යෝජිත කම්කරු නීති ප්‍රතිසංස්කරණය යටතේ ප්‍රධාන පනත් කෙටුම්පත් හතරක් හඳුන්වා දීම පිළිබඳව සලකා බලමින් සිටින බව කම්කරු අමාත්‍ය ආචාර්ය අනිල් ජයන්ත ප්‍රනාන්දු මහතා පවසයි.
ඒ කම්කරු කටයුතු පිළිබඳ අමාත්‍යාංශයීය උපදේශක කාරක සභාව පසුගිය දා කම්කරු අමාත්‍ය ආචාර්ය අනිල් ජයන්ත ප්‍රනාන්දු මහතාගේ ප්‍රධානත්වයෙන් රැස්වූ අවස්ථාවේදී ය.
කම්කරු නියෝජ්‍ය අමාත්‍ය මහින්ද ජයසිංහ මහතා ද රැස්වීමට සහභාගී වී තිබේ.
මෙහිදී අදහස් දක්වූ අමාත්‍යාංශයේ ලේකම්වරයා පවසා ඇත්තේ, දැනට භාවිතයේ පවතින කම්කරු නීති 14ක ප්‍රතිසංස්කරණ අධ්‍යයනය කිරීම සඳහා සාමාජිකයින් 17 දෙනෙකුගෙන් යුත් කමිටුවක් පත් කර ඇති බවය.
මෙම කමිටුව ප්‍රථමයෙන් රැස්වී ප්‍රධාන වශයෙන් ශ්‍රමයට අදාළ පනත් කෙටුම්පත් හතරක් සකස් කිරීම සඳහා මූලික එකඟතාවයකට පැමිණි බව ද ඔහු පැවසුවේය.
වෘත්තීය සමිති, ශ්‍රමය, වෘත්තීය ආරක්ෂාව සහ ශ්‍රමයෙන් ඉවත් වීම යන කරුණු හතරක් සඳහා වෙනම පනත් කෙටුම්පත් සකස් කිරීමට කමිටුව එකඟතාවයකට පැමිණ ඇති බවත් නව නීති සම්පාදනය කරන තෙක් පවතින නීතිවලට අවශ්‍ය සංශෝධන සිදු කරන බවත් අමාත්‍යාංශ ලේකම්වරයා වැඩි දුරටත් අදහස් දක්වමින් සඳහන් කළේය. එමෙන්ම රාත්‍රියේ වැඩ කරන කාන්තාවන් පිළිබඳ නීතිය, කම්කරු ආරක්ෂණ පනත සහ සේවයෙන් ඉවත්කිරීමක් සිදුවුවහොත් රක්ෂණයට අදාළ කරුණු සඳහා ද සංශෝධන සිදු කරන බව අමාත්‍යාංශ ලේකම්වරයා පැවසුවේය.
තවද වෘත්තීය ආරක්ෂාව සහ සෞඛ්‍යය පිළිබඳ ජාතික ප්‍රතිපත්තියක් සකස් කිරීමේ කටයුතු අවසන් අදියරට පැමිණ ඇති බවත් එය ඉක්මනින් ප්‍රකාශයට පත් කිරීමට අපේක්ෂා කරන බවත් මෙහිදී අදහස් දක්වමින් අමාත්‍යාංශ නිලධාරීන් පවසා ඇත.
ඒ සමඟම, කම්කරු දෙපාර්තමේන්තුවේ තොරතුරු පද්ධතිය කාලෝචිත ආකාරයකින් යාවත්කාලීන කිරීමට පියවර ගෙන ඇති බවත්, රජයේ ඩිජිටල්කරණ වැඩසටහන යටතේ, සේවකයින් ශ්‍රම බලකායට ඇතුළු වූ වහාම මෙම තොරතුරු පද්ධතියට ඇතුළත් කිරීම සඳහා සංශෝධන සිදු කරන බවත් එම නිලධාරීන් සඳහන් කර තිබේ.
මෙහිදී අදහස් දැක්වූ කාරක සභාවේ සභාපතිවරයා පැවසුවේ වෘත්තීය සමිති ඇතුළු අදාළ පාර්ශ්වයන් සමඟ සවිස්තරාත්මක සාකච්ඡා කිරීමෙන් පසු යෝජිත කම්කරු නීති ප්‍රතිසංස්කරණ කෙටුම්පත් සකස් කරන බවය.
Saru FM Media
