ශ්‍රී ජයවර්ධනපුර විශ්වවිද්‍යාලයේ පළමු වසරේ සිසුන්ට විශ්වවිද්‍යාල පරිශ්‍රයෙන් පිටත නේවාසිකාගාරවල නවාතැන් පහසුකම් සැපයීමට තීරණය කර ඇති බව එම විශ්වවිද්‍යාලයේ උපකුලපති ජ්‍යෙෂ්ඨ මහාචාර්ය පද්මලාල් එම්. මානගේ මහතා විශේෂ ප්‍රකාශයක් කරමින් පැවසීය.
එම විශ්වවිද්‍යාලයේ නවක සිසුන් සුළු වශයෙන් කායික, මානසික සහ සමාජීය පීඩනයට ලක්කිරීමට එම විශ්වවිද්‍යාලයේත් සිසුන් පිරිසක් කටයුතු කරන බවත්, සුළු වශයෙන් වුවද හිංසාව පිළිගැනීමට තමා සූදානම් නොමැති හෙයින් එම පියවර ගන්නා බවත් උපකුලපතිවරයා අවධාරණය කළේය.
විශ්වවිද්‍යාල ප්‍රජාව නවකවදයට එරෙහියි
උපකුලපතිවරයා වැඩිදුරටත් පැවසුවේ තමා සහ පීඨාධිපතිවරුන්, සියලුම ආචාර්යවරුන් සහ අනධ්‍යයන කාර්යමණ්ඩලය නවකවදයට එරෙහිව ස්ථාවරයක සිටින බවත්, දරුවකු විශ්වවිද්‍යාලයට පැමිණි පසු නිදහසේ අධ්‍යාපනය ලැබීමේ අවස්ථාව තිබිය යුතු බවත් ඒ පිළිබඳව එකම මතයක සිටින බවත් ය.
“කිසිම දරුවකු විශ්වවිද්‍යාලය තුළදී කායික, මානසික හෝ සමාජීය පීඩනයකට ලක්නොවිය යුතුයි. ඇතැම් දරුවන් විවිධ රෝගාබාධවලින් පෙළෙනවා. එවැනි දරුවකු පීඩනය දරාගැනීමට නොහැකිව අධ්‍යාපනය අතහැර දැමිය හැකියි,” යනුවෙන් මහාචාර්ය මානගේ මහතා පැවසීය.
නවක සිසුන් ආරක්ෂා කිරීමේ පියවර
සිසුන් රාත්‍රී කාලයේදී හිංසනයට ලක්වීමේ ඉඩක් ඇති හෙයින් බාහිර නේවාසිකාගාරවල නවාතැන් පහසුකම් සැපයීමට ගත් තීරණයට සමහර සිසුන් විරෝධය පළ කළ ද, ඔවුන්ට ඒ පිළිබඳව පැහැදිලි කර දුන් බව උපකුලපතිවරයා සඳහන් කළේය.
විශ්වවිද්‍යාලයක ආර්ථික වශයෙන් ඉතාමත් පහළ මට්ටමේ, මධ්‍යම පන්තියේ සහ ආර්ථිකය ඉතාමත් ඉහළ මට්ටමක දරුවන් සිටින බවත්, සෑම සිසුවකුටම සමාන අධ්‍යාපන අවස්ථා තිබිය යුතු බවත් මහාචාර්යවරයා අවධාරණය කළේය.
“එම සියලුම දරුවන්ට විශ්වවිද්‍යාලය තුළදී සමානව සැලකිය යුතුයි. විශ්වවිද්‍යාල තුළින් නායකයන් බිහිවුවද ඔවුන් විනාශකාරී නායකයන් නොවිය යුතුයි,” යනුවෙන් උපකුපතිවරයා වැඩිදුරටත් පැවසීය.
රජයේ සහයෝගය ලැබෙයි
නවක සිසුන්ට බාහිර නේවාසිකාගාරවල නවාතැන් සැපයීමට ගත් තීරණය පිළිබඳව අධ්‍යාපන ඇමැතිවරියට දැනුම්දීමෙන් පසුව රජයෙන් යහපත් ප්‍රතිචාර ලැබී ඇති බව උපකුලපතිවරයා සඳහන් කළේය.
ඒ සම්බන්ධව රජය, අධ්‍යාපන ඇමතිවරිය, විශ්වවිද්‍යාල ප්‍රතිපාදන කොමිෂන් සභාවේ සභාපතිවරයා, නියෝජ්‍ය අධ්‍යාපන ඇමැතිවරයා සහ අධ්‍යාපන අමාත්‍යංශයේ ලේකම්වරයාට විශේෂ ස්තූතිය පුද කරන බවත් ශ්‍රී ජයවර්ධනපුර විශ්වවිද්‍යාලයේ උපකුලපති ජ්‍යෙෂ්ඨ මහාචාර්ය පද්මලාල් එම්. මානගේ මහතා වැඩිදුරටත් ප්‍රකාශ කළේය.
මෙම පියවර ශ්‍රී ලංකාවේ උසස් අධ්‍යාපන ක්ෂේත්‍රයේ දිගු කලක් පැවති නවකවදය පිටුදැකීමේ ප්‍රයත්නයන්හි සැලකිය යුතු පියවරක් ලෙස දැකිය හැකි අතර, ශ්‍රී ජයවර්ධනපුර විශ්වවිද්‍යාලය මෙම ගැටලුවට විසඳුම් සෙවීමේ මුල් පෙළේ ආයතනයක් බවට පත්ව ඇත.
Saru FM Media
