ඉකුත් පෙබරවාරි 9 වැනි දින මුළු රට පුරාම ඇති වූ විදුලි බිඳවැටීමට ප්‍රධාන හේතුව ලෙස සූර්ය බලශක්ති පැනල මඟින් ජාතික විදුලි පද්ධතියට සැපයූ අධික විදුලි ධාරිතාවය හේතු වූ බව ලංකා විදුලිබල මණ්ඩලය නිල වශයෙන් ප්‍රකාශ කර සිටියි. මෙම අධික සූර්ය බලශක්ති උත්පාදනය හේතුවෙන් ජාතික විදුලිබල පද්ධතියේ ස්ථායීතාවය සැලකිය යුතු ලෙස අඩු වූ බව පැහැදිලි කර ඇත.
ලංකා විදුලිබල මණ්ඩලය විසින් නිකුත් කරන ලද නිවේදනය අනුව,
මෙම විදුලි බිඳවැටීම පිළිබඳව ස්වාධීන විද්වත් කමිටුවක් විසින් සිදු කරන ලද පුළුල් විමර්ශනයක ප්‍රතිඵල මත මෙම නිගමනයට එළඹී ඇත. එම නිවේදනයේ විශේෂයෙන් සඳහන් කර ඇත්තේ අදාළ දිනයේදී රටේ සමස්ත විදුලි ඉල්ලුමෙන් 50% කට වඩා වැඩි ප්‍රමාණයක් සූර්ය බලශක්තියෙන් සපයා ඇති බවයි.
විමර්ශන වාර්තාවෙන් අනාවරණය වී ඇත්තේ පානදුර ග්‍රිඩ් උප පොළෙහි ඇති වූ කැළඹීමක් හේතුවෙන් මෙම බිඳවැටීම ආරම්භ වූ බවයි. මෙම කැළඹීම හේතුවෙන් සමස්ත ජාතික විදුලිබල පද්ධතියේම හදිසි වෝල්ටීයතා අඩුවීමක් සිදු වී ඇති බව පරීක්ෂණ වාර්තා මඟින් තහවුරු කර තිබේ.
සූර්ය බලශක්ති උත්පාදනය හා බිඳවැටීම අතර සම්බන්ධතාවය පැහැදිලි කරමින්, විදුලිබල මණ්ඩලය පවසා සිටින්නේ මෙම සිද්ධිය සිදු වූයේ ඉරිදා දිනයක වීම සැලකිය යුතු කරුණක් බවයි.
ඉරිදා දිනවල පොදුවේ කාර්මික හා වාණිජ ආයතන වැඩි ප්‍රමාණයක් වසා තිබීම නිසා විදුලි පරිභෝජනය සාමාන්‍ය දිනවලට සාපේක්ෂව අඩු මට්ටමක පවතින අතර, එදින සූර්ය බලශක්ති උත්පාදනය ඉහළ අගයක පැවතී ඇත.
විදුලිබල මණ්ඩලය වැඩිදුරටත් පැහැදිලි කරන්නේ, අධික සූර්ය බලශක්ති උත්පාදනය සමඟම, සාම්ප්‍රදායික විදුලි බලාගාරවල නිමැවුම සැලකිය යුතු ලෙස අඩු වීම නිසා, පද්ධතියට ඇතිවන බාධා අවශෝෂණය කර ගැනීමේ හැකියාව සීමා වූ බවයි. විදුලි උත්පාදනය හා ඉල්ලුම අතර මෙම අසමතුලිතතාවය ශීඝ්‍රයෙන් වර්ධනය වීම හේතුවෙන් අවසානයේදී දීප ව්‍යාප්ත විදුලි බිඳවැටීමකට හේතු සාධක විය.
මෙම සිද්ධිය අධ්‍යයනය කළ විද්වත් කමිටුව, අනාගතයේදී මෙවැනි අවදානම් අවම කර ගැනීම සහ ජාතික විදුලිබල පද්ධතියේ ප්‍රත්‍යස්ථතාව වැඩිදියුණු කිරීම සඳහා,
දිගු කාලීන ජනන ව්‍යාප්ති සැලැස්ම සහ දිගු කාලීන සම්ප්‍රේෂණ සැලැස්මෙහි දක්වා ඇති ක්‍රියාමාර්ග කඩිනමින් ක්‍රියාත්මක කිරීමට නිර්දේශ කර ඇත.
ලංකා විදුලිබල මණ්ඩලය මෙම අත්දැකීම් මත පදනම්ව, පුනර්ජනනීය බලශක්ති ප්‍රභවයන්ගෙන් ලැබෙන විදුලිය වඩාත් කාර්යක්ෂමව හා ආරක්ෂිතව ජාතික පද්ධතියට ඒකාබද්ධ කිරීම සඳහා නව තාක්ෂණික විසඳුම් සහ ක්‍රමවේදයන් සොයා ගැනීමට කටයුතු කරමින් සිටින බව ද දන්වා සිටී.
Saru FM Media
