ශ්‍රී ජයවර්ධනපුර විශ්වවිද්‍යාලයේ තාක්ෂණ පීඨයේ තෙවන වසරේ සිසුවෙකු නේවාසිකාගාරයේදී පහරදීමකට ලක්ව වැලිගම ප්‍රාදේශීය රෝහලේ ප්‍රතිකාර ලබන බව වාර්තා වේ. මෙම පහරදීම පසුගිය අප්‍රේල් 29 වැනි දින සිදුව ඇති අතර, එය සිදුකර ඇත්තේ සිව්වන වසරේ සහ තෙවන වසරේ සිසුන් පිරිසක් විසින් බව වින්දිතයා පවසයි.
වාර්තා වන පරිදි, පහරදීමට ලක්වූ සිසුවා විශ්වවිද්‍යාලය තුළ ශිෂ්‍ය අන්වර්ථ නාමයක් භාවිතා නොකිරීම සහ නවකවදයට විරුද්ධව ක්‍රියා කිරීම හේතුවෙන් මෙම පහරදීමට ලක්ව ඇත. වින්දිතයාගේ ප්‍රකාශයට අනුව, සිසුන් විසි දෙනෙකු පමණ යතුරුපැදිවලින් පැමිණ ඔහුගේ නේවාසිකාගාරයට ඇතුළු වී හෙල්මට් වලින් ඔහුගේ හිසට සහ කොන්දට දැඩි ලෙස පහර දී ඇත.
“2025 අප්‍රේල් 29 වැනි දින ජයවර්ධනපුර විශ්වවිද්‍යාලයේ තාක්ෂණ පීඨයේ සිව්වන වසරේ සහ තෙවන වසරේ අධ්‍යාපනය හදාරන සිසුන් පිරිසක් මා නවකවදයට විරුද්ධව කටයුතු කිරීම සහ ශිෂ්‍ය අන්වර්ථ නාමයක් නොමැතිව විශ්වවිද්‍යාලය තුළ සැරිසැරීම හේතුවෙන් මගේ බෝඩිමට පැමිණ පහර දීමක් සිදු කළා,” යනුවෙන් පහරකෑමට ලක්වූ සිසුවා ප්‍රකාශ කර ඇත.
“සිසුන් 20ක් පමණ පිරිසක් යතුරුපැදිවලින් පැමිණ හෙල්මට් වලින් මගේ හිස ප්‍රදේශයට සහ කොන්ද ප්‍රදේශයට දැඩි ලෙස පහර දුන්නා. මේ සම්බන්ධයෙන් මා හට උපරිම සාධාරණයක් කරන මෙන් මම ඉල්ලා සිටිනවා,” යැයි ඔහු වැඩිදුරටත් පවසයි.
මෙම ප්‍රහාරයෙන් පසු වින්දිතයා මුලින් හෝමාගම රෝහලෙන් ප්‍රතිකාර ලබා ඇති අතර, පසුව ඔහුගේ තත්වය අයහපත් වීම නිසා වැලිගම ප්‍රාදේශීය රෝහල වෙත ඇතුළත් කර ඇත. ප්‍රහාරය හේතුවෙන් ඔහුට නිරන්තර හිසේ කැක්කුම ඇතිවී තිබෙන බව ඔහුගේ මාමා ප්‍රකාශ කරයි.
“මගේ මල්ලිගේ පුතාට තමයි පහර දීලා තියෙන්නේ. එයාගේ ඔලුවට තමයි පහර දීලා තියෙන්නේ. මෙම පහර දීම හේතුවෙන් පුතා හෝමාගම රෝහලින් මීට පෙර ප්‍රතිකාර ලබාගත්තා. දරුවට අමාරු උන නිසා තමයි වැලිගම ප්‍රාදේශීය රෝහල වෙත ඇතුළත් කළේ. හෙල්මට් වලින් පොලු මුගුරුවලින් තමයි ගහලා තියෙන්නේ. දැන් එයාගේ ඔලුව කැක්කුම නිතරම. ඒකට සාධාරණයක් ඉෂ්ට කරල දෙන්න කියල බලධාරීන්ගෙන් ඉල්ලනවා,” යැයි වින්දිතයාගේ මාමා පවසයි.
මෙම සිද්ධිය විශ්වවිද්‍යාල පද්ධතිය තුළ තවමත් පවතින නවකවදය පිළිබඳ ගැටලුව යළිත් මතුකර ඇත. ශ්‍රී ලංකාවේ විශ්වවිද්‍යාල තුළ නවකවදය තහනම් කර ඇතත්, මෙවැනි සිද්ධීන් තවමත් වාර්තා වන බව පෙනේ. වින්දිතයා නවකවදයට එරෙහිව කටයුතු කිරීම හේතුවෙන් ඔහුට පහරදීම සිදුව ඇති බව ඔහුගේ ප්‍රකාශයෙන් පැහැදිලි වේ.
වින්දිතයා සහ ඔහුගේ පවුලේ සාමාජිකයින් මෙම සිද්ධිය සම්බන්ධයෙන් සාධාරණයක් ඉල්ලා සිටිති. විශේෂයෙන් වින්දිතයාගේ මාමා බලධාරීන්ගෙන් මේ සම්බන්ධයෙන් සාධාරණයක් ඉටු කරන ලෙස ඉල්ලා සිටියි.
මෙම සිද්ධිය සම්බන්ධයෙන් විශ්වවිද්‍යාල පරිපාලනය හෝ පොලිසිය විසින් කරන ලද ප්‍රකාශයක් තවමත් ලැබී නොමැත. කෙසේ වෙතත්, මෙවැනි සිද්ධීන් විශ්වවිද්‍යාල ප්‍රජාව තුළ සැලකිල්ලට ගැනීමට ලක්විය යුතු බව අධ්‍යාපන ක්ෂේත්‍රයේ විශේෂඥයින් පවසති.
Saru FM Media
