පුද්ගලෙයකු වයසට යන විට තරුණ වියේදී ශක්තිමත්ව තිබූසම ලිහිල්ව එල්ලා වැටෙනවා දකින්නට පුළුවන්. මේ නිසා වයසට වඩා වයසක පෙනුමක් ලැබීම බොහොමයක් දෙනෙකුට ගැටළුවක්. මෙය බොහෝවිට තරබාරු කාන්තාවන්ගේ වැඩියෙන් දකින්නට පුළුවනි. නමුත් වෛද්‍ය විද්‍යාවේ දියුණුවත් සමග මේ සඳහා දියුණු ප්‍රතිකාර ක්‍රම සොයාගෙන තිබෙනවා. ඒ අතරින් වඩාත් ප්‍රචලිත ප්‍රතිකාරය වන්නේ ත්‍රෙඩ් ලිෆ්ට් ක්‍රමයයි.
මෙහිදී කරන්නේ ඉතා සිහින් තන්තු වර්ගයක් සමට ඇතුළු කිරීමයි .එමගින් සම එල්ලා වැටීම වළක්වනවා. මෙම ප්‍රතිකාරය වඩාත්ම සුදුසු බෙල්ලේ සහ මුහුණේ යට පෙදෙසටයි. මෙම ප්‍රතිකාරය වේදනාකාරී එකක්. එහෙත් එම වේදනාව නැති කිරීමට වේදනා නාශක සමේ බාහිරින් ගල්වනු ලබනවා. නැතහොත් එන්නත් කරනවා. කුඩා තන්තු සම තුලට ඇතුළු කිරීම සඳහා එන්නත් කටුවක් භාවිතා කරනවා. සමට තන්තු ඇතුල් කිරීමෙන් පසුව කටුව ඉවත් කරනවා.
ප්‍රතිකාරය කළ වහාම එම ප්‍රදේශයේ වෙනස්කම් පෙනෙනවා. එහෙත් දින කිහිපයකින් පසුව එම වෙනස්කම් ක්‍රමයෙන් අඩුවනවා. මාස දෙකක් තුනක් පමණ යනවිට එම තන්තු මතින් නව කොලජන් නිෂ්පාදනය කරන්නට පටන් ගන්නවා. එමගින් සමට ශක්තිය ලැබෙනවා. ක්‍රමයෙන් සම ශක්තිමත් වී තරුණ පෙනුමක් ගෙන එනවා.
ඒ වගේම මෙය ශල්‍ය කර්මයක් නෙවෙයි. සැත්කමකින් තොරව සම එල්ලා වැටීම නවතන එකම ක්‍රමය මෙය වනවා.
මෙම ප්‍රතිකාරය කිරීමට පැය 24 කට පෙර මත්පැන් ගන්නා අය ඉන් වැලකි සිටිය යුතුයි. එසේම ඇස්ප්‍රින්, වේදනා නාශක, විටමින් සී සහ ඊ පෙති මෙන්ම වෙනත් විටමින් පෙති ගැනීමෙන් වැළකිය යුතුයි. ඔබට වෙනත් අසනීපයක් තිබේ නම් මෙම ප්‍රතිකාරය කිරීමට පෙර මුලින්ම වෛද්‍යවරයාට පවසන්න. එසේම ප්‍රතිකාරය සිදුකරන ප්‍රදේශයේ ආසාදන තත්වයක් තිබේ නම් ප්‍රතිකාර කල්දමන්නට සිදුවෙනවා.
ප්‍රතිකාරයෙන් පළමු පැය 24 තුළ මුහුණ ඉදිමීමට හැකියි. එය දින කිහිපයකින් යථා තත්වයට පත් වෙනවා. සම රතු වී සති දෙකක පමණ කාලයක් තුළ යථා තත්වයට පත්වෙනවා. ප්‍රතිකාරය කළ ප්‍රදේශය ස්පර්ශ කරන විට වේදනාවක් දැනෙන්නට පුළුවන්. එය සති දෙකකින් පමණ සුව වනවා.
– ඉරේෂා –
Saru FM Media
