පේරාදෙණිය පොලිස් වසමේ ගන්නෝරුව කනිෂ්ඨ විද්‍යාලයට අනුයුක්තව මැතිවරණ රාජකාරි ඉටු කරමින් සිටි සංවර්ධන නිලධාරිනියක් හදිසි රෝගාබාධයක් හේතුවෙන් මිය ගොස් ඇත.
මෙලෙස මරණයට පත්ව ඇත්තේ ගන්නෝරුව පැළෑටි ජාන සම්පත් මධ්‍යස්ථානයේ සංවර්ධන නිලධාරිනියක ලෙස සේවය කළ
වයස අවුරුදු 33ක් වූ ක්‍රිෂාන්ති කුමාර් දසනායක මහත්මියයි. පොලිසිය වාර්තා කරන අන්දමට, ඇය 5 වැනි දින සවස් කාලයේදී මැතිවරණ රාජකාරි සඳහා ඡන්ද මධ්‍යස්ථානයට ගොස් සිටියදී හදිසි රෝගී තත්ත්වයකට මුහුණ දී ඇත.
රෝගී තත්ත්වය උත්සන්න වීමත් සමඟ ඇය වහාම පේරාදෙණිය ශික්ෂණ රෝහල වෙත ඇතුළත් කොට ඇති නමුත්, ප්‍රතිකාර ලබමින් සිටියදී ජීවිතක්ෂයට පත්ව ඇති බව පොලිසිය තවදුරටත් සඳහන් කරයි.
දසනායක මහත්මිය ගන්නෝරුව පැළෑටි ජාන සම්පත් මධ්‍යස්ථානයේ දක්ෂ සංවර්ධන නිලධාරිනියක ලෙස කටයුතු කළ අතර, මැතිවරණ සමයේ රාජකාරි සඳහා ගන්නෝරුව කනිෂ්ඨ විද්‍යාලයට අනුයුක්තව සිටියාය.
මෙම හදිසි මරණය සම්බන්ධයෙන් වැඩිදුර පරීක්ෂණ පේරාදෙණිය පොලිසිය විසින් සිදු කරමින් පවතී.
Saru FM Media
