔහු වැඩිදුරටත් පැහැදිලි කළේය.
සෞඛ්‍ය අමාත්‍යාංශය මහජනතාවට නිවැරදි සහ කාලීන තොරතුරු ලබා දීම සඳහා සම්පූර්ණ සූදානමකින් සිටින බව ලේකම්වරයා ප්‍රකාශ කළේය. ඇති විය හැකි වසංගත තත්ත්වයන්ට මුහුණ දීම සඳහා රෝහල් පද්ධතිය ද අවශ්‍ය සූදානම සම්පූර්ණ කර ඇති බව ඔහු තවදුරටත් සඳහන් කළේය.
මෙම සූදානම් වලට ඔරොත්තු දීමේ ධාරිතාව වැඩි දියුණු කිරීම,
රෝහල් පහසුකම් ශක්තිමත් කිරීම, වෛද්‍ය සේවා සම්පාදන ක්‍රම යාවත්කාලීන කිරීම සහ සෞඛ්‍ය සේවා කාර්ය මණ්ඩලය සූදානම් කිරීම ඇතුළත් වන බව අවබෝධ වේ.
කොවිඩ්-19 තත්ත්වයේ කාලයත් සමඟ සිදු වන වෙනස්කම් පිළිබඳව සෞඛ්‍ය බලධාරීන් අඛණ්ඩ අවධානයෙන් සිටින බව ලේකම්වරයා අවධාරණය කළේය. ජාත්‍යන්තර සෞඛ්‍ය සංවිධාන සමඟ සම්බන්ධීකරණය, ප්‍රාදේශීය රටවල තත්ත්වයන් අධීක්ෂණය කිරීම සහ අදාළ තොරතුරු නිරන්තරයෙන් විශ්ලේෂණය කිරීම මේ අතර ඇතුළත් වේ.
සෞඛ්‍ය හා ජනමාධ්‍ය අමාත්‍යාංශයේ ලේකම්වරයා මහජනතාවගෙන් ඉල්ලා සිටියේ, සෞඛ්‍ය බලධාරීන් විසින් නිල වශයෙන් ලබා දෙන තොරතුරු කෙරෙහි පමණක් අවධානය යොමු කරන ලෙසයි. සමාජ මාධ්‍ය ප්‍රචාරණයන්, තොරතුරු සහ කතිකාවත් වැනි සත්‍යය නොවන ප්‍රභවයන්ගෙන් ලබා ගන්නා තොරතුරු මත විශ්වාසය තැබීමෙන් වළකින ලෙස ඔහු අවධාරණය කළේය.
Saru FM Media
