වෘත්තීය තාක්ෂණ අධ්‍යාපනය ජාතික සංවර්ධන උපායමාර්ගවල මූලික අංගයක්

ජ්‍යෙෂ්ඨ මහාචාර්ය ඒ. චමරු ද අල්විස්

වර්තමාන ගෝලීය ආර්ථික පරිසරය තුළ රටවල්වල් සංවර්ධන අභියෝග සංකීර්ණ වෙමින් පවතී. ජාතික තරගකාරීතාවය, ආර්ථික ස්ථාවරත්වය සහ සමාජ සමෘද්ධිය සඳහා නව මං සෙවීමේ අවශ්‍යතාවය ඉහළ යමින් පවතී. මෙම සන්දර්භය තුළ, වෘත්තීය තාක්ෂණ අධ්‍යාපනය (Vocational Technology Education – VTE) ‘ජාතික සංවර්ධන ක්‍රමවේදවල මූලික අංගයක් ලෙස හඳුනාගෙන ඇත. ප්‍රායෝගික නිපුණතා, තාක්ෂණික දැනුම සහ වෘත්තීය හැකියාවන් වර්ධනය කිරීම මගින් වෘත්තීය තාක්ෂණ අධ්‍යාපනය ජාතික ප්‍රගතියේ වේගවත් මාර්ගයක් ලෙස වර්තමානයේ සැලකිල්ලට ගනු ලබයි. දක්ෂ ජාතියක් ගොඩනැඟීමට වෘත්තීය අධ්‍යාපනයේ භූමිකාව සම්බන්ධයෙන් කැලණිය විශ්වවිද්‍යාලයීය මානව සම්පත් කළමනාකරණ අධ්‍යයන අංශයේ ජ්‍යෙෂ්ඨ මහාචාර්ය, කොළඹ නෙළුම් කුලුන කළමනාකරණ පුද්ගලික සමාගමේ ප්‍රධාන විධායක නිලධාරී ජ්‍යෙෂ්ඨ මහාචාර්ය ඒ. චමරු ද අල්විස් මහතා සමග පැවැත්වූ සංවාදයකි.

වෘත්තීය තාක්ෂණ අධ්‍යාපනය සමාජ සංවර්ධනයට කෙසේ දායක වේද?

වෘත්තීය තාක්ෂණ අධ්‍යාපනය සමාජ සංවර්ධනයට බලපාන්නේ බහුමාන ආකාරයෙන්. පළමුව අවස්ථා ව්‍යාප්ත කිරීම මෙමගින් සිදු වෙනවා. වෘත්තීය තාක්ෂණ අධ්‍යාපනය සාම්ප්‍රදායික අධ්‍යාපන ක්‍රමයෙන් පසුබට අය සඳහා ගෞරවනීය වෘත්තීමය මාර්ග සපයනවා. න්‍යායික අධ්‍යයනයෙන් ඈත් වූ සිසුන් බොහෝ විට ප්‍රායෝගික බුද්ධිමත්භාවයක් (Practical Intelligence) දක්වනවා. එය වෘත්තීය තාක්ෂණ අධ්‍යාපනය අතින් ඉගෙනීමේ (Hands-on Learning) ප්‍රවේශය මගින් සාර්ථකව වර්ධනය කළ හැකියි.

දෙවනුව පෙර සඳහන් කළ පරිදි සේවා වියුක්තිය අඩු කිරීමට දායක වෙනවා. වෘත්තීය තාක්ෂණ අධ්‍යාපනය “රැකියාවට සූදානම්” (Job-Ready) වැඩසටහන් මගින් පුහුණුවේ සිට රැකියාව දක්වා සෘජු සම්බන්ධයක් නිර්මාණය කරනවා. වෙළෙඳපොළට අනුකූල නිපුණතා සපයමින්, වෘත්තීය තාක්ෂණ අධ්‍යාපනය තරුණ තරුණියන් වේගයෙන් කම්කරු බළකායට ඒකාබද්ධ වීමට ඉඩ සලනවා. මෙය තරුණ සේවා වියුක්තිය අඩු කිරීමට වඩාත් ඵලදායී ක්‍රමවේදයක්.

තෙවනුව දරිද්‍රතාවය අවම කිරීමට දායක වෙනවා. වෘත්තීය තාක්ෂණ අධ්‍යාපනය හරහා සුදුසුකම්ලත් තාක්ෂණඥයන්, විදුලි කාර්මිකයන් සහ ICT විශේෂඥයන් වැනි අය ඉහළ වැටුප් සහිත රැකියා ලබාගත හැකියි. මෙම ආදායම් වර්ධනය කුඩා ව්‍යාපාර සඳහා ආයෝජනය කිරීමට පවුල්වලට ඉඩ සලස්වනව. ග්‍රාමීය ප්‍රදේශවලට අදාළ නිපුණතා (කෘෂිකර්මාන්ත තාක්ෂණය, නවීන බලශක්ති පද්ධති) වර්ධනය කිරීමෙන් වෘත්තීය තාක්ෂණ අධ්‍යාපනය ග්‍රාමීය සමෘද්ධිය ප්‍රවර්ධනය කරනවා.

වෘත්තීය තාක්ෂණ අධ්‍යාපනය තිරසාර අනාගතයක් ගොඩනැඟීමට කෙසේ උපකාරී කරගත කළ හැකිද ?

වෘත්තීය තාක්ෂණ අධ්‍යාපනය තිරසාර අනාගතය ගොඩනැඟීමේ කොඳු නාරටියක් ලෙස ක්‍රියා කරනවා. එය සිදුවන්නේ තාක්ෂණික දියුණුව ළඟාකර ගැනීම හරහායි. වෘත්තීය තාක්ෂණ අධ්‍යාපනය ආර්ථික ක්ෂේත්‍ර තුළ නව තාක්ෂණයන් ඒකාබද්ධ කිරීමේ ප්‍රධාන උපාය මාර්ගයයි. ස්වයංක්‍රීය නිෂ්පාදනය (Automated Manufacturing) සහ ඩිජිටල් සෞඛය සේවා (Digital Healthcare) වැනි ක්ෂේත්‍රවලට පුහුණු කළ පුද්ගලයන් තාක්ෂණික ආයෝජනවලට ප්‍රතිලාභ ගෙන දෙනවා. වෘත්තීය තාක්ෂණ අධ්‍යාපනය හි අතින් ඉගෙනීමේ ස්වභාවය නිසා, ශිෂ්‍යයන් ගැටලු නිරාකරණය කිරීමේ හැකියාවන් (Problem-Solving Skills) වර්ධනය කර ගන්නා අතර, ඔවුන් රැකියාවේ දී ක්‍රමානුකූල නවෝත්පාදන (Incremental Innovations) සිදු කිරීමට සමත් වෙනවා.

දෙවනුව යටිතල පහසුකම් සංවර්ධනය කරනවා. වෘත්තීය තාක්ෂණ අධ්‍යාපනය රටේ යටිතල පහසුකම් (infrastructure) ගොඩනඟා රැකීරක්ෂා කරන දක්ෂ ශ්‍රමිකයන් නිපදවනවා. විදුලි කාර්මිකයන්, නවීන බලශක්ති තාක්ෂණඥයන් (Renewable Energy Technicians) සහ ජාල විශේෂඥයන් (Network Specialists) වැනි වෘත්තීයන් රටේ සංවර්ධන ව්‍යාපෘති සඳහා අත්‍යවශ්‍ය වෙනවා. මෙම වෘත්තීකයන් නොමැතිව, ජාතික යටිතල පහසුකම් ව්‍යාපෘති අසාර්ථක විය හැකියි. තෙවනුව පාරිසරික තිරසාරතාව සඳහා දායක වෙනව. වෘත්තීය තාක්ෂණ අධ්‍යාපනය “හරිත නිපුණතා” (Green Skills) එක් කිරීමෙන් පාරිසරික අභියෝගවලට මුහුණ දෙනවා. නවීන බලශක්ති පද්ධති (Renewable Energy Systems) ස්ථාපනය කිරීම, බලශක්ති සුරක්ෂිත ගොඩනැඟිලි (Energy-Efficient Construction) ජල සංරක්ෂණ තාක්ෂණ (Water Conservation Techniques) සහ චක්‍රීය ආර්ථික මූලධර්ම (Circular Economy Principles) මත පදනම් වූ අපද්‍යව්‍ය කළමනාකරණය වැනි ක්ෂේත්‍රවල පුහුණුව ලබා දීමෙන්, වෘත්තීය තාක්ෂණ අධ්‍යාපනය අඩු කාබන් ආර්ථිකයකට (Low-Carbon Economy) සංක්‍රමණය වීමට රටක් සූදානම් කරනවා.

වෘත්තීය තාක්ෂණ අධ්‍යාපනය ක්‍රමයක සාර්ථකත්වය සඳහා අත්‍යවශ්‍ය අංග මොනවාද?

වෘත්තීය තාක්ෂණ අධ්‍යාපනය ක්‍රමයක සාර්ථකත්වය සඳහා පහත කරුණු අත්‍යවශ්‍ය වෙනවා. එම අංග සිව් වැදෑරුම් වෙනවා.

ගැඹුරු කර්මාන්ත ඒකාබද්ධතාවය (Deep Industry Integration) පළමු වැන්නයි. වෘත්තීය තාක්ෂණ අධ්‍යාපනය විෂය නිර්දේශ කර්මාන්ත අවශ්‍යතා සමග නිරන්තරයෙන් සමපාත විය යුතුයි. කර්මාන්ත නියෝජිතයන් සමග සහයෝගිතාවයෙන් විෂය නිර්දේශ සංවර්ධනය කිරීමත්, අනාගත නිපුණතා අවශ්‍යතා පුරෝකථනය කිරීමත් අත්‍යවශ්‍යයි. ආධුනිකත්ව සහ රැකියාමය ඉගෙනුම (Apprenticeships and Work-Based Learning) වැනි කර්මාන්ත-ආධාරක වැඩසටහන් අත්‍යවශ්‍ය වෙනවා. දෙවනුව ගුණාත්මකභාවය සහ අනුකූලතාව (Quality Assurance and Relevance) අත්‍යවශ්‍ය වෙනවා. වෘත්තීය තාක්ෂණ අධ්‍යාපනය සුදුසුකම් ජාතික වශයෙන් හඳුනාගත යුතු අතර විෂය නිර්දේශ නවීන තාක්ෂණයන් සමග යාවත්කාලීන විය යුතුයි. ශක්තිමත් ජාතික නිපුණතා ප්‍රමිති (National Competency Standards) සහ සුදුසුකම් රාමුව (Qualifications Framework) පවත්වා ගත යුතු වෙනවා. වෘත්තීය තාක්ෂණ අධ්‍යාපනය විෂය නිර්දේශවලට තාක්ෂණික නිපුණතා (Hard Skills) පමණක් නොව, සන්නිවේදනය, සහයෝගිතාවය සහ විවේචනාත්මක චින්තනය (Critical Thinking) වැනි මෘදු නිපුණතා (Soft Skills) ද වර්ධනය කිරීමට හැකි විය යුතුයි.

ශක්තිමත් ආයෝජනය (Robust Investment) තුන්වැන්නයි. වෘත්තීය තාක්ෂණ අධ්‍යාපනය ආයතන නවීන උපකරණ සහ පහසුකම්වලින් සන්නද්ධ විය යුතුයි. නවීන කර්මාන්ත ශාලා, පර්යේෂණාගාර සහ අනුකරණ පහසුකම් (Simulation Faculties) වෘත්තීය තාක්ෂණ අධ්‍යාපනය හි ගුණාත්මකභාවය සඳහා අත්‍යවශ්‍යයි. අධ්‍යාපනඥයන්ට අඛණ්ඩ වෘත්තීය වර්ධනය (Continuous Professional Development) අවශ්‍ය වන අතර, ඔවුන්ට නවතම තාක්ෂණික දැනුම සහ ඉගැන්වීමේ ක්‍රමවේද ලබාගත හැකි විය යුතුයි.

සිව්වෙනුව සම්බන්ධිත සහ සංස්කෘතික ප්‍රතිපත්ති රාමුවක් (Inclusive and Coherent Policy Framework) අවශ්‍ය වෙනවා. වෘත්තීය තාක්ෂණ අධ්‍යාපනය සියලුම පසුබිම්වල සිට පැමිණෙන අය සඳහා ප්‍රවේශය විය යුතුයි. කාන්තාවන්, ග්‍රාමීය ජනගහනය සහ විකලාංග ජනතාව වැනි සමාජ කණ්ඩායම් සඳහා වෘත්තීය තාක්ෂණ අධ්‍යාපනය වැඩසටහන් විශේෂයෙන් සැලසුම් කළ යුතුය. වෘත්තීය තාක්ෂණ අධ්‍යාපනය සහ සාකච්ඡා උසස් අධ්‍යාපනය (Academic Higher Education) අතර පැහැදිලි සහ නම්‍යශීලී මාර්ග (Clear and Flexible Pathways) සකස් කළ යුතු වෙනවා. මෙමගින් වෘත්තීය තාක්ෂණ අධ්‍යාපනය සුදුසු බව ජීවිත කාල ඉගෙනුම් පරිසරයක (Lifelong Learning Ecosystem) අග්‍රගණ්‍ය සංරචකයක් බවට පත් කළ හැකියි. මෙම අංග හතර සම්පූර්ණයෙන් ක්‍රියාත්මක කිරීමෙන්, වෘත්තීය තාක්ෂණ අධ්‍යාපනය ජාතික සංවර්ධනයේ ප්‍රබල එන්ජිමක් බවට පත් කළ හැකියි. එය ආර්ථික වර්ධනය, සමාජ සාධාරණත්වය සහ පාරිසරික තිරසාරතාවය යන ක්ෂේත්‍ර තුනේම දායකත්වය ලබා දීමට වෘත්තීය තාක්ෂණ අධ්‍යාපනය සමත් වෙනවා. එනිසා වෘත්තීය තාක්ෂණ අධ්‍යාපනය ජාතික සංවර්ධන උපායමාර්ගවල මූලික අංගයක් ලෙස හඳුනාගෙන, ඒ සඳහා අවශ්‍ය ආයෝජනය සහ ප්‍රතිපත්තිමය සහයෝගීතාවය ලබා දිය යුතුයි.

සටහන….
රුවන් පුෂ්ප කුමාර